സ്റ്റോക്ക് ഓണ് ട്രെന്റ് : വര്ഷങ്ങള് ആയി സ്റ്റോക്ക് ഓണ് ട്രെന്റില് ആഘോഷങ്ങളുടെ പൊടിപൂരം തീര്ക്കുന്ന എസ്എംഎ ഈ പ്രാവശ്യവും പതിവ് തെറ്റിച്ചില്ല. സ്റ്റോക്ക് ഓണ് ട്രെന്റ് മലയാളികള്ക്ക് ഒരു പുത്തനുണര്വും നല്കിയാണ് എസ്എംഎയുടെ ക്രിസ്മസ് പുതുവത്സര പരിപാടികള് പൂര്ത്തിയാക്കിയത്.
കഴിഞ്ഞ ശനിയാഴ്ച നാല് മണിയോടെ എസ് എം എ യുടെ 'നക്ഷത്ര നിലാവ്' എന്ന് പേരിട്ടിരിക്കുന്ന ക്രിസ്മസ് പുതുവത്സര പരിപാടിക്ക് തുടക്കം കുറിച്ചത്. നാട്ടില് നിന്നും എത്തിയ പ്രശസ്ത കൊമേഡിയന് ആയ ഉല്ലാസ് പന്തളം ഉള്പ്പെടുന്ന ടീം ആയിരുന്നു ഇപ്രാവശ്യത്തെ പരിപാടിയുടെ മുഖ്യ ആകര്ഷണം. ക്രിസ്മസിന്റെ എല്ലാ ഓര്മ്മകളും ഉണര്ത്തി കരോള് ഗാനവുമായി തുടക്കം.
ക്രിസ്മസിന്റെ സന്ദേശം വിളിച്ചറിയിച്ച കുട്ടികളുടെ നേറ്റിവിറ്റി പ്രോഗ്രാമോടെയായിരുന്നു തുടക്കം കുറിച്ചത്. ക്രിസ്മസ് പാപ്പയായി എത്തിയ ആബേല് വിജി അസ്സോസിയേഷന് ഭാരവാഹികളെ സ്റ്റേജിലേക്ക് ക്ഷണിച്ചതോടെ ഔപചാരിക പൊതുസമ്മേളനത്തിലേക്ക്. സിജിന് ജോസ് ആകശാല ആലപിച്ച പ്രാത്ഥനാഗീതത്തോടെ പൊതുസമ്മേളനത്തിന് തുടക്കമായി.
പ്രസിഡന്റ് റോയി ഫ്രാന്സിസിന്റെ അധ്യക്ഷതയില് പൊതുസമ്മേളനത്തിന് ആരംഭം കുറിച്ചു. ക്രിസ്മസ് പുതുവത്സര പരിപാടിയിലേക്ക് കടന്നു വന്ന സ്റ്റോക്ക് മലയാളികളെ സ്വാഗതം ചെയ്ത് ജനറല് സെക്രട്ടറി ബേസില് ജോയി. ചുരുങ്ങിയ വാക്കുകളില് അധ്യക്ഷ പ്രസംഗം നടത്തി പ്രസിഡന്റ് റോയി ഫ്രാന്സിസ്. തുടന്ന് തിരിതെളിച്ചു ഉത്ഘാടനവും നിര്വ്വഹിച്ചപ്പോള് വേദിയില് അസ്സോസിയേഷന് ട്രെഷറര് ബെന്നി പാലാട്ടി, വൈസ് പ്രസിഡന്റുമാരായ ജേക്കബ് വര്ഗീസ്, രാജലക്ഷ്മി രാജന്, ജോയിന്റ് സെക്രട്ടറിമാരായ ലീന ഫെനിഷ്, വിനു ഹോര്മിസ് എന്നിവര്ക്കൊപ്പം ക്രിസ്മസ് പുതുവത്സര പരിപാടിയുടെ കണ്വീനര്മ്മരായ അബിന് ബേബി, അലീന വിജി എന്നിവരും ക്രിസ്മസ് പാപ്പയായി ആബേല് വിജി എന്നിവരും സന്നിഹിതരായിരുന്നു. തുടര്ന്ന് കഴിഞ്ഞ ഓണാഘോഷപരിപാടിയില് ചെണ്ടമേളവുമായി കടന്നു വന്ന കുട്ടികള്ക്കായി സമ്മാനദാനം. തുടര്ന്ന് ട്രഷറര് ബെന്നി പാലാട്ടിയുടെ നന്ദി പ്രകടനത്തോടെ ഔപചാരിക സമ്മേളനത്തിന് തിരശീല വീണു.
സ്റ്റോക്കിലെ ഇരുത്തം വന്ന അവസരത്തിനൊത്ത്, ആവശ്യം മനസ്സിലാക്കി, സ്വതസിദ്ധമായ ശൈലിയില് പ്രേക്ഷകരിലേക്കു ആവേശമെത്തിക്കുന്ന ബാന്ഡ് 6 നഴ്സും അവതാരികയുമായ സ്നേഹ റോയിസണ്. കരോള് ഗാനവുമായി അസ്സോസിയേഷനിലെ പാട്ടുകാര് കൂടി എത്തിയപ്പോള് പരിപാടി കൊഴുത്തു. എസ് എം എ ഡാന്സ് സ്കൂളിലെ കുട്ടികള് ഉള്പ്പെടെ അതിവിപുലമായ കലാവിരുന്നായിരുന്നു. വ്യത്യസ്തതയുമായി അജി മംഗലത്, അബിന് ബേബി എന്നിവരുടെ നേതൃത്വത്തില് സ്റ്റേജില് എത്തിയ കുള്ളന് ഡാന്സ് ശ്രദ്ധ നേടി.
ഏഴ് മണിയോടെ ഉല്ലാസ് പന്തളവും ടീമും അരങ്ങില് വന്നതോടെ ചിരിയുടെ മാലപ്പടക്കം പൊട്ടുകയായിരുന്നു. ഉല്ലാസിന്റെ തനതായ ശൈലിയില് പ്രകടനം നടത്തിയതോടെ ചിരിയുടെ അലയൊലികള് മുഴങ്ങി കേള്ക്കുമ്പോള് തന്നെ പാട്ടിന്റെ ഈണങ്ങള് കോ ഓപ്പറേറ്റീവ് ഹാളില് ഒത്തുകൂടിയ സ്റ്റോക്ക് മലയാളികള് ഏറ്റെടുക്കുകയായിരുന്നു. ഒപ്പം നാവില് രുചിയേറും വിഭവ സമൃദ്ധമായ ഭക്ഷണവും വിളമ്പി വയറും നിറച്ചു. രാത്രി 9:30 യോടെ സമാപനം കുറിക്കുമ്പോള് അഭിനന്ദിക്കുന്നതില് പിശുക്ക് കാണിക്കാതെ സ്റ്റോക്ക് മലയാളികള് ഒന്നടക്കം അതിഗംഭീരം എന്ന് പറയുകയായിരുന്നു. സന്തോഷത്തില് കൂപ്പു കയ്യോടെ അസോസിയേഷനും.