സ്റ്റീവനേജ് : സെവന് ബീറ്റ്സ് സംഗീതോത്സവ വേദിയില് നിറഞ്ഞു കവിഞ്ഞ കലാസ്നേഹികളെ ആസ്വാദനത്തിന്റെ നെറുകയിലെത്തിച്ച കലാമാമാങ്ക അരങ്ങില് വിരിഞ്ഞത് വര്ണ്ണാഭമായ മഴവില് കലാവസന്തം. നൂറു കണക്കിന് ആസ്വാദക ഹൃദയങ്ങളെ സാക്ഷി നിറുത്തി സ്റ്റീവനേജിലെ വെല്വിനില് അരങ്ങേറിയ സംഗീത-നൃത്തോത്സവത്തെ സദസ്സ് വരവേറ്റത് ഗംഭീരമായ കലാ വിരുന്നിനും, ജീവ കാരുണ്യ പ്രവര്ത്തനങ്ങള്ക്കുള്ള ആദരവും പ്രോത്സാഹനവുമായി. ഉച്ചക്ക് രണ്ടു മണിക്ക് ആരംഭിച്ച കലാവിരുന്ന് രാത്രി പത്തരവരെ നീണ്ടു നിന്നു.
സ്റ്റീവനേജ് മേയര് കൗണ്സിലര് മൈല ആര്സിനോ സംഗീതോത്സവ വേദി സന്ദര്ശിക്കുകയും, പരിപാടികള് കുറച്ചു നേരം ആസ്വദിക്കുകയും ചെയ്ത ശേഷം ആശംസകളും അഭിനന്ദനങ്ങളും അര്പ്പിച്ചു സംസാരിക്കുകയും ചെയ്തത് സംഘാടകര്ക്കുള്ള പ്രോത്സാഹനമായി. യുകെയിലെ ആദ്യകാല ചെണ്ടമേള ടീമും, നിരവധിയായ വേദികളില് അവതരിപ്പിച്ച് പ്രശംസ നേടിയിട്ടുമുള്ള 'സര്ഗ്ഗ താളം' സ്റ്റീവനേജ് വേദിയില് തകര്ത്താടിയ 'ശിങ്കാരി മേളം' സംഗീതോത്സവത്തിലെ ഹൈലൈറ്റായി. ജോണി കല്ലടാന്തി, ഷെര്വിന് ഷാജി, സോയിമോന് അടക്കം പ്രഗത്ഭരായ നിരയാണ് ശിങ്കാരി മേളം നയിച്ചത്.
7 ബീറ്റ്സിന്റെ സംഗീത്തോത്സവ ഉദ്ഘാടന വേദിയില് കോര്ഡിനേറ്റര് സണ്ണിമോന് മത്തായി അദ്ധ്യക്ഷത വഹിച്ചു. ജോമോന് മാമ്മൂട്ടില് സ്വാഗതവും, ഡോ. ശിവകുമാര് 'സ്വരം' മാഗസിന് പ്രകാശനം ചെയ്ത്, ഓ എന് വി അനുസ്മരണ പ്രഭാഷണവും നടത്തി.
യുകെയുടെ നാനാ ഭാഗങ്ങളില് നിന്നുമെത്തിയ കുട്ടികള് മുതല് മുതിര്ന്നവരായ കലാ പ്രതിഭകളുടെ മികവുറ്റ കലാ പ്രകടനങ്ങള് സംഗീതോത്സവ വേദിയെ ആനന്ദ സാഗരത്തില് ആറാടിച്ചു. ഓരോ ഇനങ്ങളും ഏറെ കൈയടിയോടെയാണ് സദസ്സ് വരവേറ്റത്.ചാരിറ്റി ഫണ്ട് ശേഖരനാര്ത്ഥം നടത്തിയ റാഫില് ടിക്കറ്റിന്റെ നറുക്കെടുപ്പും മുഖ്യ സ്പോണ്സറായ ലൈഫ് ലൈന് പ്രൊറ്റക്ട് നടത്തിയ ഭാഗ്യക്കുറി നറുക്കെടുപ്പും വേദിയില് നടത്തി ഭാഗ്യശാലികള്ക്ക് സമ്മാനങ്ങള് വിതരണം ചെയ്തു. കറി വില്ലേജ് ഒരുക്കിയ ഫുഡ് സ്റ്റോള് വിഭവങ്ങള്, ഏറെ സ്വാദിഷ്ടവും രുചികരവുമായി.
