മോഷണസാധനങ്ങള് കൈവശം വച്ചതുകൊണ്ടുമാത്രം അത് ശിക്ഷാര്ഹമായ കുറ്റമായി പരിഗണിക്കാനാവില്ലെന്ന് സുപ്രീം കോടതി. അത് മോഷ്ടിച്ച മുതലാണെന്നു പ്രതിക്ക് അറിയാമായിരുന്നെന്ന് തെളിയിക്കാന് പ്രോസിക്യൂഷനാകണമെന്നും സുപ്രീം കോടതി നിരീക്ഷിച്ചു. മോഷണമുതല് കൈപ്പറ്റിയ കുറ്റത്തിന് ശിവകുമാര് എന്നയാള്ക്ക് ലഭിച്ച രണ്ട് വര്ഷം തടവും പതിനായിരം രൂപ പിഴയും റദ്ദാക്കിക്കൊണ്ടാണ് ജസ്റ്റിസുമാരായ കെ.എം ജോസഫും ഋഷികേശ് റോയിയും അടങ്ങുന്ന ബെഞ്ചിന്റെ നിരീക്ഷണം.
ഇന്ത്യന് ശിക്ഷാ നിയമത്തിലെ 411-ാം വകുപ്പ് ബെഞ്ച് കീറിമുറിച്ചു പരിശോധിക്കുകയും ചെയ്തു. മോഷ്ടിച്ച സ്വത്ത് കൈവശംവയ്ക്കുന്നതിന് മൂന്ന് വര്ഷം വരെ തടവോ പിഴയോ അല്ലെങ്കില് രണ്ടും കൂടെയോ ശിക്ഷ നല്കുന്ന വകുപ്പാണിത്.കൈവശം വച്ചത് മോഷ്ടിക്കപ്പെട്ട വസ്തുക്കളാണെന്ന് പ്രതിക്ക് അറിയാമായിരുന്നെന്ന് സ്ഥാപിക്കുന്നതില് പ്രോസിക്യൂഷന് പരാജയപ്പെട്ടെന്നും കേസിന്റെ വസ്തുതകള് പരാമര്ശിച്ചു ബെഞ്ച് വ്യക്തമാക്കി. പാത്രങ്ങള് ഉള്പ്പെടെയുള്ള മോഷണമുതല് ശിവകുമാറിന് കിട്ടിയെന്നും അവ മധ്യപ്രദേശിലെ സ്വന്തം കടയില് വിറ്റെന്നുമാണ് ആരോപണം. കുറഞ്ഞ വിലയ്ക്ക് കിട്ടി എന്നതുകൊണ്ട് അത് മോഷ്ടിച്ചതാണെന്ന് ആരോപണവിധേയന് മനസിലായിരിക്കണമെന്നില്ലെന്നും കോടതി നിരീക്ഷിച്ചു.