പ്രായപൂര്‍ത്തിയാകാത്ത പെണ്‍കുട്ടിയെ കഞ്ചാവ് ഉപയോഗിക്കാന്‍ പ്രേരിപ്പിക്കുകയും ദൃശ്യങ്ങള്‍ സമൂഹമാദ്ധ്യമങ്ങളിലൂടെ പ്രചരിപ്പിക്കുകയും ചെയ്ത വ്ളോഗര് എക്സൈസ് പിടിയില്‍. മട്ടാഞ്ചേരി മാര്‍ട്ടിന്‍ എന്നറിയപ്പെടുന്ന ഫ്രാന്‍സിസ് നെവിന്‍ അഗസ്റ്റിന്‍(35) ആണ് പിടിയിലായത്. ഇതിന്റെ വീഡിയോ ദൃശ്യങ്ങള്‍ സമൂഹമാദ്ധ്യമങ്ങളില്‍ പ്രചരിപ്പിച്ചവര്‍ക്കെതിരെയും എക്സൈസ് കേസെടുത്തിട്ടുണ്ട്. ഇയാളുടെ വീട്ടില്‍ നിന്നും രണ്ട് ഗ്രാം കഞ്ചാവും എക്സൈസ് പിടിച്ചെടുത്തു.
കഞ്ചാവ് മയക്കുമരുന്ന് അല്ല, മരുന്നാണ്. തന്റെ രോഗത്തിന് ഏറെ ഫലപ്രദമായ മരുന്നാണ് കഞ്ചാവെന്നും അതുകൊണ്ടാണ് താന്‍ ഉപയോഗിക്കുന്നതെന്നും ഫ്രാന്‍സിസ് പറഞ്ഞു. കേസില്‍ അറസ്റ്റിലായി പൊലീസ് സ്റ്റേഷനില് എത്തിച്ചപ്പോഴാണ് ഫ്രാന്‍സിസ് നെവിന്‍ കഞ്ചാവ് ഉപയോഗത്തെ ന്യായീകരിച്ചത്. ലോകത്ത് ഏറ്റവും വിഷമുള്ളത് മനുഷ്യരിലാണ് കഞ്ചാവില്‍ അല്ലെന്നും ഫ്രാന്‍സിസ് പറഞ്ഞു.ഫ്രാന്‍സിസ് നെവിന്‍ പറഞ്ഞത്:
''ചീര തിന്നാറുണ്ടോ. കാബേജ് തിന്നാറുണ്ടോ. കാരറ്റ് തിന്നാറുണ്ട്. ചായ കുടിക്കാറുണ്ട്. കാപ്പി കുടിക്കാറുണ്ട്. ഇതൊക്കെ എന്താണെന്ന് ചോദിക്കുമ്പോള്‍ പറയും. അതെല്ലാം പച്ചക്കറികളാണെന്ന്. പിന്നെ കഞ്ചാവ് എന്താണ് സാറേ. അതും ഭൂമിയില്‍ വിത്ത് വീണ് മുളച്ച് വളരുന്ന ചെടിയാണ്. കഞ്ചാവ് മയക്കുമരുന്ന് അല്ല. അതൊരു മരുന്നാണ്. അതുകൊണ്ടാണ് ഞാന്‍ കഞ്ചാവ് ഉപയോഗിക്കുന്നത്. കഞ്ചാവ് എന്റെ രക്തമാണ്, ജീവിതമാണ്. ഞാന്‍ മരിക്കുന്നത് വരെ ഇത് വലിക്കും. ആരൊക്കെ എന്തൊക്കെ പറഞ്ഞാലും. കാരണം കഞ്ചാവ് തെറ്റായിട്ട് എനിക്ക് തോന്നിയിട്ടില്ല. കാരണം അത് ഭൂമിയില്‍ വിത്ത് മുളച്ച് വരുന്ന ചെടിയാണ്.''
