കോവിഡിനുശേഷം ഒരേസമയം വിലക്കയറ്റത്തിന്റെയും വരുമാനക്കുറവിന്റെയും കുതിച്ചുയർന്ന ജീവിതച്ചെലവിന്റെയും വർഷങ്ങളാണ് കടന്നുവന്നത്. എന്നാൽ രണ്ടുവർഷത്തിനിപ്പുറം യുകെയിലെ സാധാരണ കുടുംബങ്ങൾക്ക് അൽപമെങ്കിലും ആശ്വാസമായി, ഗാർഹിക വൈദ്യുതിയുടെയും ഗ്യാസിന്റെയും വില മാസങ്ങൾക്കുള്ളിൽ കുത്തനെ കുറയുമെന്ന് പ്രവചിക്കപ്പെടുന്നു.
ശരാശരി വീടുകളിൽ സാധാരണ അളവിൽ ഗ്യാസും വൈദ്യുതിയും ഉപയോഗിക്കുമ്പോൾ, വാർഷിക ഗാർഹിക ബിൽ ഏപ്രിൽ മാസത്തോടെ 1,928 പൗണ്ടിൽ നിന്ന് 1,620 പൗണ്ടായി കുറയുമെന്ന് പ്രതീക്ഷിക്കുന്നു.
ഗ്യാസിനും വൈദ്യുതിയ്ക്കും രണ്ടുവർഷത്തെ കുത്തനെ ഉയർന്ന വില സഹിച്ച വീട്ടുകാർക്ക്, വേനൽക്കാലത്ത് ഇനിയും കൂടുതൽ ഇടിവ് ഉണ്ടായേക്കാമെന്ന വിശകലന വിദഗ്ധരുടെ പ്രവചനം നൽകുന്ന ആശ്വാസം ചെറുതല്ല.
ഉത്പന്ന വിപണിയുടെയും വിലവ്യതിയാനത്തിന്റെയും നിരീക്ഷകരായ കോൺവാൾ ഇൻസൈറ്റിൻ്റെ പ്രവചനമനുസരിച്ച് ഏപ്രിലിൽ ഗാർഹിക എനർജി വില 16% കുറയും,
യുഎസിൽ നിന്നുള്ള ദ്രവീകൃത പ്രകൃതിവാതകത്തിൻ്റെ വിതരണവും ഏഷ്യൻ വിപണിയിലെ കുറഞ്ഞ വിലയും ആഗോള മൊത്തവിപണിയിലെ ഉത്പന്ന ലഭ്യതയും വില കുറയാൻ കാരണമായി
ഇതിനിടെ ചെങ്കടലിൽ ബ്രിട്ടീഷ് - യു.എസ്, യൂറോപ്യൻ കപ്പലുകൾക്കുനേരെ ഹൂതികൾ നടത്തുന്ന ആക്രമണം ഈ പ്രവചനത്തിന്റെ സാധുതയെ സംശയനിഴലിലും ആക്കുന്നു.
"നല്ലരീതിയിലുള്ള ഉത്പന്ന ലഭ്യതയും സ്റ്റോക്കുകളും വിതരണവും മൊത്തവ്യാപാര വിപണിയിലെ സ്ഥിരത നിലനിർത്തുന്നു. ഇത് തുടരുകയാണെങ്കിൽ, ഉക്രെയ്നിലെ റഷ്യൻ അധിനിവേശത്തിനുശേഷം എനർജി ചാർജുകൾ ഏറ്റവും താഴ്ന്നനിലയിലാകുന്നത് കാണാൻ കഴിയും." കോൺവാൾ ഇൻസൈറ്റിൻ്റെ പ്രിൻസിപ്പൽ കൺസൾട്ടൻ്റ് ക്രെയ്ഗ് ലോറി പറഞ്ഞു.
വില കുറഞ്ഞാലും ഗാർഹിക എനർജി ബില്ലുകൾ പ്രതിസന്ധിക്ക് മുമ്പുള്ളതിനേക്കാൾ കൂടുതലായിരിക്കും. വിപണിയിലെ വിലനിയന്ത്രകരായ ഓഫ്ജെം വർഷത്തിൻ്റെ രണ്ടാംപാദത്തിൽ അതിൻ്റെ വിലപരിധി നിശ്ചയിക്കുന്നത് ഒരുമാസം കൂടി കഴിഞ്ഞാണ്.
ഓഫ്ജെമിൻ്റെ വിലപരിധിക്ക് കീഴിൽ, ഇംഗ്ലണ്ട്, വെയിൽസ്, സ്കോട്ട്ലൻഡ് എന്നിവിടങ്ങളിൽ സാധാരണ അളവിൽ ഗ്യാസും വൈദ്യുതിയും ഉപയോഗിക്കുന്ന ഒരു ശരാശരി കുടുംബത്തിൻ്റെ വാർഷിക ബിൽ ഡയറക്ട് ഡെബിറ്റ് വഴി അടയ്ക്കുന്നത് നിലവിൽ £1,928 ആണ്.
