പാലക്കാട് തങ്കം ആശുപത്രിയില് പ്രസവത്തെ തുടര്ന്ന് അമ്മയും കുഞ്ഞും മരിച്ച സംഭവത്തില് ചികിത്സാ പിഴവെന്ന് റിപ്പോര്ട്ട്. മെഡിക്കല് ബോര്ഡാണ് റിപ്പോര്ട്ട് നല്കിയത്. ഐശ്വര്യയെ ചികിത്സിച്ച ഡോക്ടര്മാര്ക്ക് പിഴവ് പറ്റിയെന്ന് മെഡിക്കല് ബോര്ഡിന്റെ റിപ്പോര്ട്ട് വ്യക്തമാക്കുന്നു. ഡോക്ടര്മാരെ വിളിച്ചുവരുത്തി അറസ്റ്റ് ചെയ്യുമെന്നാണ് ലഭിക്കുന്ന വിവരം. രണ്ടുദിവസം മുന്പാണ് വിഷയത്തില് പാലക്കാട് മെഡിക്കല് ബോര്ഡ് യോഗം ചേര്ന്നത്.
ആ മെഡിക്കല് ബോര്ഡിന്റെ വിലയിരുത്തലിലാണ് ഇക്കാര്യങ്ങള് വ്യക്തമാക്കുന്നത്.
ജൂലൈ ആദ്യവാരമായിരുന്നു പ്രസവത്തെ തുടര്ന്ന് ഐശ്വര്യയും നവജാത ശിശുവും മരിച്ചത്. ജൂണ് അവസാന വാരം ഐശ്വര്യയെ പ്രസവത്തിനായി ആശുപത്രിയില് പ്രവേശിപ്പു. ശസ്ത്രക്രിയ വേണമെന്ന് ആദ്യം ഡോക്ടര്മാര് അറിയിച്ചിരുന്നുവെങ്കിലും പിന്നീട് പ്രസവം മതിയെന്ന് അറിയിക്കുകയായിരുന്നു. പ്രസവത്തിനിടയില് ഐശ്വര്യയ്ക്ക് അമിത രക്തസ്രാവമുണ്ടായി. തുടര്ന്ന് വെന്റിലേറ്ററിലേക്ക് മാറ്റിയെങ്കിലും ജീവന് രക്ഷിക്കാനായില്ല. നവജാത ശിശു പിറ്റേ ദിവസവും മരിച്ചു. ഇതിന് പിന്നാലെ ചികിത്സാ പിഴവാണ് മരണകാരണമെന്ന് ആരോപിച്ച് കുടുംബം രംഗത്തെത്തിയിരുന്നു.
ഐശ്വര്യയെ ഒന്പതുമാസവും പരിശോധിച്ച ഗൈനക്കോളജിസ്റ്റ് ആയിരുന്നില്ല, പ്രസവസമയത്ത് ഉണ്ടായിരുന്നതെന്നും കുടുംബം ആരോപിച്ചിരുന്നു. മാത്രമല്ല, വാക്വം ഉപയോഗിച്ചാണ് കുഞ്ഞിനെ പുറത്തെടുത്തത് എന്നും കുടുംബം ആരോപണം ഉന്നയിച്ചിരുന്നു. കുടുംബത്തിന്റെ ആരോപണം ശരിവെക്കുന്ന മെഡിക്കല് റിപ്പോര്ട്ടാണ് പുറത്തെത്തിയിരിക്കുന്നത്. ചൊവ്വാഴ്ച വൈകിട്ടോടെ ഡോക്ടര്മാരുടെ അറസ്റ്റ് രേഖപ്പെടുത്തുമെന്നാണ് വിവരം.