കല്ലുവാതുക്കല് ഊരായ്കോട് നവജാത ശിശുവിനെ കരിയിലക്കൂനയില് ഉപേക്ഷിച്ചു കൊന്ന കേസിലെ പ്രതി രേഷ്മയെ പൊലീസ് ജയിലിലെത്തി ചോദ്യം ചെയ്തു. ഫെയ്സ്ബുക്ക് കാമുകന് ചമഞ്ഞ് ബന്ധുക്കളായ ആര്യയും ഗ്രീഷ്മമയും കബളിപ്പിച്ചതായിരുന്നുവെന്ന വിവരം പൊലീസ് സംഘം രേഷ്മയെ അറിയിച്ചു. വിവരമറിഞ്ഞതോടെ അന്വേഷണ ഉദ്യോഗസ്ഥരുടെ മുന്നില് രേഷ്മ പൊട്ടിക്കരഞ്ഞു.
ഗ്രീഷ്മയുടെ ആണ്സുഹൃത്തിനെപ്പറ്റി ഭര്ത്താവ് വിഷ്ണുവിനോടും മറ്റു ബന്ധുക്കളോടും പറഞ്ഞിരുന്നു.അതിലുള്ള വൈരാഗ്യമാകാം തന്നെ കബളിപ്പിക്കാന് കാരണമെന്ന് രേഷ്മ മൊഴി നല്കി. രേഷ്മയുടെ ഭര്ത്താവിന്റെ സഹോദരിയുടെ മകളാണ് ഗ്രീഷ്മ. അതെ സമയം തനിക്ക് അനന്തു എന്ന കാമുകന് ഉണ്ടെന്നു തന്നെയാണ് രേഷ്മ ഇപ്പോഴും പറയുന്നത്.
കാമുകനെ കാണാന് താന് വര്ക്കലയില് പോയിരുന്നു എന്നും രേഷ്മ പൊലീസിനോട് പറഞ്ഞു. എന്നാല് സുഹൃത്തിനെ കാണാനാകാതെ മടങ്ങിയെന്നും രേഷ്മ പറഞ്ഞു. അതിനുശേഷമായിരിക്കാം ആര്യയും ഗ്രീഷ്മയും ചേര്ന്ന് തന്നെ കബളിപ്പിക്കാന് തുടങ്ങിയതെന്നും രേഷ്മ പറഞ്ഞു. ഗര്ഭിണിയായിരുന്ന കാര്യം ചാറ്റിംഗില് സൂചിപ്പിച്ചില്ലെന്നും രേഷ്മ പോലീസിന് മൊഴി നല്കി.
അടുത്തിടെ ഇത്തിക്കരയാറ്റില് ചാടി ജീവനൊടുക്കിയ ആര്യയും ഗ്രീഷ്മയുമാണ് വ്യാജ അക്കൗണ്ട് വഴി കാമുകനെന്ന പേരില് രേഷ്മയെ കബളിപ്പിച്ചത്. അനന്തു എന്ന പേരില് വ്യാജമായി സൃഷ്ടിച്ച പ്രൊഫൈല് വഴിയായിരുന്നു ഇരുവരും ചാറ്റ് ചെയ്തിരുന്നത്. ഈ അക്കൗണ്ടില് നിന്ന് രേഷ്മയ്ക്ക് കോളുകളൊന്നും വന്നിരുന്നില്ല.
രേഷ്മ ഗര്ഭിണിയാണെന്ന് മനസിലാക്കി കുഞ്ഞിനെ ഉപേക്ഷിക്കാന് പറഞ്ഞത് യുവതികളാണെന്നാണ് പോലീസ് കണ്ടെത്തല്. രേഷ്മയെ കബളിപ്പിക്കുന്ന വിവരം ഗ്രീഷ്മ മറ്റൊരു സുഹൃത്തിനോട് വെളിപ്പെടുത്തിയിരുന്നു. ഈ സുഹൃത്താണ് പോലീസിന് വിവരങ്ങള് കൈമാറിയത്.
കുഞ്ഞിനെ കൊലപ്പെടുത്തിയ കേസില് രേഷ്മ അറസ്റ്റിലായതിന് പിന്നാലെ ആര്യയെയും ഗ്രീഷ്മയെയും ചോദ്യം ചെയ്യാന് പോലീസ് വിളിപ്പിച്ചിരുന്നു. ഇതിന് പിന്നാലെയാണ് ഇരുവരും ജീവനൊടുക്കിയത്.
കോടതിയുടെയും ജയില് അധികൃതരുടെയും അനുവാദം വാങ്ങിയാണ് പാരിപ്പള്ളി എസ്.എച്ച്.ഒയുടെ നേതൃത്വത്തിലുള്ള പൊലീസ് സംഘം ചോദ്യംചെയ്യാന് ജയിലിലെത്തിയത്.ബന്ധുക്കള് അറിയാതെ കുഞ്ഞിനെ ഒറ്റക്ക് ഉപേക്ഷിക്കാന് രേഷ്മക്ക് കഴിയില്ലെന്ന വിശ്വാസത്തിലുറച്ചാണ് പൊലീസ് അന്വേഷണം പുരോഗമിക്കുന്നത്.
ഈ വര്ഷം ആദ്യമാണ് കൊല്ലം കല്ലുവാതുക്കലില് നവജാതശിശുവിനെ കരിയിലക്കൂട്ടത്തില് പൊക്കിള്കൊടി പോലും മുറിച്ചുമാറ്റാത്ത നിലയില് ഉപേക്ഷിച്ച നിലയില് കണ്ടെടുത്തത്. കുഞ്ഞിനെ പിന്നീട് തിരുവനന്തപുരം എസ്.എ.ടി ആശുപത്രിയില് പ്രവേശിപ്പിച്ചെങ്കിലും അന്നുതന്നെ മരിച്ചു. നാലു മാസത്തിന് ശേഷമാണ് പാരിപ്പള്ളി പോലീസ് കുഞ്ഞ് രേഷ്മയുടേതാണെന്ന് കണ്ടെത്തിയത്. ഡി.എന്.എ പരിശോധനയിലൂടെയാണ് കുഞ്ഞ് രേഷ്മയുടേതാണെന്ന് പോലീസ് കണ്ടെത്തിയത്. തുടര്ന്ന് നടന്ന ചോദ്യം ചെയ്യലിലാണ് കുഞ്ഞ് തന്റേതാണെന്നും ആരുമറിയാതെ പ്രസവിച്ചശേഷം ഉപേക്ഷിച്ചത് താന് തന്നെയാണെന്നും ഫേസ്ബുക്ക് കാമുകനൊപ്പം ജീവിക്കാനായിരുന്നു ഈ കടുംകൈ എന്നും രേഷ്മ ഏറ്റുപറഞ്ഞത്.
വിവാഹിതയായ രേഷ്മ രണ്ട് വയസ്സുള്ള കുഞ്ഞിന്റെ അമ്മയാണ്. താന് രണ്ടാമതും ഗര്ഭിണയായ വിവരം വീട്ടുകാരില് നിന്നും രേഷ്മ മറച്ചു വെക്കുകയായിരുന്നെന്ന് രേഷ്മ പറയുന്നു. ഭര്ത്താവിനോട് പോലും ഇക്കാര്യം പറഞ്ഞിരുന്നില്ല. ഒടുവില് ജനുവരി അഞ്ചിന് വീട്ടിലെ ശുചിമുറിയില് കുഞ്ഞിനെ പ്രസവിച്ച ശേഷം കരിയിലക്കൂനയില് ഉപേക്ഷിക്കുകയായിരുന്നു.