കോഴിക്കോട് : അന്തരിച്ച മലയാളത്തിന്റെ പ്രിയ നടന് മാമുക്കോയയുടെ സംസ്കാരം ഇന്ന് രാവിലെ 9:30യ്ക്ക് ശേഷം. അരക്കിണര് മുജാഹിദ് പള്ളിയില് മയ്യത്ത് നിസ്കാരത്തിന് ശേഷം 10 മണിയോടെ കണ്ണമ്പറത്ത് ശ്മശാനത്തില് ഖബറടക്കം.
ഇന്നലെ ഉച്ചയ്ക്ക് ഒന്നേ അഞ്ചോടെയായിരുന്നു നടന് മാമുക്കോയയുടെ അന്ത്യം. ഹൃദയാഘാതത്തോടൊപ്പം തലച്ചോറിലുണ്ടായ രക്തസ്രാവമാണ് മരണകാരണം. കാളികാവ് പൂങ്ങോടില് സെവന്സ് ഫുട്ബോള് ടൂര്ണമെന്റിന്റെ ഉദ്ഘാടനത്തിന് എത്തിയ മാമുക്കോയയെ ദേഹാസ്വാസ്ഥ്യത്തെ തുടര്ന്ന് വണ്ടൂരിലെ സ്വകാര്യ ആശുപത്രിയില് പ്രവേശിപ്പിക്കുകയായിരുന്നു. തുടര്ന്ന് കോഴിക്കോട്ടെ ഒരു സ്വകാര്യ ആശുപത്രിയിലേക്ക് മാറ്റുകയായിരുന്നു. തിങ്കളാഴ്ച മുതല് തീവ്രപരിചരണ വിഭാഗത്തില് ചികിത്സയിലായിരുന്നു. ബുധനാഴ്ച ഉച്ചയ്ക്ക് ഒന്നേ അഞ്ചോടെയായിരുന്നു അന്ത്യം.
ഇന്നസെന്റിന്റെ മരണത്തിന് ശേഷം മലയാളത്തിന്റെ മറ്റൊരു തീരാ നഷ്ടം ആണ് മാമുക്കോയ. ചെയ്തു വെച്ച കഥാപാത്രങ്ങളിലൂടെ ഇനി ജീവിക്കുമെന്ന് പറയുമ്പോള് ഇനിയും ചെയ്യാന് നിരവധി കഥാപാത്രങ്ങള് ബാക്കിയാക്കിയാണ് മാമുക്കോയ യാത്രയാകുന്നത്.
നേരത്തെ ഷൂട്ടിങ് ലൊക്കേഷനില് വെച്ച് നെഞ്ച് വേദന വന്നതിനെത്തുടര്ന്ന് അദ്ദേഹത്തെ ആന്ജിയോപ്ളാസ്റ്റിക്ക് വിധേയനാക്കിയിട്ടുണ്ട്. രണ്ട് സ്റ്റെന്റും ഇട്ടു. ഒരു ബ്ലോക്ക് കൂടിയുണ്ടായിരുന്നതിനാല് ബൈപ്പാസ് ചെയ്യണമെന്നും ഡോക്ടര്മാര് നിര്ദ്ദേശിച്ചു. 'കുരുതി'യിലെ മൂസാ ഖാലിദായി തിരശ്ശീലയില് തിളങ്ങിനിന്ന സമയത്താണ് മാമുക്കോയ അര്ബുദത്തെ നേരിടുന്നത്. 33 റേഡിയേഷന്, ആറു കീമോതെറാപ്പിക്കും വിധേയനായി. തൊണ്ടയിലായിരുന്നു കാന്സര് ബാധിച്ചത്. എല്ലാം വരുന്നിടത്തുവെച്ചുകാണാം എന്ന രീതിയാണ് മാമുക്കോയ ജീവിതത്തില് സ്വീകരിച്ച് പോന്നത്. ജീവിതത്തില് നമുക്ക് അസുഖം വരുമെന്നും അപ്പോള് നിലവിളിച്ചിട്ട് കാര്യമില്ലെന്നും പറഞ്ഞിട്ടുള്ള മാമുക്കോയ പ്രതിസന്ധികളെ അതിജീവിക്കണമെന്നും മാനസികാവസ്ഥയാണ് പ്രധാനമെന്നും അടിയുറച്ച് വിശ്വസിച്ചു. അഷ്റഫ് ഹംസ സംവിധാനം ചെയ്ത സുലൈഖ മന്സിലാണ് ഏറ്റവും ഒടുവില് അഭിനയിച്ച ചിത്രങ്ങളിലൊന്ന്. ഈ സിനിമ തിയേറ്ററുകളില് പ്രദര്ശനം തുടരവേയാണ് മാമുക്കോയയുടെ അപ്രതീക്ഷിത വിയോഗം.
സുഹ്റയാണ് മാമുക്കോയയുടെ ഭാര്യ. നിസാര്, ഷാഹിദ, നാദിയ, അബ്ദുള് റഷീദ് എന്നിവര് മക്കളാണ്.