ലണ്ടൻ: സ്വന്തം ലേഖകൻ

2023-ല്‍ ബ്രിട്ടീഷ് പൊതുജനങ്ങള്‍ 13.9 ബില്യണ്‍ പൗണ്ട് ചാരിറ്റിക്കായി സംഭാവന ചെയ്തുവെന്ന് റിപ്പോര്‍ട്ട്. രാജ്യത്തെ ഏറ്റവും സമ്പന്നമായ ചില പ്രദേശങ്ങളിലെ ആളുകള്‍ ഏറ്റവും ഉദാരമതികളാണെന്നും റിപ്പോര്‍ട്ട് വെളിപ്പെടുത്തുന്നു.  2022 ലെ കണക്കിനേക്കാള്‍ 9 ശതമാനത്തിന്റെ വര്‍ദ്ധനവാണ് രേഖപ്പെടുത്തിയത്. 2022ല്‍  ഇത് 12.7 ബില്യണ്‍ പൗണ്ട ആയിരുന്നു. ശരാശരി പ്രതിമാസ സംഭാവനകള്‍ ഏകദേശം 40% വര്‍ദ്ധിച്ച് £65 ല്‍ എത്തി.

ചാരിറ്റീസ് എയ്ഡ് ഫൗണ്ടേഷന്‍ (സിഎഎഫ്) പുറത്തു വിട്ട റിപ്പോര്‍ട്ടില്‍ യുകെയിലെ ഏറ്റവും ദരിദ്രമായ ചില പ്രദേശങ്ങള്‍ കഴിഞ്ഞ വര്‍ഷം കുടുംബ വരുമാനത്തിന്റെ അനുപാതമായി ജീവകാരുണ്യ പ്രവര്‍ത്തനങ്ങള്‍ക്ക് ഏറ്റവും കൂടുതല്‍ പണം നല്‍കിയതായും കാണിക്കുന്നു. 13,164 സാമ്പിള്‍ സൈസ് ഉള്ള ഒരു ഓണ്‍ലൈന്‍ സര്‍വേയില്‍ നിന്നാണ് റിപ്പോര്‍ട്ട് തയ്യാറാക്കിയത്.

നോര്‍ത്തേണ്‍ അയര്‍ലണ്ടിലെ ഏറ്റവും അവശതയുള്ള ഭാഗങ്ങളിലൊന്നായ ബെല്‍ഫാസ്റ്റ് വെസ്റ്റിലെ ജനങ്ങളില്‍ നാലിലൊന്ന് (28.5%) കുട്ടികളും ദാരിദ്ര്യത്തിലാണ് ജീവിക്കുന്നത്. എങ്കില്‍ പോലും അവരുടെ കുടുംബ വരുമാനത്തിന്റെ ശരാശരി 2.2% അവര്‍ നല്ല കാര്യങ്ങള്‍ക്കായി നല്‍കി.

ന്യൂ ലണ്ടന്‍ മണ്ഡലത്തിലെ സമ്പന്ന പ്രദേശമായ കെന്‍സിംഗ്ടണും ബെയ്സ്വാട്ടറും ജീവകാരുണ്യ പ്രവര്‍ത്തനങ്ങള്‍ക്ക് രണ്ടാം സ്ഥാനത്താണ്. ഏറ്റവും ഉദാരമായ മണ്ഡലം ഷെഫീല്‍ഡ് ഹാലം ആയിരുന്നു, അവിടെ താമസക്കാര്‍ 3.2% നല്‍കി.

അതേസമയം, ചാരിറ്റിക്ക് സ്ഥിരമായി സംഭാവന നല്‍കുന്ന ആളുകളുടെ എണ്ണം 2019 ല്‍ 65 ശതമാനത്തില്‍ നിന്ന് 2023 ല്‍ 10 ല്‍ ആറില്‍ (58%) ആയി കുറഞ്ഞുവെന്ന് റിപ്പോര്‍ട്ട് എടുത്തുകാണിക്കുന്നു. ദാതാക്കളുടെ ശരാശരി സംഭാവനകള്‍ വര്‍ധിച്ചതുകൊണ്ടാണ് മൊത്തം കണക്ക് ഉയര്‍ന്നതെന്ന് CAF പറഞ്ഞു.

കോവിഡ് -19 പാന്‍ഡെമിക്, ജീവിതച്ചെലവ് പ്രതിസന്ധി എന്നിവ ചാരിറ്റികളില്‍ കാര്യമായ സമ്മര്‍ദ്ദം ചെലുത്തിയെന്നും ചാരിറ്റി കൂട്ടിച്ചേര്‍ത്തു.

എഴുപത്തിയഞ്ച് ശതമാനം ബ്രിട്ടീഷ് മുതിര്‍ന്നവരും കഴിഞ്ഞ 12 മാസത്തിനുള്ളില്‍ സംഭാവന നല്‍കല്‍, സന്നദ്ധപ്രവര്‍ത്തനം, സ്പോണ്‍സര്‍ ചെയ്യല്‍ എന്നിവയുള്‍പ്പെടെ ഒരു ചാരിറ്റി പ്രവര്‍ത്തനമെങ്കിലും ചെയ്തു. ശരാശരി, സ്‌കോട്ട്‌ലന്‍ഡ്, വെയില്‍സ്, വടക്കന്‍ അയര്‍ലന്‍ഡ് എന്നിവിടങ്ങളിലെ നിയോജക മണ്ഡലങ്ങള്‍ വരുമാനത്തിന്റെ അനുപാതമായി ഇംഗ്ലണ്ടിലേതിനേക്കാള്‍ കൂടുതല്‍ നല്‍കിയെന്നും റിപ്പോര്‍ട്ട് വെളിപ്പെടുത്തി.