ശരീരത്തില് വീഴുന്ന ഓരോ വെള്ളവും ഈ യുവതിക്ക് വേദനയാണ്. പറയുന്നതിലും അത്രയും കഠിനമായ വേദന. ശരീരത്തിലെ വിയര്പ്പ് തുള്ളി പോലും വില്ലനാകുന്ന നിമിഷങ്ങള് ഉണ്ട്.. പറഞ്ഞ് വരുന്നത് യുഎസിലെ സൗത്ത് കരോലിനയില് നിന്നുള്ള ലോറന് മോണ്ടെഫസ്കോ എന്ന യുവതിയുടെ അനുഭവമാണ്. 22-കാരിയായ ലോറന് വെള്ളം അലര്ജ്ജിയാണ്. പറഞ്ഞാലും കേട്ടാലും വിശ്വസം വരാത്ത മെഡിക്കല് ലോകത്ത് തന്നെ അപൂര്വ്വങ്ങളില് അപൂര്വ്വമായ രോഗമുള്ള യുവതി.
ശരീരത്തില് വെള്ളം തൊടുമ്പോള് തന്നെ ശക്തമായ അലര്ജി അനുഭവപ്പെടും ലോറന്. 'അക്വാജെനിക് അര്ട്ടികാരിയ' എന്ന രോഗാവസ്ഥയാണ് യുവതിക്ക് പ്രാണവേദന നല്കുന്ന അസുഖം.
ലോറന്റെ ശരീരത്തില് വെള്ളം തട്ടുമ്പോള് ആ ഭാഗത്തെ തൊലി ചുവന്ന് തടിക്കുയ്കയും ചുണങ്ങ് പോലെ ചൊറിഞ്ഞ് പൊട്ടുകയും ചെയ്യും. ഇതാണ് ആദ്യത്തെ ലക്ഷണം. കുളിക്കുമ്പോഴോ മറ്റെന്തെങ്കിലും തരത്തിലോ വെള്ളവുമായി സമ്പര്ക്കമുണ്ടാകുന്നതോടെ ശരീരത്തില് ചൊറിച്ചില് അനുഭവപ്പെടും. ഇത് ഏതാണ്ട് ഒരു മണിക്കൂറോളം നേരം തുടരുമെന്നും ലോറന് പറയുന്നു. ഇതുവരെ 37 പേര്ക്ക് മാത്രമാണ് ഈ രോഗം റിപ്പോര്ട്ട് ചെയ്തിട്ടുള്ളുവെന്നാണ് ആരോഗ്യരംഗത്തെ വിദഗ്ധര് പറയുന്നത്.
വെള്ളവുമായി സമ്പര്ക്കം ഉണ്ടാകുന്നതോടെ ചര്മത്തിന്റെ ഉപരിതലത്തിന് താഴെയായി ശക്തമായ ചൊറിച്ചില് അനുഭവപ്പെടും. ചൊറിയാതിരിക്കാന് പരമാവധി ശ്രമിക്കുമെങ്കിലും അത് സഹിക്കാവുന്നതിലും അപ്പുറമാണ്. കൂടുതല് അസ്വസ്ഥത അനുഭവപ്പെടുന്ന സമയത്ത താന് നഖം വച്ച് അമര്ത്താറാണെന്നും ഈ സമയം വേദന കാരണം ചൊറിച്ചില് അറിയില്ല. 12-ാം വയസിലാണ് ആദ്യമായി ഈ പ്രശ്നം തിരിച്ചറിഞ്ഞതെന്നും ലോറന് കൂട്ടിച്ചേര്ത്തു.
ആധുനിക വൈദ്യശാസ്ത്രത്തില് ഈ വിചിത്രമായ രോഗാവസ്ഥയ്ക്ക് ചികിത്സയില്ല. പരമാവധി വെള്ളവുമായി സമ്പര്ക്കം ഒഴിവാക്കുന്ന എന്നത് മാത്രമാണ് പരിഹാരം. അതുകൊണ്ടുതന്നെ കുറച്ചു വെള്ളവും തുണിയും ഉപയോഗിച്ച് വേഗത്തില് കുളിച്ചുവെന്ന് വരുത്തുന്നതാണ് ഇവരുടെ രീതി. വേദനയും അസ്വസ്ഥയും കാരണം കുളിക്കാതിരിക്കുക എന്നത് തനിക്ക് സ്വീകാര്യമായ കാര്യമല്ലെന്നും ലോറന് കൂട്ടിച്ചേര്ത്തു.
സോഷ്യല് മീഡിയയില് തന്റെ പ്രശ്നം പങ്കുവച്ചതോടെ ഇതേ രോഗാവസ്ഥയിലൂടെ കടന്നുപോകുന്നവരുടെ കമ്മ്യൂണിറ്റിയെ കണ്ടെത്താനും യുവതിക്കായി. മറ്റ് രോഗബാധിതരെ കണ്ടെത്താനും മറ്റുള്ളവര്ക്കും തന്നെപ്പോലെ ബുദ്ധിമുട്ടുകള് ഉണ്ടെന്നതും മനസിലായതോടെ ഈ പ്രശ്നത്തെ ആത്മവിശ്വാസത്തോടെ ഒന്നിച്ച് നേരിടാനാകുമെന്നും യുവതി പറഞ്ഞു.