അറുപതോളം സംഗീത-നൃത്ത ഇനങ്ങള് മാറ്റുരച്ച അതിസമ്പന്നമായ സംഗീതോത്സവ വേദിയില് എല് ഇ ഡി സ്ക്രീനിന്റെ മാസ്മരിക പശ്ചാത്തലത്തില്, നൂതന ലൈറ്റ് ആന്ഡ് സൗണ്ട് സാങ്കേതികത്വത്തിന്റെ മികവോടെ ആലപിച്ച മധുരഗാനങ്ങള് ആവോളം ശ്രവിക്കുവാനും, നവരസങ്ങള് ഒഴുകിയെത്തിയ ഭാവ ഭേദങ്ങളും, മാന്ത്രിക ചുവടുകളുമായി നൃത്ത- നൃത്ത്യങ്ങളുടെ മാസ്മരികത വിരിഞ്ഞ അരങ്ങില്, മികവുറ്റ വ്യത്യസ്ത കലാപ്രകടനങ്ങളും, അവതരണങ്ങളും ആസ്വദിക്കുവാനുമുള്ള സുവര്ണാവസരമാണ് വേദിയില് ലഭിച്ചത്.
സെവന് ബീറ്റ്സ് സംഗീതോത്സവത്തില് മാസ്റ്റര് ഓഫ് സെറിമണിയായി അരങ്ങും വേദിയും കയ്യിലെടുത്ത് നര്മ്മവും സംഗീതവും ചാലിച്ച് അനര്ഗളമായ വാക്ധോരണിയില് പരിപാടികള് കോര്ത്തിണക്കിയും ഇടവേളകള്ക്ക് തുടിപ്പും നല്കി ലണ്ടനില് നിന്നുള്ള ജിഷ്മാ മെറി, സാലിസ്ബറിയില് നിന്നുള്ള പപ്പന്, ലൂട്ടനില് നിന്നുള്ള വിന്യാ രാജ് എന്നിവര് അവതാരകരായി കയ്യടി ഏറ്റുവാങ്ങി.
സമ്പന്നമായ സംഗീത നൃത്ത വിരുന്നും, സംഘാടക മികവും, ചാരിറ്റി ഇവന്റിന്റെ കാരുണ്യ മുഖവും തിളങ്ങി നിന്ന സെവന് ബീറ്റ്സ് സംഗീതോത്സവം ഉള്ളു നിറയെ ആനന്ദിച്ചും, ആസ്വദിച്ചും ഹൃദയത്തിലേറ്റിയ യൂകെ മലയാളികള് സീസണ് 8 നു വീണ്ടും കാണാമെന്ന അഭിലാഷവും അറിയിച്ചാണ് വേദി വിട്ടത്. അപ്പച്ചന് കണ്ണഞ്ചിറയുടെ നന്ദി പ്രകാശനത്തോടെ സംഗീതോത്സവ ചാരിറ്റി ഇവന്റിന് സമാപനമായി.
ഓ എന് വി അനുസ്മരണ വേദിയില് 'സ്വരം' മാഗസിന്, മെഡ്ലി, നൃത്തലയം സ്തുത്യുപഹാരമായി:
പത്മശ്രീ ഡോ. ഓ എന് വി സാറിന്റെ അനുസ്മരണ വേദിയില് അദ്ദേഹത്തെ കുറിച്ചുള്ള ഓര്മ്മകളും കവിതകളും ഫോട്ടോകളും കോര്ത്തിണക്കി കൗണ്സിലര് ഡോ. ശിവകുമാര് തയ്യാറാക്കിയ സ്വരം മാഗസിന് സെവന് ബീറ്റ്സ് സംഗീതോത്സവ വേദിയില് വെച്ച് പ്രകാശനം ചെയ്തു. ഡോ. കെ ജെ യേശുദാസ്, പെരുമ്പടവം ശ്രീധരന്, ഡോ. ജയകുമാര് ഐ എ എസ്, പ്രൊഫ. ജോര്ജ്ജ് ഓണക്കൂര്, അപര്ണ്ണാ രാജീവ്, രവി മേനോന് അടക്കം മലയാള സാഹിത്യ ലോകത്തെ നിരവധി പ്രമുഖ വ്യക്തിത്വങ്ങള് എഴുതിയ ലേഖനങ്ങളും സ്മരണകളും ചിത്രങ്ങളും ചേര്ത്ത് തയ്യാറാക്കിയ 'സ്വരം' മാഗസിന് ഓ എന് വി അനുസ്മരണ വേദിയില് സ്തുത്യുപഹാരമായി. 'സ്വരം' മാഗസിന്റെ ആദ്യ ഡിജിറ്റല് കോപ്പി ഓണ്ലൈനായി പ്രകാശനം ചെയ്യുകയായിരുന്നു.
