വിവാദങ്ങളുടെ പശ്ചാത്തലത്തില് കിറ്റെക്സ് സംസ്ഥാനത്ത് നടത്താന് ഉദ്ദേശിച്ചിരുന്ന 3500 കോടിയുടെ നിക്ഷേപം ഉപേക്ഷിക്കാനുള്ള തീരുമാനത്തിന് പിന്നാലെ കേരള സര്ക്കാരിനെയും വ്യവസായ നയങ്ങളെയും രൂക്ഷമായി വിമര്ശിച്ച് കിറ്റെക്സ് എംഡി സാബു ജേക്കബ്. വ്യവസായം ആരംഭിക്കാന് ക്ഷണിച്ചു കൊണ്ടുള്ള വാഗ്ദാനം സ്വീകരിച്ച് തെലങ്കാനയിലേക്കുള്ള യാത്രക്ക് മുന്നോടി മാധ്യമങ്ങളെ കാണുകയായിരുന്നു സാബു ജേക്കബ്. സ്വകാര്യ ജെറ്റ് വിമാനം ഉള്പ്പെടെ അയച്ചാണ് തെലങ്കാന കിറ്റെക്സ് എംഡിയെ ചര്ച്ചകള്ക്കായി ക്ഷണിച്ചിട്ടുള്ളത്.സാബു എം ജേക്കബിന്റെ നേതൃത്വത്തിലുള്ള ആറംഗസംഘമാണ് ഹൈദരാബാദില് എത്തുക
തെലുങ്കനയിലേക്ക് താന് തനിയെ പോകുന്നതല്ല, ആട്ടി പായിക്കുന്നതാണെന്ന് സാബു ജേക്കബ് പറഞ്ഞു. ഒരിക്കലും കേരളം വിട്ടു പോകണം എന്ന് ആഗ്രഹിച്ചിട്ടില്ല. പിടിച്ചു നില്ക്കാന് പരമാവധി ശ്രമിച്ചു. എന്നാല് ഒരു സഹായവും സര്ക്കാരിന്റെ ഭാഗത്തു നിന്നും ഉണ്ടായിട്ടില്ല. നിരവധി പേര് ജോലി തേടി മറ്റു നാടുകളിലേക്ക് പോകുന്നുണ്ട്. ഇത്തരത്തില് പോയാല് കേരളം പ്രായമായ അച്ഛനമ്മമാരുടെ മാത്രം സംസ്ഥാനം ആയി മാറും.
തന്റെ യാത്ര ആരോടുമുള്ള പ്രതിഷേധം അല്ല. ഇതില് വേദനയും വിഷമവും ഉണ്ട്. സര്ക്കാരിനെ സമ്മര്ദത്തില് ആക്കാനല്ല ഈ യാത്ര. സര്ക്കാരുമായി ചര്ച്ചക്ക് ഇനിയും തയ്യാറാണ്. പക്ഷെ പിടിച്ചു നില്ക്കാന് പറ്റാത്ത സാഹചര്യം ഉണ്ടായാല് നിലവിലുള്ള വ്യവസായങ്ങളും കേരളത്തിന് പുറത്തേക്ക് മാറ്റുന്നത് ആലോചിക്കുമെന്നും സാബു ജേക്കബ് മുന്നറിയിപ്പ് നല്കി. 3,500 കോടി രൂപയുടെ നിക്ഷേപ പദ്ധതിയുമായി ബന്ധപ്പെട്ട് കിറ്റക്സ് കമ്പനി തെലുങ്കാന സര്ക്കാരുമായി ഇന്ന് ചര്ച്ച നടത്തും. തെലുങ്കാന വ്യവസായ വകുപ്പ് മന്ത്രി കെ ടി രാമറാവുവിന്റെ നേതൃത്വത്തില് ഹൈദരാബാദിലാണ് ചര്ച്ച.
അതേസമയം, സാബു ജേക്കബിന്റെ പരാമര്ശം ദൗര്ഭാഗ്യകരമെന്ന് വ്യവസായമന്ത്രി പി.രാജീവ് പറഞ്ഞു. എം.ഡിയുടെ പരാമര്ശം സമൂഹം വിലയിരുത്തട്ടെ. പരാതി പരിശോധിക്കാനും ചര്ച്ചയ്ക്കും സര്ക്കാര് തയ്യാറായിരുന്നു. ഇവിടുത്തെ വ്യവസായ അന്തരീക്ഷത്തെ കുറിച്ച് കളമശേരിയിലെ സ്റ്റാര്ട്ടപ്പുകളോട് ചോദിക്കാം. ആക്ഷേപം ഉന്നയിച്ചുള്ള പ്രചാരവേല വേണ്ടിയിരുന്നില്ലെന്നും മന്ത്രി പറഞ്ഞു.
അതിനിടെ, കിറ്റെക്സ് ഗാര്മെന്റ്സിന്റെ ഓഹരി മൂല്യം ഉയര്ന്നു. ഇന്നലത്തേക്കാള് 20 രൂപയാണ് ഇതുവരെ ഉയര്ന്നത്. ഇന്നലെ 113 രൂപയ്ക്കാണ് വ്യാപാരം അവസാനിച്ചത്. രാവിലെ വ്യാപാരം പുനരാരംഭിച്ചപ്പോള് 117 രൂപയിലെത്തി. കേരളത്തിലെ നിക്ഷേപം ഉപേക്ഷിച്ചതായി പ്രഖ്യാപിച്ച ജൂണ് 30ന് ഓഹരിവില 10% ഇടിഞ്ഞിരുന്നു.