എന്നിരുന്നാലും, ഉപഭോക്താക്കൾ കൂടുതൽ ഉപയോഗിക്കുകയാണെങ്കിൽ, കൂടുതൽ പണം നൽകേണ്ടിവരും, കാരണം ഓരോ യൂണിറ്റിനുമാണ് വില പരിധി നിശ്ചയിച്ചിരിക്കുന്നത്. അല്ലാതെ ആകെ വരുന്ന ബില്ലിലല്ല പരിധി നിയന്ത്രണം.
ഗ്യാസിൻ്റെ വില ഇപ്പോൾ ഒരു കിലോവാട്ട് മണിക്കൂറിന് (kWh) 7p ആണ്, വൈദ്യുതി kWh-ന് 29p ആണ്.
വിശകലന വിദഗ്ധരുടെ പ്രവചനം ശരിയാകുകയാണെങ്കിൽ, സാധാരണ ഉപയോഗത്തിനുള്ള വാർഷിക ബിൽ 16% ഇടിഞ്ഞ് ഏപ്രിലിൽ £1,620 ആയി കുറയും.
അതുപോലെ ജൂലൈയിൽ ഇതുവീണ്ടും ഇടിഞ്ഞ് പ്രതിവർഷ നിരക്ക് 1,497 പൗണ്ടായി കുറയുമെന്നും പിന്നീട് വർധിച്ച് ഒക്ടോബറിൽ പ്രതിവർഷം 1,541 പൗണ്ടായി ഉയരുമെന്നും പ്രവചിക്കപ്പെടുന്നു.
അതേസമയം ചെങ്കടലിലെ ഹൂതി ആക്രമണവും അതുമൂലം എണ്ണ, ചരക്കു കപ്പലുകൾക്ക് സുഗമമായി ചരക്കുകൾ എത്തിക്കാൻ കഴിയാത്തതും ആശങ്കയുണർത്തി മൊത്ത എണ്ണവിലയിൽ അനിശ്ചിതത്വം തുടരുന്നു. എങ്കിലും ഇതുവരെ അത് വിലയെ ബാധിച്ചിട്ടില്ല.
ചില കുടുംബങ്ങൾ, പ്രത്യേകിച്ച് സാമ്പത്തികമായി പിന്നോക്കം നില്കുന്നവർ, ഗവൺമെൻ്റിൻ്റെ സാമ്പത്തിക പിന്തുണ ഉണ്ടായിരുന്നിട്ടുകൂടി ശരാശരി ബില്ലുകൾ പോലും അടയ്ക്കാൻ പാടുപെടുന്നു.
ഗാർഹിക എനർജി ബിൽ താങ്ങാൻ കഴിയുന്നില്ലെങ്കിൽ താഴെപ്പറയുന്ന കാര്യങ്ങൾ ചെയ്യുക:
നിങ്ങളുടെ ഡയറക്ട് ഡെബിറ്റ് പരിശോധിക്കുക:
ഉപഭോക്താക്കളുടെ പ്രതിമാസ പേയ്മെൻ്റ് , അവരുടെ ഒരുവർഷത്തെ ഊർജ്ജ ഉപയോഗത്തെ കണക്കാക്കിയുള്ളതാണ്. യഥാർത്ഥ ഉപയോഗം കണക്കാക്കിയതിലും കുറവാണെങ്കിൽ വിതരണക്കാരന് നിങ്ങളുടെ ബിൽ കുറയ്ക്കാനാകും.
നിങ്ങൾക്ക് പണമടയ്ക്കാൻ കഴിയുന്ന സ്കീമിലേക്ക് മാറുക:
നിങ്ങൾക്ക് നേരിട്ടുള്ള ഡെബിറ്റ് അല്ലെങ്കിൽ ത്രൈമാസ പേയ്മെൻ്റുകൾ അടയ്ക്കാൻ കഴിയുന്നില്ലെങ്കിൽ, താങ്ങാനാകുന്നതിനെ അടിസ്ഥാനമാക്കി "അടയ്ക്കാൻ കഴിയുന്ന പ്ലാൻ" നൽകാൻ വിതരണക്കാരനോട് ആവശ്യപ്പെടുക.
നിങ്ങൾക്ക് അർഹതയുള്ളത് ക്ലെയിം ചെയ്യുക:
നിങ്ങൾക്ക് അവകാശപ്പെട്ട എല്ലാ ആനുകൂല്യങ്ങളും ക്ലെയിം ചെയ്യുന്നുണ്ടോയെന്ന് പരിശോധിക്കുക. ഇതിനായി സ്വതന്ത്ര MoneyHelper വെബ്സൈറ്റിന് ഫലപ്രദമായ ഒരു ഗൈഡ് സംവിധാനമുള്ളത് പരിശോധിച്ച് കഴിയുംവിധം പ്രയോജനപ്പെടുത്തുക.