ഇനിമുതല് രാത്രി കെഎസ്ആര്ടിസിയില് യാത്ര ചെയ്യുന്ന സ്ത്രീകള്ക്കും കുട്ടികള്ക്കും അവര് പറയുന്നിടത്ത് ബസ് നിറുത്തി കൊടുക്കണം. രാത്രി 10 മുതല് രാവിലെ ആറ് വരെ അവര് ആവശ്യപ്പെടുന്ന സ്ഥലത്ത് കെ.എസ്.ആര്.ടി.സി ബസുകള് നിര്ത്തി കൊടുക്കണമെന്നാണ് പുതിയ ഉത്തരവില് പറയുന്നത്.
ഈ ഉത്തരവ് പ്രകാരം സ്ത്രീകള്ക്കൊപ്പം കുട്ടികളുണ്ടെങ്കിലും ഇത് ബാധകമാണ്. മിന്നല് ബസുകള് ഒഴികെ എല്ലാ സൂപ്പര് ക്ലാസ് ബസുകളും ഇത്തരത്തില് നിര്ത്തണം. ഇതുസംബന്ധിച്ച് ഗതാഗതവകുപ്പ് ഉത്തരവിറക്കി.
2022 ജനുവരിയില് കെ.എസ്.ആര്.ടി.സി എംഡി മിന്നല് ഒഴികെ എല്ലാ സര്വീസുകളും രാത്രിയില് യാത്രക്കാര് ആവശ്യപ്പെടുന്നിടത്ത് നിര്ത്തിക്കൊടുക്കണമെന്ന് ഉത്തരവ് നല്കിയിരുന്നു. എന്നാല് പിന്നീട് രാത്രി ഒറ്റയ്ക്ക് യാത്ര ചെയ്യുന്ന സ്ത്രീകള് ആവശ്യപ്പെട്ടാലും സ്റ്റോപ്പില് മാത്രമേ ഇറക്കൂ എന്ന് കണ്ടക്ടര് നിര്ബന്ധം പിടിക്കുകയും സുരക്ഷിതമല്ലാത്ത സ്ഥലത്ത് ഇറക്കിവിടുകയും ചെയ്യുന്നുവെന്ന പരാതികള് വരുന്നതിനാലാണ് പ്രത്യേക ഉത്തരവിറക്കാന് മന്ത്രി ആന്റണി രാജു നിര്ദേശിച്ചത്.