ലണ്ടൻ: സ്വന്തം ലേഖകൻ

കഴിഞ്ഞ ഒരു ദശാബ്ദത്തിലേറെയായി ഓസ്‌ട്രേലിയയാണ് ഇന്ത്യൻ വിദ്യാർത്ഥികളുടെ പ്രധാന വിദേശപഠന തട്ടകം. പ്രവേശന നിയമത്തിലെ ഇളവുകളും പോസ്ററ് സ്‌റ്റഡി വർക്ക് വിസകളും സെറ്റിൽമെന്റിനുള്ള സാധ്യതയും ഓസ്‌ട്രേലിയയെ ഇന്ത്യൻ വിദ്യാർത്ഥികളുടെ ഏറ്റവും പ്രിയപ്പെട്ട പഠനകേന്ദ്രമാക്കി മാറ്റി.

നിയമങ്ങളിൽ ഇളവുകൾ വരുത്തിയും പോസ്റ്റ് സ്റ്റഡി വർക്ക് പെർമിറ്റ് പുനരാരംഭിച്ചും ബ്രെക്‌സിറ്റിനുശേഷം യുകെയും ആഞ്ഞുപിടിച്ചപ്പോൾ, കഴിഞ്ഞവർഷങ്ങളിൽ ഏറ്റവും അധികം ഇന്ത്യൻ വിദ്യാർഥികൾ പഠനത്തിനായി തിരഞ്ഞെടുത്ത വിദേശ രാജ്യം ബ്രിട്ടനായും മാറി.

ജനസംഖ്യ തീരെക്കുറഞ്ഞ കാനഡയാകട്ടെ, കാൽനൂറ്റാണ്ടിലേറെക്കാലമായി ലോകത്തിന്റെ വിവിധ ഭാഗങ്ങളിൽ നിന്നും വിദ്യാർത്ഥികളെയും കുടിയേറ്റക്കാരെയും വ്യാപകമായി സ്വീകരിക്കുന്നു.

എന്നാൽ ഇപ്പോൾ സ്ഥിതി തികച്ചും വ്യത്യസ്തമാണ്. യുകെയ്ക്കു പിന്നാലെ വീണ്ടും കുടിയേറ്റ നിയന്ത്രണ നിയമങ്ങൾ കർശനമാക്കുകയാണ്, ഓസ്ട്രേലിയയും കാനഡയും.  

ഉന്നത വിദ്യാഭ്യാസത്തിനായി ഏറ്റവുമധികം വിദ്യാർത്ഥികൾ വിദേശത്തേക്ക് പോകുന്ന ലോകത്തിലെ ഏറ്റവും വലിയ അഞ്ച് രാജ്യങ്ങളിലൊന്നാണ് ഇന്ത്യ. 2024 ആകുമ്പോഴേക്കും ഏകദേശം 1.8 ദശലക്ഷം ഇന്ത്യൻ വിദ്യാർത്ഥികൾ വിദേശത്ത് പഠിക്കുന്നുണ്ടാകുമെന്ന് ഇതുസംബന്ധിച്ച ഏറ്റവും പുതിയ റിപ്പോർട്ടിൽ പറയുന്നു. വിദേശത്ത് പഠിക്കുവാൻ ആഗ്രഹിക്കുന്ന ഇന്ത്യൻ വിദ്യാർഥികളുടെ എണ്ണത്തിൽ ഒരു കുറവും വന്നിട്ടില്ലെന്നാണ് ഇത് തെളിയിക്കുന്നത്. 

കഴിഞ്ഞമാസങ്ങളിൽ, യുകെയിൽ നിന്നും ഓസ്‌ട്രേലിയയിൽ നിന്നും അടുത്തിടെ കാനഡയിൽ നിന്നുമുള്ള കുടിയേറ്റ നിയന്ത്രണ നിയമമാറ്റ അറിയിപ്പുകൾ ഇന്ത്യൻ വിദ്യാർത്ഥികളുടെ ഇമിഗ്രേഷനിലും വരവിലും നിയന്ത്രിത മാറ്റങ്ങൾ വരുത്തുന്നതാണ്.

തീർച്ചയായും ഇത് വിദേശ വിദ്യാഭ്യാസം നടത്താൻ ആഗ്രഹിക്കുന്ന ഇന്ത്യൻ വിദ്യാർത്ഥികൾക്കിടയിൽ കനത്ത  ആശങ്ക സൃഷ്ടിക്കുന്നു. സമീപകാല റിപ്പോർട്ടുകൾ ഈ മാറ്റത്തിന് അടിവരയിടുന്നു. 2024-ൽ വിദേശ പഠനത്തിന് അപേക്ഷിക്കുന്ന ഇന്ത്യൻ വിദ്യാർത്ഥികളിൽ ഗണ്യമായ കുറവുണ്ടായതായി വെളിപ്പെടുത്തുന്നു. എന്നാൽ ഇന്ത്യയിൽ നിന്നുള്ള വിദേശ വിദ്യാഭ്യാസത്തിനായുള്ള അന്വേഷണങ്ങൾ ഇപ്പോഴും ഉയർന്ന നിലയിൽ തുടരുന്നു.

