ലണ്ടൻ: സ്വന്തം ലേഖകൻ

വേതന വർദ്ധനവിനും  ഓവർ ഡ്യൂട്ടി അടക്കമുള്ള തൊഴിൽ സാഹചര്യങ്ങൾക്കുമെതിരായ പണിമുടക്ക് കാരണം വെള്ളിയാഴ്ച മുതൽ രാജ്യത്തുടനീളമുള്ള റെയിൽ ഗതാഗതം തടസ്സപ്പെടും.

സർക്കാർ ജീവനക്കാരുടെയും സീനിയർ  ഡോക്ടർമാരുടേയും സമരത്തിൽ വേതനവർദ്ധനവുകൾ നൽകി ഒത്തുതീർപ്പുകൾ ഉണ്ടാക്കിയെങ്കിലും ഡ്രൈവർമാർ അടക്കം ട്രെയിൻ ജീവനക്കാരുടെ കാര്യത്തിൽ ഇപ്പോഴും  മുഖംതിരിച്ചു നിൽക്കുകയാണ് സുനക്ക്  സർക്കാർ.

എൽഎൻഇആർ, നോർത്തേൺ എന്നീ രണ്ട് കമ്പനികളിലെ ട്രെയിൻ ഡ്രൈവർമാരും ലണ്ടൻ ഓവർഗ്രൗണ്ട് സ്റ്റാഫും 2024 മാർച്ചിൽ വാക്കൗട്ട് സമര പരമ്പരതന്നെ നടത്തുമെന്ന് പ്രതീക്ഷിക്കുന്നു. കഴിഞ്ഞവർഷം തുടർച്ചയായ സമരങ്ങൾ തന്നെ ട്രെയിൻ ജീവനക്കാർ നടത്തിയിരുന്നു.

അസ്ലെഫ് യൂണിയനിൽ അംഗങ്ങളായ എൽഎൻഇആർ, നോർത്തേൺ എന്നിവിടങ്ങളിലെ ട്രെയിൻ ഡ്രൈവർമാർ മാർച്ച് 1 വെള്ളിയാഴ്ച അർദ്ധരാത്രി മുതൽ 24 മണിക്കൂർ പണിമുടക്കാണ്  നടത്തുക.

അതിനാൽ ഇന്നുരാത്രി മുതലും നാളെ പൂർണ്ണമായും വടക്കൻ സർവീസുകളൊന്നും ഉണ്ടാകില്ല, മിക്ക എൽഎൻഇആർ റൂട്ടുകളിലും കുറഞ്ഞ സർവീസ് മാത്രമേയുള്ളൂ.

മാർച്ച് 1 വെള്ളിയാഴ്ച്ച അർദ്ധരാത്രിയിൽ ആരംഭിച്ച് മാർച്ച് 2 ശനിയാഴ്ച വരെ നീണ്ടുനിൽക്കുന്ന സമരത്തിൽ, ഓവർടൈം ഷിഫ്റ്റുകൾ ജോലിചെയ്യുന്നതിനുള്ള നിരോധനം അംഗങ്ങൾ ഇതിനകം ആരംഭിച്ചിട്ടുണ്ട്.

300 ലധികം ലണ്ടൻ ഓവർഗ്രൗണ്ട് തൊഴിലാളികൾ മാർച്ച് 4 തിങ്കളാഴ്ച അർദ്ധരാത്രി മുതൽ 24 മണിക്കൂർ വാക്കൗട്ട് നടത്തും.

RMT യൂണിയനിൽ അംഗങ്ങളായ സെക്യൂരിറ്റി, സ്റ്റേഷൻ, റവന്യൂ, കൺട്രോൾ സ്റ്റാഫ് എന്നിവ ഇതിൽ ഉൾപ്പെടും.

യാത്രയ്ക്ക് മുമ്പ്  ട്രെയിൻ യാത്രക്കാർ സർവീസുകളുടെ ലഭ്യതയും സമയവും പരിശോധിക്കാൻ റെയിൽ അധികൃതർ നിർദ്ദേശിക്കുന്നു. സർവീസുകൾ പ്രവർത്തിക്കുന്നുണ്ടോ എന്നതിനെക്കുറിച്ചുള്ള വിവരങ്ങൾക്ക്, നാഷണൽ റെയിൽ വെബ്സൈറ്റ് പരിശോധിക്കുക.