''ഈ ഭൂമിയില്‍ എന്തൊക്കെയുണ്ട് സാറേ. ഈ ലോകത്ത് ഏറ്റവും വിഷമുള്ളത് എന്താണെന്ന് സാറിന് അറിയുമോ. ഞാനും സാറുമൊക്കെയാണ്. മനുഷ്യരാണ്. ഞാന്‍ പ്രകൃതിയെ സ്നേഹിക്കുന്ന വ്യക്തിയാണ്. ഭൂമിയെ മതവും ദൈവവുമായി കണ്ട് സ്നേഹിക്കുന്ന വ്യക്തിയാണ് ഞാന്‍. മനസിലായോ. ഇനി നിങ്ങള്‍ക്ക് എന്ത് വേണമെങ്കിലും എഴുതാം എന്നെക്കുറിച്ച്. ഞാന്‍ ഇനി ഒന്നിനുമില്ല. ആരുമായിട്ട് മത്സരിക്കാനോ തല്ല് പിടിക്കാനോ ഞാനില്ല.'' ''ഞാനൊരു രോഗിയാണ്. സംസാരശേഷിയും കാഴ്ചശക്തിയും പോയതാണ്. മെഡിക്കല്‍ ട്രസ്റ്റില്‍ ചികിത്സയിലായിരുന്നു. ജീവിതകാലം മുഴുവന്‍ മരുന്നു കഴിക്കണമെന്നാണ് ഡോക്ടര്‍ പറഞ്ഞത്.
മരുന്ന് വാങ്ങാന്‍ എന്റെ കൈയില്‍ പൈസയില്ല, സാറേ. എന്നോടൊരു യോഗിയും വെള്ളക്കാരുമാണ് പറഞ്ഞത് നിന്റെ അസുഖത്തിന് ഏറ്റവും നല്ല മരുന്ന് കഞ്ചാവാണെന്ന്. അങ്ങനെയാണ് ഞാന്‍ കഞ്ചാവ് നിത്യവും ഉപയോഗിക്കാന്‍ തുടങ്ങിയത്. കഞ്ചാവ് ഉപയോഗിച്ച ശേഷമാണ് ഞാന്‍ നടക്കാന്‍ തുടങ്ങിയതും സംസാരിക്കാന്‍ തുടങ്ങിയതും. ഇത് പറയുമ്പോള്‍ എല്ലാവരും ചിരിക്കും. എന്റെ അസുഖം ഒരുദിവസം നിങ്ങള്‍ക്കും വരും. അപ്പോള്‍ നിങ്ങള്‍ അനുഭവിക്കും. അപ്പോള്‍ നിങ്ങള്‍ക്ക് മനസിലാകും.'' ''ഇവിടെ സിഗരറ്റ് വലിക്കാം. സിഗരറ്റ് വലിക്കുന്നത് പ്രകൃതിക്ക് എതിരാണെന്ന് ചിന്തിച്ചിട്ടുണ്ടോ. ക്യാന്‍സര്‍ വരുമെന്നും. നിങ്ങ മരിച്ചോ. എന്തിനാണ് നമ്മള്‍ക്ക് ജീവന്‍ നല്‍കുന്ന ചെടികളെ കൊല്ലുന്നത്. നമ്മള്‍ വലിക്കുന്നതിന്റെ ബാക്കി അവരാണ് വലിക്കുന്നത്. അതിനൊന്നും ഒരു കുഴപ്പവുമില്ല.''
സോഷ്യല്‍ മീഡിയയില്‍ പെണ്‍കുട്ടിയുമായി കഞ്ചാവ് വലിക്കുന്ന വിവരങ്ങള്‍ ചര്‍ച്ച ചെയ്യുന്ന വീഡിയോ വൈറലായതോടെ അന്വേഷണത്തിന്റെ ഭാഗമായി ഇയാളുടെ വീട്ടില്‍ ഉദ്യോഗസ്ഥര്‍ എത്തുകയായിരുന്നു. വീട് പരിശോധിച്ചെങ്കിലും ഒന്നും ലഭിച്ചില്ല. തുടര്‍ന്ന് നെവിന്‍ ഫ്രാന്‍സിസിന്റെ ദേഹപരിശോധന നടത്തിയപ്പോള്‍ അടിവസ്ത്രത്തില്‍ നിന്നും 2 ഗ്രാം കഞ്ചാവ് കണ്ടെടുത്തു. ഇതിനെ തുടര്‍ന്ന് ഇയാളെ മട്ടാഞ്ചേരി എക്സൈസ് റേയ്ഞ്ച് ഇന്‍സ്പെക്ടര്‍ വി.എസ് പ്രദീപിന്റെ നേതൃത്വത്തില്‍ അറസ്റ്റ് ചെയ്തു.
