നവംബര് ഒന്നു മുതല് ഓസ്ട്രേലിയയില് കൊവിഡ് പരിശോധന വീടുകളില് നടത്താനുള്ള കിറ്റ് ലഭ്യമാക്കുമെന്ന് TGA (The Therapeutic Goods Administration) അറിയിച്ചു. ഇതിനായുള്ള അന്തിമ പരിശോധനകളും അനുമതിയും മാത്രമേ ഇനി വേണ്ടൂ. വീട്ടില് പരിശോധന നടത്താന് കഴിയുന്ന 70 ലധികം കിറ്റുകളുടെ അനുമതിക്കായുള്ള അപേക്ഷ ലഭിച്ചു കഴിഞ്ഞു. ഇതില് 33 എണ്ണം രംഗത്തുള്ളവരുടെ മേല്നോട്ടത്തോടെ ഉപയോഗിക്കാന് അംഗീകാരം ലഭിച്ചവയാണ്.
പുതിയ പരിശോധനാ കിറ്റുകള് കൊവിഡ് പ്രതിരോധത്തില് നിര്ണ്ണായക പങ്കുവഹിക്കുമെന്ന് ആരോഗ്യ മന്ത്രി ഗ്രെഗ് ഹണ്ട് പറഞ്ഞു. ഓസ്ട്രേലിയക്കാര്ക്ക് മറ്റൊരു പ്രതിരോധ സംവിധാനം കൂടിയാണ് ഇത് വഴി ലഭ്യമാകുക എന്നദ്ദേഹം പറഞ്ഞു. ഹോം ടെസ്റ്റിംഗ് കിറ്റുപയോഗിച്ചുള്ള പരിശോധനാ ഫലം 20 മിനിറ്റില് ലഭ്യമാകും.
പരിശോധനാ ഫലം പോസിറ്റീവാണെങ്കില് അധികൃതര് ലഭ്യമാക്കുന്ന PCR പരിശോധനക്കായി പോകാവുന്നതാണെന്ന് ഗ്രെഗ് ഹണ്ട് കൂട്ടിച്ചേര്ത്തു. എന്നാല് രാജ്യത്തെ വാക്സിനേഷന് നിരക്ക് കൂടുന്നതിനെ ആശ്രയിച്ചായിരിക്കും ഈ പദ്ധതി നടപ്പിലാക്കുക എന്നും അധികൃതര് വ്യക്തമാക്കി. അതെസമയം വീട്ടിലെ പരിശോധനാഫലങ്ങള് പോസിറ്റീവാകുന്ന സാഹചര്യത്തില് അധികൃതരെ അറിയിക്കാനുള്ള സംവിധാനങ്ങള് സംസ്ഥാനങ്ങളും ടെറിറ്ററികളും ഒരുക്കേണ്ടതുണ്ട് എന്ന് ആരോഗ്യ വകുപ്പ് വക്താവ് പറഞ്ഞു.
ഹോം ടെസ്റ്റിംഗില് പോസിറ്റീവാകുന്നവര്ക്ക് ക്ലിനിക്കില് വീണ്ടും പരിശോധനക്ക് വിധേയരാകാനുള്ള നിര്ദ്ദേശം ലഭിക്കുമെന്ന് TGA പറഞ്ഞു. ഓസ്ട്രേലിയയില് 16 വയസിന് മേല് പ്രായമുള്ള 76 ശതമാനവും ആദ്യ ഡോസ് വാക്സിന് സ്വീകരിച്ചതായും, 52.6 ശതമാനം പേര് രണ്ട് ഡോസ് സ്വീകരിച്ചതായും ആരോഗ്യ വകുപ്പ് വ്യക്തമാക്കി.