ആലപ്പുഴ കളര്കോട് ജംഗ്ഷനില് ശബരിമല തീര്ഥാടകരുടെ വാഹനത്തിന് നേരെ യുവാവിന്റെ ആക്രമണം. ബുധനാഴ്ച രാത്രി പത്ത് മണിക്ക് ശേഷമാണ് ആക്രമണമുണ്ടായത്. ഒന്പത് വയസ്സുകാരിയും മറ്റൊരു കുട്ടിയും ബൈക്കില് ചാരി നിന്ന് ഫോട്ടോ എടുത്തതാണ് യുവാവിനെ പ്രകോപിപ്പിച്ചത്. ബസിന്റെ ചില്ല് യുവാവ് അടിച്ചു തകര്ത്തു. യുവാവിനായി പോലീസ് അന്വേഷണം ആരംഭിച്ചിട്ടുണ്ട്.
ചുങ്കത്തറ സ്വദേശി വിഷ്ണുവിന്റെ മകള് അലീന, ബന്ധു വൃന്ദാവന എന്നിവര്ക്ക് കൈയ്ക്ക് പരുക്ക് പറ്റിയിട്ടുണ്ട്. ഒരു ടിവി റിയാലിറ്റി ഷോ താരമായ യുവതിക്കൊപ്പമെത്തിയ യുവാവാണ് ആക്രമണം നടത്തിയതെന്നാണ് മൊഴി.
കളര്കോട് ബൈപ്പാസിന് സമീപമുള്ള ഒരു ഹോട്ടലില് നിര്ത്തിയിട്ടിരുന്ന വാഹനമാണ് ആക്രമിക്കപ്പെട്ടത്. തീര്ത്ഥാടക സംഘത്തില് ഒമ്പത് കുട്ടികള് അടക്കം 39 പേരുണ്ടായിരുന്നു. ഹോട്ടലിന് മുന്നില് നിര്ത്തിയിട്ടിരുന്ന ബൈക്കിന് സമീപത്ത് നിന്ന് രണ്ട് കുട്ടികള് ഫോട്ടോ എടുത്തു. ഇത് ഇഷ്ടപ്പെടാതിരുന്ന ബൈക്കിന്റെ ഉടമയായ യുവാവ് കുട്ടികളോട് ദേഷ്യപ്പെടുകയും വണ്ടിയുടെ താക്കോല് കൊണ്ട് കുത്തിയെന്നുമാണ് പരാതി.
സംഘത്തിലുള്ളവരുമായുണ്ടായ വാക്കേറ്റത്തിന് ശേഷം ഇവിടെ നിന്നും പോയ ഇയാള് കൊടാലിയുമായി തിരിച്ചെത്തി സംഘത്തിനെ വെല്ലുവിളിയ്ക്കുകയും അവര് സഞ്ചരിച്ച വാഹനത്തിന്റ ചെില്ല് അടിച്ചു തകര്ക്കുകയായിരുന്നുവെന്നും പരാതിയില് പറയുന്നു. വിവരം അറിഞ്ഞ് പൊലീസ് ഉടന് തന്നെ സ്ഥലത്തെത്തി. യുവാവിനെ തിരിച്ചറിഞ്ഞതായി പൊലീസ് അറിയിച്ചു.