2 ഗ്രാം കഞ്ചാവ് പിടികൂടിയാല്‍ സ്റ്റേഷന്‍ ജാമ്യത്തില്‍ വിടാനാകും. എന്നാല്‍ സോഷ്യല്‍ മീഡിയ വഴി ലഹരി ഉപയോഗിക്കണമെന്ന് ആഹ്വാനം ചെയ്തതിനാല്‍ കോടതിയില്‍ ഹാജരാക്കുമെന്നാണ് പോലീസ് പറയുന്നത്. ലഹരി ഉപയോഗിക്കുന്നുണ്ടെന്ന് തുറന്ന് സമ്മതിക്കുകയും അത് പ്രോത്സാഹിപ്പിക്കുകയും ചെയ്യുന്ന ഇയാളുടെ വീഡിയോയാണ് ഇപ്പോള്‍ സമൂഹമാദ്ധ്യമങ്ങളില്‍ വൈറലാകുന്നത്. ഇയാളും പെണ്‍കുട്ടിയും തമ്മില്‍ ലൈവിലായിരുന്നു സംഭാഷണം. പ്ലസ് ടു കഴിഞ്ഞിരിക്കുകയാണെന്നും കഞ്ചാവ് ഉപയോഗിക്കാറുണ്ടെന്നും പെണ്‍കുട്ടി പറയുന്നു.
കഞ്ചാവ് വലിക്കുന്നതിനെ പൊകയടി എന്നാണ് ഇവര്‍ വിശേഷിപ്പിക്കുന്നത്. നീ പൊകയടി ഉണ്ടോ എന്ന് വ്ലോഗര് ചോദിക്കുമ്പോള്‍ 'ഇപ്പോ ബോങ് ഒക്കെ അടിച്ചുനടക്കുന്നു, വേറെ എന്ത് പരിപാടി' എന്നായിരുന്നു പെണ്‍കുട്ടിയുടെ മറുപടി.
അത് പൊളിച്ചുവെന്നും ഗോ ഗ്രീന്‍ എന്നും പറയുന്ന വ്ലോഗര്, അത് പച്ചക്കറിയാണെന്നും പറയുന്നുണ്ട്. താന്‍ 24 മണിക്കൂറും അടിയാണെന്നും നാട്ടില്‍ വന്നിട്ട് അടിക്കാമെന്നും ഇയാള്‍ ഉറപ്പുനല്‍കുന്നു.
സാധനം ഒന്നും കിട്ടാനില്ലെന്ന് പെണ്‍കുട്ടി പരിഭവം പറയുമ്പോള്‍ ഫോര്‍ട്ട് കൊച്ചി വരെ കയറാന്‍ പറ്റോ, അല്ലെങ്കില്‍ കോതമംഗലം വരെ പോകാന്‍ പറ്റോ എന്നാണ് ഇയാള്‍ ചോദിക്കുന്നത്. തുടര്‍ന്ന് സുഹൃത്തിനോടൊപ്പം പോയപ്പോള്‍ കഞ്ചാവ് കൈവശം വെച്ചതിന് പോലീസ് പിടികൂടിയെന്നും വീട്ടുകാര്‍ ഇറക്കിക്കൊണ്ട് വന്നുവെന്നും പെണ്‍കുട്ടി പറയുന്നുണ്ട്.
