ഈസ്റ്റർ - സമ്മർ അവധിക്ക് തുടക്കമിട്ട് യൂറോപ്പിൽ ഹോളിഡേ ആഘോഷിക്കാൻ പോകുന്നവർ യാത്ര പുറപ്പെടുംമുമ്പ് പാസ്സ്പോർട്ടിന്റെ കാലാവധി പരിശോധിക്കുക. പാസ്സ്പോർട്ട് കാലാവധി പത്തുവർഷം പിന്നിട്ടതാണെങ്കിൽ യൂറോപ്യൻ രാജ്യങ്ങൾ യാത്രാനുമതി നിഷേധിക്കും.
‘പാസ്പോർട്ട് 10 ഇയർ റൂളിൽ’ കുടുങ്ങിപ്പോകാതെ സൂക്ഷിക്കണമെന്ന് യൂറോപ്യൻ യൂണിയനിലേക്ക് യാത്രചെയ്യുന്ന അവധി ആഘോഷക്കാർക്ക് ഇമിഗ്രേഷൻ അധികൃതർ മുന്നറിയിപ്പ് നൽകുന്നു.
യുകെയിൽ പഴയ പാസ്സ്പോർട്ട് പുതിയതിലേക്ക് മാറാൻ 9 മാസംവരെ സമയം അനുവദിക്കുന്നുണ്ട്. അതായത് 10 വർഷവും 9 മാസവും കഴിഞ്ഞാലേ പുതുക്കാതെ പാസ്സ്പോർട്ട് അസാധുവാകൂ. ഇക്കാര്യം യൂറോപ്യൻ രാജ്യങ്ങളും നേരത്തേ അംഗീകരിച്ചിരുന്നു.
യുകെ യാത്രക്കാർക്ക് പഴയ പാസ്പോർട്ട് പുതുക്കാതെ ഒമ്പത് മാസംവരെ യൂറോപ്യൻ രാജ്യങ്ങളിലെ യാത്രകൾക്കായി കൊണ്ടുപോകാൻ കഴിയുമായിരുന്നു. ഇത് ബ്രെക്സിറ്റിനുമുമ്പ് ബ്രിട്ടൻ യൂറോപ്യൻ യൂണിയനിൽ അംഗമായിരുന്നപ്പോഴത്തെ കാര്യം.
എന്നാൽ ബ്രെക്സിറ്റിനുശേഷം, 10 വർഷംമുമ്പ് നൽകിയ പാസ്പോർട്ടുകൾ അഥവാ 10 വർഷം കഴിഞ്ഞിട്ടും പുതുക്കാത്തവ, യൂറോപ്യൻ യൂണിയൻ രാജ്യങ്ങൾ ഇപ്പോൾ അംഗീകരിക്കില്ല.
യുകെ ഇയു വിട്ടതിനാൽ, ഐസ്ലാൻഡ്, നോർവേ, ലിച്ചെൻസ്റ്റൈൻ, സ്വിറ്റ്സർലൻഡ് എന്നിവയും അയർലാൻഡും ഉൾപ്പെടെയുള്ള എല്ലാ രാജ്യങ്ങളിലേക്കും പോകുന്ന യാത്രക്കാർക്ക് പുറപ്പെടുന്ന തീയതിക്ക് 10 വർഷത്തിൽ താഴെമുമ്പ് ലഭിച്ച പാസ്പോർട്ട് ഉണ്ടായിരിക്കണം.
അതുപോലെ ശ്രദ്ധിക്കേണ്ട മറ്റൊരുകാര്യം യാത്രക്കാർ പ്ലാൻ ചെയ്തബി ടൂറിലെ റിട്ടേൺ തീയതിക്കുശേഷം മൂന്ന് മാസത്തേക്ക് കൂടി സാധുതയുള്ള പാസ്സ്പോർട്ടുകളും മാത്രമേ സ്വീകരിക്കൂ എന്നതാണ്.
2018 ന് ശേഷം നൽകുന്ന പാസ്പോർട്ടുകൾക്ക് കൃത്യം 10 വർഷത്തേക്ക് സാധുതയുണ്ട്. എന്നിരുന്നാലും, 2018 സെപ്റ്റംബറിന് മുമ്പ് ഒരു യുകെ പാസ്പോർട്ട് നൽകിയിട്ടുണ്ടെങ്കിൽ, അത് 10 വർഷവും ഒമ്പത് മാസവും വരെ സാധുതയുള്ളതായിരിക്കും. കാരണം, 2018-ന് മുമ്പ് പാസ്പോർട്ട് ഓഫീസ്, പഴയ പാസ്പോർട്ടിൽ നിന്ന് പുതിയതിലേക്ക് ഒമ്പത് മാസം വരെ ചേർക്കാറുണ്ടായിരുന്നു.
ഇതുമൂലം പാസ്സ്പോർട്ട് കാലാവധി പത്തുവർഷം പിന്നിട്ട ചില ആളുകൾക്ക് ഔദ്യോഗികമായി കാലഹരണപ്പെടാത്ത പാസ്പോർട്ടുകൾ ഉണ്ട്. യൂറോപ്പ് ഒഴികെ ഈ പാസ്സ്പോർട്ട് ഉപയോഗിച്ച് ലോകത്തിൻ്റെ മറ്റുഭാഗങ്ങളിൽ അവർക്ക് യാത്രചെയ്യാനും കഴിയും.
ബ്രിട്ടൻ നാളെമുതൽ സമ്മർ ടൈമിലേക്ക് മാറുകയാണെന്നതാണ് ശ്രദ്ധിക്കാനുള്ള മറ്റൊരുകാര്യം. ഇന്നുവെളുപ്പിനെ ഒരുമണിക്ക് ക്ലോക്കുകൾ ഒരുമണിക്കൂർ മുന്നിലേക്ക് തിരിച്ചുവയ്ക്കണം.
മഞ്ഞുകാലത്ത് പകൽ വെളിച്ചം കൂടുതൽ ഉപയോഗിക്കാൻ വേണ്ടിയാണ് വിന്റർടൈമിൽ ക്ലോക്കുകൾ ഒരുമണിക്കൂർ പിന്നിലേക്ക് തിരിച്ചുവച്ച് തുടങ്ങിയത്. സമ്മർ ടൈമിൽ അത് ഗ്രീനിച്ച് ടൈമിലേക്ക് തിരിച്ചുമാറും.
മാർച്ച് മാസത്തിലെ അവസാനത്തെ ഞായറാഴ്ച്ചയാണ് സമ്മർ ടൈം ആരംഭിക്കുക. വെളുപ്പിനെ എഴുന്നേൽക്കാൻ കഴിയാത്തവർ രാത്രി കിടക്കുന്നതിനു മുമ്പുതന്നെ ക്ലോക്കുകൾ ഒരുമണിക്കൂർ മുന്നിലേക്ക് തിരിച്ചുവച്ചാൽ, രാവിലെ മുതൽ വിന്റർ ടൈമിൽ പ്രവർത്തിക്കാനാകും.