സിനിമാതാരവും മിമിക്രി ആര്ട്ടിസ്റ്റുമായ കൊല്ലം സുധി വാഹനാപകടത്തില് മരിച്ചു. പുലര്ച്ചെ നാലരയോടെ തൃശ്ശൂര് കയ്പ്പമംഗലം പനമ്പിക്കുന്നില് വച്ചായിരുന്നു അപകടം. സുധിയും കൂടട്രും സഞ്ചരിച്ചിരുന്ന കാര് എതിരെ വന്ന പിക്കപ്പുമായി കൂട്ടിയിടിക്കുകയായിരുന്നു. ഗുരുതരമായി പരിക്കേറ്റ സുധിയെ കൊടുങ്ങല്ലൂര് എ.ആര് ആശുപത്രിയില് എത്തിച്ചുവെങ്കിലും ജീവന്രക്ഷിക്കാനായില്ല.
നടന് ബിനു അടിമാലി, ഉല്ലാസ് അരൂര്, മഹേഷ് എന്നിവരും ഇദ്ദേഹത്തോടൊപ്പം ഉണ്ടായിരുന്നു. പരിക്കേറ്റ ഇവരെ ആശുപത്രിയില് പ്രവേശിപ്പിച്ചു. ഇവരുടെ നില ഗുരുതരമല്ല.
നിരവധി സ്റ്റേജ് പ്രോഗ്രാമുകളില് നിറസാന്നിധ്യമായിരുന്ന കൊല്ലം സുധി ചാനലുകളിലും താരം തന്നെയായിരുന്നു. മഴവില് മനോരമയിലെ കോമഡി ഫെസ്റ്റുവലില് താരം എത്തിയത് മുതലാണ് തലവര മാറുന്നത്. പിന്നീടങ്ങോട് നിരവധി സ്റ്റേജുകള് താരത്തിന് ലഭിച്ചു. ഫ്ളവേഴ്സിലെ സ്റ്റാര് മാജിക്കിലെ നിറസാന്നിധ്യമാണ് താരം ഇപ്പോള്.
2015 ല് പുറത്തിറങ്ങിയ കാന്താരി എന്ന ചിത്രത്തിലൂടെയാണ് സിനിമാരംഗത്ത് എത്തുന്നത്. കട്ടപ്പനയിലെ ഋത്വിക് റോഷന്, കുട്ടനാടന് മാര്പാപ്പ, തീറ്റ റപ്പായി, വകതിരിവ്, ആന് ഇന്റര്നാഷ്ണല് ലോക്കല് സ്റ്റോറി, കേശു ഈ വീടിന്റെ നാഥന്, എസ്കേപ്പ്, സ്വര്ഗത്തിലെ കട്ടുറുമ്ബ് തുടങ്ങിയ ചിത്രങ്ങളില് വേഷമിട്ടിട്ടുണ്ട്. ഒരുപാട് കഷ്ടപ്പാടുകളിലൂടെ എത്തിയ താരം ഒരുപാട് സ്വപ്നങ്ങള് ബാക്കി വെച്ചാണ് യാത്രയാകുന്നത്.