മാർച്ചുമാസം അവസാന വാരംവരെ ട്രെയിൻ ജീവനക്കാരുടെ  തുടർച്ചയായ സമരങ്ങൾ പ്രതീക്ഷിക്കുന്നു. ഇതിൽ പൊതുമേഖലാ ജീവനക്കാരുടെ സമരങ്ങളും ഉൾപ്പെടും. എന്നാൽ യൂണിയനുകൾ സമരദിവസങ്ങൾ ഔദ്യോഗികമായി ഇതുവരെ പ്രഖ്യാപിച്ചിട്ടില്ല.

പണിമുടക്ക് ദിവസങ്ങളിലെ ടിക്കറ്റ് ചാർജ്ജ് തിരികെ ലഭിക്കുമോ?

മുൻകൂർ ടിക്കറ്റെടുത്തിട്ടുള്ള റെയിൽവേ യാത്രക്കാർക്ക്, അവർ ബുക്ക് ചെയ്തിരിക്കുന്ന ട്രെയിൻ റദ്ദാക്കുകയോ വൈകുകയോ അല്ലെങ്കിൽ പണിമുടക്കിനെത്തുടർന്ന് റീ ഷെഡ്യൂൾ ചെയ്യുകയോ ചെയ്‌താൽ ടിക്കറ്റ് ചാർജ്ജ്  സൗജന്യമായി തിരികെ ലഭിക്കും 

യാത്രക്കാർക്ക് റിട്ടേൺ ടിക്കറ്റ് ഉണ്ടെങ്കിൽ, യാത്രയുടെ ഏതെങ്കിലും ഭാഗം റദ്ദാക്കിയാൽ അവർക്ക് ഫീസ് രഹിത റീഫണ്ടിനും അർഹതയുണ്ട്.

യാത്ര ചെയ്യാൻ കഴിയാത്ത സീസൺ ടിക്കറ്റ് ഉടമകൾക്ക് (ഫ്ലെക്സിയോ, പ്രതിമാസമോ അതിൽ കൂടുതലോ) സ്ട്രൈക്ക് തീയതികളിൽ 100% നഷ്ടപരിഹാരം ഡിലേ റീപേ സ്കീം വഴി ക്ലെയിം ചെയ്യാം .

വേതന വർദ്ധനവിനായി രണ്ടുവർഷമായി നീളുന്ന സമരം 

ഋഷി സുനക്ക്  പ്രധാനമന്ത്രിയായി അധികാരമേൽക്കുന്നതിനും മുമ്പേ തുടങ്ങിയതാണ് ട്രെയിൻ ജീവനക്കാരുടെ വേതന വർധനവിനായുള്ള സമരം. എന്നാൽ ഇക്കാര്യത്തിൽ ഫലപ്രദമായ ചർച്ചകൾ നടത്താൻ സർക്കാരിനും മന്ത്രിമാർക്കും ഇതേവരെ കഴിഞ്ഞിട്ടില്ല.

അസ്‌ലെഫ് അതിൻ്റെ അംഗങ്ങൾക്ക് മെച്ചപ്പെട്ട വേതനം തേടുകയാണെന്നും പണപ്പെരുപ്പത്തിന് താഴെയുള്ള വേതന വർദ്ധനവിന് പകരമായി തൊഴിൽ സാഹചര്യങ്ങൾ ഉപേക്ഷിക്കാൻ  ഡ്രൈവർമാരോട് ആവശ്യപ്പെടുകയാണെന്നും പറയുന്നു.

2023 ഏപ്രിലിൽ, സർക്കാർ ഓഫർ ചെയ്‌ത തുടർച്ചയായി രണ്ട് വർഷത്തേക്കുള്ള 4% ശമ്പള വർദ്ധനവ് അസ്‌ലെഫ്  എക്സിക്യൂട്ടീവ് കമ്മിറ്റി നിരസിച്ചു. പിന്നീട് ഔദ്യോഗിക ചർച്ചകളൊന്നും നടന്നിട്ടില്ല.