കര്ണാടകയില് 21കാരിയായ മകളെ ദേവദാസി സമ്പ്രദായത്തിലേക്ക് തള്ളിവിട്ടതിന് അച്ഛനമ്മമാരടക്കം നാല് പേര് അറസ്റ്റില്. യുവതി നേരിട്ട് പൊലീസ് സ്റ്റേഷനിലെത്തി പരാതി നല്കുകയായിരുന്നു. തുടര്ച്ചയായി രോഗബാധിതയായതിന്റെ പേരിലാണ് മകളെ ദേവദാസിയാക്കാന് നിര്ബന്ധിച്ചത് എന്നാണ് ഇവരുടെ വിശദീകരണം. കൊപ്പാള ജില്ലയിലെ ചിലവ്ഗഡി എന്ന സ്ഥലത്തെ ഹൂളിഗമെ എന്ന ക്ഷേത്രത്തിലാണ് ഇവര് 21കാരിയായ മകളെ ദേവദാസിയാക്കിയിരിക്കുന്നത്.
യുവതി മുനീറാബാദ് സ്റ്റേഷനിലെത്തി നേരിട്ട് പരാതി നല്കുകയായിരുന്നു. ദേവദാസി സമ്പ്രദായം 1984 മുതല് നിയമവിരുദ്ധമാണ്. തുടര്ച്ചയായി രോഗബാധിതയാകുന്നതിന് കാരണം ദൈവകോപമാണെന്നും അതിനാല് ദൈവത്തിന് അടിയറവുവച്ച് ദേവദാസിയാക്കുന്നുവെന്നുമുള്ള വിശ്വാസത്തിലാണ് കുട്ടിയെ ക്ഷേത്രത്തിലേക്ക് കൊടുത്തത്. ഇതോടെ തുടര്ന്നുള്ള ജീവിതകാലം മുഴുവന് യുവതി ഈ ക്ഷേത്രത്തില് ജീവിക്കണം, യാതൊരുവിധ സാമൂഹിക ജീവിതവും പാടില്ല എന്നതാണ് ഈ അനാചാരം. സ്ത്രീ സുരക്ഷാ സംഘടനകളും ദളിത് സംഘടനകളുമടക്കം ഈ വിഷയത്തില് ഇടപെട്ടിട്ടുണ്ട്. കൂടുതല് വിവരങ്ങള് പൊലീസും സാമൂഹിക നീതി വകുപ്പും അന്വേഷിച്ച് വരികയാണ്.