തൃശ്ശൂര് വല്ലച്ചിറ ഊരകം ഭാഗങ്ങളിലിറങ്ങി പത്തിലധികം പേരെ കടിച്ച തെരുവു നായ വണ്ടിയിടിച്ചു ചത്തു. നായയുടെ പോസ്റ്റ്മാര്ട്ടം റിപ്പോര്ട്ടില് പേവിഷബാധ സ്ഥിരീകരിച്ചതായി റിപ്പോര്ട്ട്. കടിയേറ്റവര് ചികിത്സ തേടണമെന്ന് ചേര്പ്പ് പഞ്ചായത്തിന്റെ മുന്നറിയിപ്പ്.
നായ ആളുകളെ കടിക്കുന്ന സിസിടിവി ദൃശ്യങ്ങള് പുറത്തുവന്നു. അതേസമയം, സംസ്ഥാനത്ത് വിവിധയിടങ്ങളിലായി തെരുവുനായ ആക്രമണത്തില് നിരവധി ആളുകള്ക്ക് പരിക്കേറ്റ വാര്ത്ത പുറത്തുവരികയാണ്. കണ്ണൂര് പരിയാരം വായാട് വീട്ടമ്മയെ തെരുവ് നായ ആക്രമിച്ചു. പുതിയടത്ത് പ്രസന്നയുടെ കാലിനാണ് തെരുവ് നായ കടിച്ചത്. ഇവരെ പരിയാരം മെഡിക്കല് കോളജ് ആശുപത്രിയില് പ്രവേശിപ്പിച്ചു.
പത്തനംതിട്ട കുളനടയില് ഒന്പതുപേര്ക്ക് തെരുവ് നായയുടെ ആക്രമണത്തില് പരിക്കേറ്റു. തുമ്പമണ്, ഉളനാട് പ്രദേശങ്ങളിലാണ് തെരുവ് നായയുടെ ആക്രമണം. ഇന്ന് രാവിലെ മുതല് ഉച്ചവരെയാണ് നായയുടെ ആക്രമണം ഉണ്ടായത്. ആക്രമണകാരിയായ നായയെ നാട്ടുകാര് പിടികൂടിയെങ്കിലും പിന്നീട് നായ ചത്തു. പരിക്കേറ്റവരില് ഒരാളെ കോട്ടയം മെഡിക്കല് കോളജ് ആശുപത്രിയില് പ്രവേശിപ്പിച്ചു.