പ്ലസ്ടു മാത്രം കഴിഞ്ഞ, പ്രായപൂര്‍ത്തിയായിട്ടില്ലെന്നു കരുതുന്ന തൃശൂര്‍ സ്വദേശിനിയുടെ ലഹരിചര്‍ച്ച പുറത്തുവരുമ്പോള്‍ പൊളിയുന്നത് വന്‍ ഇടപാടുകള്‍. ''പൈസയൊണ്ട്!, സാധനം കിട്ടുന്നില്ല... അതാണ് പ്രശ്‌നം.. ഇവിടെയൊക്കെ നാടനാണ്..ഫോര്‍ട്ട് കൊച്ചിക്കു കയറാമോ.. അല്ലെങ്കില്‍ കോതമംഗലം വരെ പോകൂ'' - കഞ്ചാവു ലഭിക്കാന്‍ കോതമംഗലത്തേക്കു പോകാന്‍ ഉപദേശിക്കുന്നത് സമൂഹമാധ്യമങ്ങളില്‍ നിരവധി ഫോളോവേഴ്‌സുള്ള പ്രമുഖ വ്ലോഗര്. ചെറിയ കുട്ടികള്‍ പോലും എത്രത്തോളം ലഹരിക്ക് അടിമയാണെന്നു വ്യക്തമാക്കുന്ന ഞെട്ടിക്കുന്ന വിഡിയോ കഴിഞ്ഞ ദിവസമാണ് സമൂഹമാധ്യമങ്ങളിലൂടെ പുറത്തു വന്നത്. പ്ലസ്ടു കാരി എന്നു പറഞ്ഞു ചെറുതാക്കണ്ട, ''നമ്മള്‍ ജയിലിലായിരുന്നടേ.. അതറിയാമോ നിങ്ങള്‍ക്ക്..'' എന്നു പെണ്‍കുട്ടി തന്നെ വിഡിയോയില്‍ പറയുന്നുണ്ട്.
''തൃശൂരാണ്..'' എന്നു പറഞ്ഞു തുടങ്ങുന്ന വിഡിയോയില്‍, ആണ്‍കുട്ടിയോടോ പെണ്‍കുട്ടിയോടോ എന്ന് അറിയാതെയാണ് വ്ലോഗര് സംസാരിച്ചു തുടങ്ങുന്നത്. ഒപ്പം രണ്ടു പേര്‍ കൂടിയുണ്ടെങ്കിലും ഇരുവരും സംസാരിച്ചു തുടങ്ങുമ്പോള്‍ അവര്‍ ഗ്രൂപ്പ് ചാറ്റില്‍നിന്ന് ഇറങ്ങിപ്പോകുന്നുണ്ട്. പെണ്‍കുട്ടിയാണെന്നു പറഞ്ഞപ്പോള്‍ വ്‌ലോഗര്‍ക്കും അതിശയം. എന്തൊക്കെയാണ് പരിപാടിയെന്ന പെണ്‍കുട്ടിയുടെ ചോദ്യത്തിന് ''24X7 പൊകയടി'' എന്നു വ്ലോഗര്. തിരിച്ചുള്ള ചോദ്യത്തിനുള്ള മറുപടിയും അതു തന്നെ.. ''പ്ലസ്ടു കഴിഞ്ഞു.. ഇപ്പം പോങ്കൊക്കെയടിച്ച് ഇങ്ങനെ നടക്കുന്നു.. വേറെ എന്ത് പരിപാടി..'' - എന്നു പെണ്‍കുട്ടി.
പ്ലസ്ടൂകാരിയുടെ പുകയടി വിശേഷം കേട്ട് ആദ്യം വ്ലോഗര് ഞെട്ടുന്നുണ്ടെങ്കിലും ഗോ ഗ്രീന്‍ എന്നു പ്രോല്‍സാഹിപ്പിക്കുന്നുണ്ട്. പുകയടിക്കുന്ന കാര്യം അമ്മയ്ക്കറിയാമെന്നും വഴക്കു പറയുമ്പോള്‍ നോ മൈന്‍ഡ്.. എന്നു പെണ്‍കുട്ടി. ''പച്ചക്കറിയാണ്.. ഇത്.. വെജിറ്റബിളാണ്'' എന്നു വ്‌ലോഗറുടെ ന്യായീകരണം. കഞ്ചാവടിച്ചാലും സിഗരറ്റ് വലിക്കരുതെന്ന ഉപദേശം നല്‍കുന്നുണ്ട്. സമൂഹ മനഃസാക്ഷിയെ ഞെട്ടിക്കുന്ന വിഡിയോ കണ്ടെന്നും കൂടുതല്‍ വിവരങ്ങള്‍ക്കായി അന്വേഷണം നടക്കുകയാണെന്നും തൃശൂര്‍ റൂറല്‍ എസ്പി ഐശ്വര്യ ഡോങ്‌റെ പ്രതികരിച്ചു.
