തൃശൂര് : ടിക്കറ്റെടുക്കാതെ യാത്ര ചെയ്തതിന് പഴയടക്കാന് പറഞ്ഞ ടിടിഇയെ ട്രെയിനില് നിന്നും തള്ളിയിട്ട് കൊലപ്പെടുത്തിയ സംഭവത്തില് പ്രതിയുമായി പൊലീസ് ഇന്ന് തെളിവെടുപ്പ് നടത്തും. കഴിഞ്ഞ ദിവസം രാത്രിയാണ് സംഭവം നടന്നത്.
കേസില് പ്രതിയായ അന്യസംസ്ഥാന തൊഴിലാളി രജനീകാന്തിനെ പൊലീസ് ഇന്നലെ തന്നെ കസ്റ്റഡിയില് എടുത്തിരുന്നു. പിഴ അടയ്്ക്കാന് പറഞ്ഞതിന്റെ വൈരാഗ്യത്തിലാണ് പ്രതി ടിടിഇ വിനോദിനെ ആക്രമിച്ചതെന്നാണ് പുറത്ത് വരുന്ന വിവരം. സംഭവം നടക്കുമ്പോള് ഇയാള് അമിതമായി മദ്യപിച്ചിരുന്നതായി ദൃക്സാക്ഷികള് പറഞ്ഞു.
അപ്രതീക്ഷിതമായിരുന്നു ഇയാളുടെ ആക്രമണം. പിഴയടയ്ക്കാന് ആവശ്യപ്പെട്ടപ്പോള് ഇയാള് ടിടിഇയുടെ കുടുംബത്തെയും അമ്മയേയും സഹോദരിയേയുമെല്ലാം ചേര്ത്ത് ചീത്ത പറഞ്ഞതായും ദൃക്സാക്ഷികള് പറയുന്നു.
തൃശൂര് എത്തിയപ്പോള് ആണ് ടിക്കറ്റ് ചോദിച്ച് ടിടിഇ ആയ വിനോദ് എത്തുന്നത്. എന്നാല് രജനീകാന്തിന്റെ കയ്യില് ടിക്കറ്റ് ഇല്ലായിരുന്നു. തുടര്ന്ന് വിനോദ് 1000 രൂപ പിഴയടയ്ക്കാന് ആവശ്യപ്പെട്ടു. എന്നാല് തയ്യാറാകാതെ വന്നപ്പോള് വിനോദ് റെയില്വേ പോലീസിനെ വിളിക്കുന്നത് ശ്രദ്ധയില് പെട്ട രജനീകാന്ത വിനോദ് വാതിലിന് അരികിലേക്ക് ചെന്നപ്പോള് ചവിട്ടി വീഴ്ത്തുകയായിരുന്നെന്നാണ് ദൃക്സാക്ഷി മൊഴികളില് പറയുന്നത്. വിനോദിന്റെ മൃതദേഹം പോസ്റ്റുമാര്ട്ടം നടപടികള്ക്ക് ശേഷം ഇന്ന് ബന്ധുക്കള്ക്ക് വിട്ടുകൊടുക്കും.