മലപ്പുറത്ത് നിന്നും കാണാതായ ഹോട്ടലുടമ സിദ്ദീഖ് കൊല്ലപ്പെട്ടതായി സ്ഥിരീകരിച്ച് മൃതദേഹ അവശിഷ്ടങ്ങള് കണ്ടെത്തി പൊലീസ്. കാണാതായ അച്ഛന്റെ മൃതദേഹമാണെന്ന് തിരിച്ചറിഞ്ഞ് മകന്.
കഴിഞ്ഞ ദിവസമാണ് തിരൂര് സ്വദേശി കൂടിയായ സിദ്ദീഖ്(58)നെ കാണാനില്ലെന്ന് അറിയിച്ച് കുടുംബാംഗങ്ങള് പൊലീസില് പരാതി നല്കിയത്. എന്നാല് മിസ്സിങ് കേസ് അന്വേഷിച്ചിറങ്ങിയ പൊലീസ് സംഭവം കൊലപാതകമാണെന്ന് കണ്ടെത്തി.
അട്ടപ്പാടി ചുരം വളവില് നിന്ന് കണ്ടെത്തിയ ട്രോളി ബാഗുകളിലുള്ളത് മൃതദേഹാവശിഷ്ടങ്ങള് സിദ്ദീഖിന്റെയെന്ന് സ്ഥിരീകരിച്ചു. ഹോട്ടലുടമ സിദ്ദീഖിന്റെ മൃതദേഹം തന്നെയാണെന്ന് മകനും തിരിച്ചറിഞ്ഞു. നിലവില് ഇന്ക്വസ്റ്റ് നടപടിക്രമങ്ങള് പുരോഗമിക്കുകയാണ്. ഇതിന് ശേഷം മൃതദേഹാവശിഷ്ടങ്ങള് പോസ്റ്റുമോര്ട്ടം നടപടിക്രമങ്ങള്ക്ക് വേണ്ടി കോഴിക്കോട് മെഡിക്കല് കോളേജിലേക്ക് കൊണ്ടുപോകും.
സിദ്ദീഖിനെ ഫോണില് ബന്ധപ്പെടാന് ശ്രമിച്ചിട്ടും ലഭ്യമല്ലാതായതോടെ മകന് തിരൂര് പോലീസില് മിസിങ് കേസ് നല്കിയിരുന്നു. ഇതിന്റെ അടിസ്ഥാനത്തില് നടത്തിയ അന്വേഷണത്തില് ഇയാളുടെ എടിഎം കാര്ഡ് ഉപയോഗിച്ച് പണം പിന്വലിച്ചതായി കണ്ടെത്തി. പിന്നീട് ഇയാളുടെ ഉടമസ്ഥതയിലുള്ള ഹോട്ടലിലെ ജീവനക്കാരനെ കാണാതായതും ദുരൂഹത വര്ധിപ്പിച്ചു. തുടര്ന്ന് നടത്തിയ വിശദമായ അന്വേഷണത്തിലാണ് കൊലപാതകത്തിന്റെ ചുരുളഴിയുന്നത്.
കോഴിക്കോടുള്ള ഒരു ഹോട്ടലില് വെച്ച് സിദ്ദീഖിന്റെ ഹോട്ടലിലെ ജീവനക്കാരനായ ഷിബിലിയും(22) പെണ്സുഹൃത്ത് ഫര്ഹാനയും(18) സിദ്ദീഖിനെ കൊലപ്പെടുത്തിയെന്നാണ് പോലീസ് വ്യക്തമാക്കിയത്. ചെന്നൈയില് നിന്നുമാണ് പ്രതികളെ പിടികൂടിയത്. പുലര്ച്ചെയോടെ പ്രതികളെ കേരളത്തിലെത്തിക്കും. മൃതദേഹത്തിനായി നാളെ തിരച്ചില് നടത്തും.