ബ്രാഡ്ഫോര്ഡ് : ഗ്രേറ്റ് ബ്രിട്ടന് സീറോ മലബാര് രൂപതയുടെ ലീഡ്സ് റീജിയണല് ബൈബിള് കലോത്സവത്തിന് ഉജ്വല പരിസമാപ്തി. റീജിയന് രൂപീകൃതമായ ശേഷം ആദ്യമായി നടന്ന ബൈബിള് കലോത്സവത്തില് റീജിയണിലെ മുഴുവന് ഇടവക / മിഷന് പ്രൊപ്പോസഡ് മിഷന് കേന്ദ്രങ്ങളില് നിന്നുമായി നൂറു കണക്കിന് മത്സരാര്ഥികള് ആണ് വിവിധ മത്സരങ്ങളില് മാറ്റുരച്ചത്. മിഷന് കേന്ദ്രങ്ങളില് നിന്നും മത്സരങ്ങളില് ഒന്നും രണ്ടും മൂന്നും സ്ഥാനങ്ങള് നേടിയ മത്സരാര്ഥികള് നടത്തിയ ഇഞ്ചോടിഞ്ചു പോരാട്ടത്തിനാണ് ബ്രാഡ്ഫോര്ഡിലെ ഡിക്സണ് കോട്ടിങ്ലി അക്കാദമി വേദിയായത്.
ശനിയാഴ്ച രാവിലെ ഒന്പതു മണിക്ക് ലീഡ്സ് റീജിയണല് ഡയറക്ടര് റെവ ഫാ. ജോജോ പ്ലാപ്പള്ളില് സിഎംഐ വിശുദ്ധ ബൈബിള് പ്രതിഷ്ഠ നടത്തിയതോടെ ആണ് മത്സരങ്ങള് ആരംഭിച്ചത്. തുടര്ന്ന് നടന്ന ഉത്ഘാടന സമ്മേളനത്തില് ബൈബിള് കലോത്സവം റീജിയണല് കോഡിനേറ്റര് ഫാ ജോസ് അന്ത്യാളം എംസിബിഎസ്. ഫാ. സജി തോട്ടത്തില് ബൈബിള് അപ്പോസ്റ്റലേറ്റ് പ്രതിനിധികള് എന്നിവര് ചേര്ന്ന് തിരികള് തെളിച്ച് ഉത്ഘാടനം ചെയ്തു. വിവിധ വേദികളിലായി മുന്നൂറ്റി അന്പതോളം മത്സരാര്ഥികള് പങ്കെടുത്ത മത്സരങ്ങള് വൈകിട്ട് എട്ടു മണിയോടെ ആണ് സമാപിച്ചത്.
വൈകുന്നേരം നടന്ന സമാപന സമ്മേളനത്തില് വച്ച് വിജയികളായ എല്ലാവര്ക്കും സമ്മാനങ്ങളും വിതരണം ചെയ്തു. റെവ. ഫാ. ജോജോ പ്ലാപ്പള്ളില് സിഎംഐ. ഫാ. ജോസ് അന്ത്യാളം എംസിബിഎസ്. ഫാ. സാജു പിണക്കാട്ട്, ഫാ. ജോഷി കൂട്ടുങ്ങല്, ബൈബിള് കലോത്സവം നാഷണല് കോഡിനേറ്റര്, ആന്റണി മാത്യു, ബൈബിള് അപ്പോസ്റ്റലേറ്റ് പ്രതിനിധികള് ആയ ജോണ് കുര്യന്, ജിമ്മിച്ചന് ജോര്ജ്, ആതിഥേയര് ആയ ലീഡ്സ് ഇടവക സണ്ഡേ സ്ക്കൂള് ഹെഡ് മാസ്റ്റര് ഡേവിസ് പോളിന്റെ നേതൃത്വത്തില് ഉള്ള ലീഡ്സ് ഇടവക ടീം, സണ്ഡേ സ്കൂള് അധ്യാപകര്, കമ്മീഷന് അംഗങ്ങള് എന്നിവര് കലോത്സവ പരിപാടികള്ക്ക് നേതൃത്വം വഹിച്ചു.