യു കെ യുടെ നാനാഭാഗങ്ങളില് നിന്നും എത്തിയ യുവ യുവഗായകര് ആലപിച്ച ഓ എന് വി യുടെ തൂലികയില് വിരിഞ്ഞ മധുര 'ഗാനങ്ങള്' മഹാകവിക്കുള്ള സംഗീതാര്ച്ചനയായി. സജി ചാക്കോയുടെ നേതൃത്വത്തില് ഓ എന് വി ഗാന ഈരടികള് സമന്വയിപ്പിച്ച് 'ടീം ലണ്ടന്' സമ്മാനിച്ച 'മെഡ്ലി' ഓ എന് വി മാഷിന് സമര്പ്പിച്ച വലിയ ആദരവും ആരാധകര്ക്ക് സംഗീതവിരുന്നുമായി. ഓ എന് വി ഗാനങ്ങള് കോര്ത്തിണക്കി സര്ഗ്ഗം സ്റ്റീവനേജ് 'ടീന്സ്' അവതരിപ്പിച്ച സംഘനൃത്തവും അനുസ്മരണത്തില് ശ്രദ്ധാഞ്ജലിയായി.
'ബിഹൈന്ഡ്' മൂവി ഫസ്റ്റ് ടീസര് വേദി കീഴടക്കി:
യു കെ മലയാളിയും പ്രശസ്ത കലാകാരനുമായ ജിന്സണ് ഇരിട്ടി രചനയും സംവിധാനവും ചെയ്തു നിര്മ്മിച്ച 'ബിഹൈന്ഡ്' മൂവിയുടെ ഫസ്റ്റ് ടീസര് റിലീസിങും സംഗീതോത്സവ വേദിയില് നടന്നു. യു കെ മലയാളി രശ്മി പ്രകാശ് ഗാനമെഴുതി പ്രശസ്ത പിന്നണി ഗായകന് ജി വേണുഗോപാല് ആദ്യമായി സംഗീതം നല്കി ആലപിച്ച ഗാനവും, ബെഡ്ഫോര്ഡില് നിന്നുള്ള പ്രശസ്ത യുവ ഗായിക ഡെന്ന ആന് ജോമോന് ആലപിച്ചഭിനയിച്ച ഗാനവും ബിഹൈന്ഡില് ഉള്ക്കൊള്ളിച്ചിട്ടുണ്ട്. ബീനാ റോയി എഴുതിയ പാട്ടും ചിത്രത്തിന് ഗാന സാന്ദ്രതയേകും. സെവന് ബീറ്റ്സിന്റെ കോര്ഡിനേറ്റര് ജോമോന് മാമ്മൂട്ടിലും ചിത്രത്തില് അഭിനേതാവായി മുഖം കാണിക്കുന്നുമുണ്ട്.
സംഗീതോത്സവ വേദിയുടെ ബഹുമതി; ഏറ്റു വാങ്ങിയത് ഷൈനു മാത്യൂസ്, രശ്മി പ്രകാശ് അടക്കം പ്രമുഖര്:
രാഷ്ട്രീയ, സാമൂഹ്യ, ജീവ കാരുണ്യ, സംരംഭക തലങ്ങളില് ആര്ജ്ജിച്ച മികവിന്റേയും സംഭാവനകളുടെയും അംഗീകാരമായാണ് ഷൈനു ക്ലെയര് മാത്യൂസിനെ അവാര്ഡിനര്ഹയാക്കിയത്. ലേഖനം, കവിത, നോവല് തുടങ്ങിയ സാഹിത്യ ശാഖകളില് നല്കിയ മികച്ച സംഭാവനകളും, അവര് നേടിയ പാലാ നാരയണന് നായര് പുരസ്ക്കാരവും പരിഗണിച്ചാണ് രശ്മി പ്രകാശ് രാജേഷിനു അവാര്ഡ് നല്കിയത്.
ആതുര സേവനത്തിന് ലഭിക്കാവുന്ന ഉന്നത ബഹുമതിയായ 'ചീഫ് നേഴ്സിങ് ഓഫീസര്' എന്ന ദേശീയ എന് എച്ച് എസ് പുരസ്ക്കാരം നേടിയതിലുള്ള അംഗീകാരമായാണ് ലിന്ഡാ സര്ജുവിനെ അവാര്ഡിന് പരിഗണിച്ചത്.
നിയമ മേഖലകളില് പുലര്ത്തുന്ന പ്രാവീണ്യവും, ഉത്തമവും വിശ്വസ്തതവുമായ സേവനവും പരിഗണിച്ചാണ് മികച്ച സോളിസിറ്റര് സ്ഥാപനത്തിനുള്ള അവാര്ഡ് പോള് ജോണിനെ അര്ഹനാക്കിയത്.