ചാവക്കാട് നഗരമധ്യത്തില് കെട്ടിടത്തിന് തീപിടിച്ച് വന് നാശനഷ്ടം സംഭവിച്ചു. ഇന്ന് പുലര്ച്ചെ ഒന്നരയോടെ ചാവക്കാട് ട്രാഫിക് ഐലന്ഡ് ജങ്ഷനു സമീപത്തെ കുന്നംകുളം റോഡിലെ ഓടിട്ട കെട്ടിടത്തില് അഗ്നിബാധയുണ്ടാവുകയായിരുന്നു.
കെട്ടിടത്തില് പ്രവര്ത്തിച്ചിരുന്ന അസീസ് ഫൂട്ട്വെയര്, ടിപ്പ് ടോപ്പ് ഫാന്സി ഷോപ്പ് എന്നീ കടകളും മറ്റൊരു തുണിക്കടയും കത്തിനശിച്ചു. ലക്ഷകണക്കിന് രൂപയുടെ നാശനഷ്ടമുണ്ടായിട്ടുണ്ട്. കടകളില് നിന്നും വൈദ്യുതി കേബിളുകളിലേക്കും തീ പടര്ന്നു കയറി.
കെട്ടിടത്തിന്റെ മുകള് ഭാഗത്തും തീപിടിത്തമുണ്ടായി. കെട്ടിടത്തിന് തൊട്ടടുത്തുള്ള വൈദ്യുതി ട്രാന്സ്ഫോര്മറിലെ കേബിളുകളും കത്തിനശിച്ചെങ്കിലും ട്രാന്സ്ഫോര്മറിലേക്ക് തീ പടരാതിരുന്നതിനാല് വലിയ അപകടം ഒഴിവായി.
തീ പിടിച്ചതിന്റെ കാരണം വ്യക്തമല്ല. കെട്ടിടത്തിനുള്ളില് നിന്നും തീ ആളി കത്തുന്നത് ശ്രദ്ധയില്പ്പെട്ട നാട്ടുകാര് അഗ്നിശമന സേനയെ വിവരം അറിയിച്ചു. ഗുരുവായൂര്, കുന്നംകുളം എന്നിവിടങ്ങളില് നിന്നായി അഗ്നിരക്ഷാസനേയുടെ എട്ട് യൂണിറ്റുകളെത്തിയാണ് പുലര്ച്ചെ നാലോടെ തീ നിയന്ത്രണവിധേയമാക്കിയത്.
നാട്ടുകാരും തീ അണക്കാന് രംഗത്തിറങ്ങി. തീപിടിത്തകാരണം വ്യക്തമായിട്ടില്ല. ആദ്യം പ്ലാസ്റ്റിക് ഉരുകുന്ന മണവും പുകയുമാണ് ഉണ്ടായതെന്നും പിന്നീട് തീ ആളിക്കത്തുകയായിരുന്നെന്നും നാട്ടുകാര് പറഞ്ഞു