ഈ ഗ്യാപ്പിലേക്കാണ് മറ്റുചില രാജ്യങ്ങളുടെ കടന്നുവരവ്. അതിൽ ഒന്നാമത് ജർമ്മനിയാണ്. അയർലാൻഡും ഫ്രാൻസും ഇറ്റലിയും ജപ്പാനും ഓസ്ട്രിയയുമൊക്കെ പിന്നാലെ പട്ടികയിൽ ഇടംപിടിക്കുന്നു.

കാനഡയെപ്പോലെ ജനസംഖ്യാ കുറവ് കാര്യമായി ബാധിച്ചിട്ടുള്ള രാജ്യമാണ് ജർമ്മനി. പ്രാദേശിക രാഷ്ട്രീയ കക്ഷികൾ എതിർക്കുന്നുണ്ടെങ്കിലും അതിനെ മറികടന്ന് കൂടുതൽ വിദേശ വിദ്യാർഥികളെയും കുടിയേറ്റക്കാരെയും രാജ്യത്തേക്ക് എത്തിക്കാനുള്ള തയ്യാറെടുപ്പിലാണ് ജർമൻ സർക്കാർ.

ഇതിനായി പ്രവേശന യോഗ്യതകളിൽ ജർമ്മനി കാര്യമായ ഇളവുകൾ പ്രഖ്യാപിച്ചിട്ടുണ്ട്. ജർമൻ ഭാഷ അറിയണമെന്നതായിരുന്നു  ഇതുവരെയുള്ള വലിയൊരു കടമ്പ. എന്നാൽ ഇപ്പോൾ ഇംഗ്ലീഷിന് കൂടുതൽ പ്രാധാന്യം നൽകി ഇളവുകൾ അനുവദിക്കുന്നു. 

ഇതിനുപുറമേ സൗജന്യ വിദ്യാഭ്യാസവും സ്റ്റൈപ്പെൻഡും സ്‌കോളർഷിപ്പും മറ്റും വാഗ്ദാനം ചെയ്താണ് ജർമ്മനി വിദേശ വിദ്യാർത്ഥികളെ ആകർഷിക്കുന്നത്. നിരവധി ഇന്ത്യൻ വിദ്യാർഥികളും തൊഴിലാളികളും ഇപ്പോൾ ജർമനിയിലേക്ക് കുടിയേറുന്നു.

റിപ്പബ്ലിക് ഓഫ് അയർലൻഡ് ആണ്  കുടിയേറ്റ നിയമങ്ങളിൽ കൂടുതൽ ഇളവുകൾ അനുവദിച്ചിട്ടുള്ള മറ്റൊരു രാജ്യം. നഴ്സുമാരും ഹെൽത്ത് കെയർ സ്റ്റാഫുകളും ഉൾപ്പെടെയുള്ളവരെ അയർലൻഡ് ക്ഷണിക്കുന്നു. ബ്രിട്ടനെ അപേക്ഷിച്ച് യോഗ്യതാ മാനദണ്ഡങ്ങളിൽ അയർലൻഡ് കൂടുതൽ ഇളവുകൾ നൽകുന്നു. ആരോഗ്യമേഖലയിലെ വിദ്യാർത്ഥികളെയും വ്യാപകമായി ക്ഷണിക്കുന്നു.

ഫ്രാൻസും ഇറ്റലിയും ജപ്പാനും ഓസ്ട്രിയയുമൊക്കെ ഇപ്പോൾ ഇന്ത്യൻ വിദ്യാർത്ഥികൾ പഠനത്തിനായി തിരഞ്ഞെടുക്കുന്ന മറ്റു രാജ്യങ്ങളാണ്. ഇവിടെനിന്ന് യോഗ്യത നേടിയാൽ യൂറോപ്പ്യൻ യൂണിയനിൽ എവിടെയും ജോലിചെയ്യാനും കുടിയേറാനും കഴിയും എന്നതും മുഖ്യ പരിഗണനയിലുണ്ട്.

അതേസമയം തീരെ യോഗ്യത കുറഞ്ഞവർ ഉസ്ബക്കിസ്ഥാനും ചെക്കോസ്ലോവാക്കിയയും സ്പെയിനും ഒക്കെ തിരഞ്ഞെടുക്കുന്നുമുണ്ട്. ഇവിടെനിന്നും യൂറോപ്പിലേക്കും യുകെയിലേക്കും എളുപ്പം കടക്കാനാകും എന്നതാണ് കാരണം.

ചിലവ് കൂടുതലാണെങ്കിലും ഒരു ഇടവേളയ്ക്കുശേഷം യുഎസിലെ കോഴ്സുകളിലേക്ക് അപേക്ഷിക്കുന്ന ഇന്ത്യൻ വിദ്യാർത്ഥികളുടെ എണ്ണത്തിലും ഈ വർഷം ഗണ്യമായ വർദ്ധനവ് പ്രകടമാണ്.