''നിങ്ങളെ കാണണമെന്നു ഭയങ്കര ആഗ്രഹമാണ്..'' എന്നു പെണ്‍കുട്ടി പറയുമ്പോള്‍ ''നാട്ടില്‍ വരും.. അന്നേരം ഒരുമിച്ച് ഇരുന്ന് അടിക്കാം.'' എന്ന് വ്ലോഗര്. ''വീട്ടില്‍നിന്ന് ഇറങ്ങിപ്പോയതായിരുന്നെന്നും സുഹൃത്തുക്കള്‍ക്കൊപ്പം കണ്ണൂരായിരുന്നെന്നും പെണ്‍കുട്ടി പറയുന്നു. ഒരു സുഹൃത്തിനൊപ്പം കഞ്ചാവു വില്‍ക്കാന്‍ പോയപ്പോള്‍ പിടിയിലായി കുറച്ചുകാലം ജയിലില്‍ കിടന്നെന്നും പപ്പ ഇറക്കിയെന്നും പെണ്‍കുട്ടി പറയുന്നു. പപ്പ ആര്‍മിയിലാണ്. ഇപ്പോള്‍ വീട്ടിലാരും തന്നോടു മിണ്ടുന്നില്ലെന്നും അവര്‍ പോയി പണി നോക്കട്ടെയെന്നും പെണ്‍കുട്ടി പറയുന്നു.
More Latest News
തിരുവില്ലക്കാട്ട് മന ദാമോദരന്‍ നമ്പൂതിരിപ്പാട് വിട പറയുമ്പോള്‍, മണ്മറയുന്നത് സ്റ്റീവനേജ് മലയാളികളുടെ 'സമ്പന്നമായ സ്മൃതി ശേഖരം', ഒപ്പം ബോംബെ മലയാളികളുടെ 'സാംസ്‌കാരിക-സാമൂഹ്യ സഹയാത്രികനേയും'
ന്യൂപോര്‍ട്ട് സെന്റ് ജോസഫ് പ്രോപോസ്ഡ് മിഷന്‍ പ്രഖ്യാപനം ആഘോഷമാക്കാന്‍ വിശ്വാസികള്‍; യൗസേപ്പിതാവിന്റെ തിരുനാളും മിഷന്‍ പ്രഖ്യാപനവും മെയ് 5 ന്
ദക്ഷിണേന്ത്യന്‍ ഭക്ഷണങ്ങള്‍ ആസ്വദിക്കാന്‍ ആഗ്രഹിക്കുന്നുന്നവര്‍ക്ക് സൗത്താം പ്ടണില്‍ ഫുഡ് ഫെസ്റ്റിവല്‍ ഒരുങ്ങുന്നു, ഈ മാസം 19ന് നടക്കുന്ന ഫുഡ് ഫെസ്റ്റിവലില്‍ ഉടന്‍ രജിസ്റ്റര്‍ ചെയ്യാം
ഡല്‍ഹിയില്‍ നിരവധി സ്‌കൂളുകള്‍ക്കു നേരെ ബോംബ് ഭീഷണി, സ്‌കൂളുകള്‍ക്ക് ഇ- മെയിലില്‍ ഭീഷണി സന്ദേശം ലഭിച്ച സാഹചര്യത്തില്‍ പോലീസ് തിരച്ചില്‍ ആരംഭിച്ചു
പന്ത്രണ്ട് വര്‍ഷങ്ങള്‍ക്ക് മുന്‍പ് മൂക്കുത്തിയുടെ ചങ്കീരി നഷ്ടമായി, എത്ര തിരഞ്ഞിട്ടും കിട്ടാതിരുന്ന ചങ്കീരി വീട്ടമ്മയുടെ ശ്വാസകോശത്തിനുള്ളില്‍ നിന്നും കണ്ടെടുത്ത് ഡോക്ടര്‍മാര്‍
Most Read
British Pathram Recommends
