തിരുവനന്തപുരം : സോഷ്യല് മീഡിയ ലോകം തന്നെ ഞെട്ടിച്ച സംഭവമായിരുന്നു മീഴ വിനീത് എന്ന കിളിമാനൂര് വെള്ളല്ലൂര് സ്വദേശി വിനീത് നടത്തിയ തട്ടിപ്പിന്റെ സംഭവം. വിനീതിന്റെ അറസ്റ്റും, പോലീസ് കസ്റ്റഡിയില് അകപ്പെട്ട വിനീതിന്റെ യഥാര്ത്ഥ വേഷവും എല്ലാം വാര്ത്തയായിരുന്നു. വീണ്ടും ഇതാ മീശ വിനീത് പുതിയൊരു കേസില് അകപ്പെട്ട വാര്ത്തയാണ് പുറത്ത് വരുന്നത്.
മടവൂര് സ്വദേശിയായ യുവാവിനെ ആക്രമിച്ച് തല അടിച്ചുപൊട്ടിച്ച കേസില് ആണ് ഇക്കുറി വിനീതിനെ പോലീസ് അറസ്റ്റ് ചെയ്തത്. പള്ളിക്കല് പൊലീസാണ് വിനീതിനെ അറസ്റ്റ് ചെയ്തിരിക്കുന്നത്. കേസില് മൂന്നാം പ്രതിയാണ് വിനീത്. ഇക്കഴിഞ്ഞ 16ാം തീയതിയാണ് സംഭവം. വിനീത് ഉള്പ്പെടെ നാലു പേര് രണ്ടു ബൈക്കുകളിലായി മടവൂരിലെത്തി യുവാവിനെ ആക്രമിച്ചു പരുക്കേല്പ്പിച്ചെന്നാണ് പരാതി. മറ്റു മൂന്നു പ്രതികളെ പിടികൂടാനായിട്ടില്ല.
സ്വര്ണാഭരണങ്ങള് കൈക്കലാക്കിയ ശേഷം തിരികെ നല്കാമെന്നു പറഞ്ഞ് യുവതിയെ വീട്ടില് വിളിച്ചു വരുത്തി ദേഹോപദ്രവം ഏല്പ്പിച്ച കേസില് ആഴ്ചകള്ക്കു മുന്പ് കിളിമാനൂര് പൊലീസ് വിനീതിനെ പിടികൂടിയിരുന്നു. ഇന്സ്റ്റഗ്രാമിലൂടെ പരിചയപ്പെട്ട് സൗഹൃദത്തിലായ തിരുവനന്തപുരം സ്വദേശിനിയായ യുവതിയില്നിന്നു പണയം വയ്ക്കുന്നതിനായി 6 പവന് സ്വര്ണാഭരണങ്ങള് ഒരു മാസം മുമ്പ് വിനീത് കൈക്കലാക്കിയിരുന്നു. കാലാവധി കഴിഞ്ഞതോടെ സ്വര്ണാഭരണങ്ങള് തിരികെ നല്കണമെന്ന് യുവതി വിനീതിനോട് ആവശ്യപ്പെട്ടു.
സ്വര്ണം തിരികെ നല്കാമെന്നു പറഞ്ഞ് വിനീത് യുവതിയെ വീട്ടിലേക്കു ക്ഷണിച്ചു. ഇതനുസരിച്ച് തിരുവനന്തപുരത്തുനിന്നും യുവതി കിളിമാനൂരില് എത്തി. ബസില് വന്നിറങ്ങിയ യുവതിയെ വിനീത് ബൈക്കില് കയറ്റി വെള്ളല്ലൂരിലെ സ്വന്തം വീട്ടില് എത്തിച്ച് ഭീഷണിപ്പെടുത്തുകയും ദേഹോപദ്രവം ഏല്പ്പിക്കുകയുമായിരുന്നു. തുടര്ന്ന്, യുവതി കിളിമാനൂര് പൊലീസില് പരാതി നല്കി.
കേസ് റജിസ്റ്റര് ചെയ്ത് അന്വേഷണം നടത്തിയ പൊലീസ് വിനീതിനെ പിടികൂടുകയായിരുന്നു. കാറും സ്കൂട്ടറും ഉള്പ്പെടെ മോഷണത്തിന് കന്റോണ്മെന്റ്, കല്ലമ്പലം, നഗരൂര്, മംഗലപുരം സ്റ്റേഷനുകളിലും അടിപിടി നടത്തിയതിനു കിളിമാനൂരിലും ഉള്പ്പെടെ വേറെയും പന്ത്രണ്ടോളം കേസുകള് വിനീതിന്റെ പേരിലുണ്ട്.