സ്വന്തം ലേഖകൻ

ഭാര്യയും ഭര്‍ത്താവും തമ്മില്‍ വഴക്കുണ്ടാവുകയും ചിലപ്പോള്‍ ഭാര്യ പിണങ്ങി പോവുക ഇതെല്ലാം സ്വാഭാവികമാണ്. ദേഷ്യമൊന്ന് കുറയുമ്പോഴോ അല്ലെങ്കില്‍ ഭാര്യ കൂടെയില്ലെന്ന വിഷമം താങ്ങാതെ വരുമ്പോഴോ ഭാര്യയെ തിരിച്ചുവിളിച്ചുകൊണ്ടുവരുന്നതും ഇന്ന് എല്ലായിടത്തും നടക്കുന്ന കാര്യമാണ്. എന്നാല്‍ ഭാര്യയെ തിരിച്ചുകൊണ്ടുവരാന്‍ പണം കൊടുക്കേണ്ട ഗതികേടാണ് ഒരു ഭര്‍ത്താവിന്.

ആഗ്ര കുടുംബകോടതിയില്‍ ആണ് ഇത്തരത്തില്‍ വളരെ വ്യത്യസ്തമായ ഒരു പരാതി വന്നത്. 2022ല്‍ ആഗ്രയിലെ ഇറാദത്ത് നഗര്‍ സ്വദേശിയായ യുവാവും ഫിറോസാബാദ് ജില്ലയിലെ രാംഗഢില്‍ നിന്നുള്ള യുവതിയും വിവാഹിതരായി. പക്ഷെ വിവാഹ ശേഷം ഭാര്യയും ഭര്‍ത്താവും തമ്മില്‍ പ്രശ്‌നങ്ങള്‍ ആരംഭിച്ചു. ഭാര്യ പിണങ്ങി അവരുടെ വീട്ടിലേക്ക് പോയി. 

എന്നാല്‍ പ്രശ്‌നങ്ങള്‍ പരിഹരിക്കാനും ഭാര്യയെ വീട്ടിലേക്ക് കൊണ്ടു വരാനുമായി ഭര്‍ത്താവ് ഭാര്യ വീട്ടിലെത്തി. പക്ഷെ മകളെ തിരിച്ചയക്കണമെങ്കില്‍ 50,000 രൂപ നല്‍കണമെന്നായിരുന്നു ഭാര്യാ മാതാവ് പറഞ്ഞത്. അത് ഇയാള്‍ എങ്ങനെയോ സംഘടിപ്പിച്ച് കൊടുത്തു. പക്ഷെ വീട്ടിലെത്തിയ ഭാര്യ അധികം വൈകാതെ വീണ്ടും പിണങ്ങി പോയി. ഇക്കുറി തിരിച്ചു വിളിക്കാന്‍ ചെന്നപ്പോള്‍ ഭാര്യാമാതാവ് ആവശ്യപ്പെട്ടത് അഞ്ച് ലക്ഷം ആയിരുന്നു. മകള്‍ പിണങ്ങിപ്പോന്ന് സ്വന്തം വീട്ടില്‍ നിന്നപ്പോള്‍ ചെലവ് വന്ന തുകയാണ് അതെന്നാണ് അമ്മായിഅമ്മ പറഞ്ഞത്. അങ്ങനെയാണ് യുവാവ് കുടുംബകോടതിയില്‍ എത്തിയത്. 

ഭാര്യയും അമ്മയ്‌ക്കൊപ്പം നില്‍ക്കുകയായിരുന്നു. പക്ഷെ യുവതിക്ക് അയല്‍ക്കാരനുമായി സൗഹൃദമുണ്ടെന്നും അതാണ് പതിവായി വഴക്കുണ്ടാകാനുള്ള കാരണമെന്നും യുവാവ് ആരോപിക്കുന്നു. എന്തായാലും ഇവരെ ഫാമിലി കൗണ്‍സിലിങ്ങിന് വിധേയരാക്കിയിരിക്കുകയാണ്.