യുകെയിൽ ജോലിചെയ്യാൻ ആഗ്രഹിക്കുന്ന ഭൂരിഭാഗം ഉദ്യോഗാർത്ഥികളും പോയിൻ്റ് സംവിധാനത്തിൽ (പിബിഎസ്) സ്കിൽഡ് വർക്കർ വിസയ്ക്കായി അപേക്ഷിക്കുന്നവരാണ്.
2024 ഏപ്രിൽ 4 മുതൽ അവർക്ക് ഉയർന്ന വേതന പരിധിയിലുള്ള ജോലി ഓഫർ അഥവാ സ്പോൺസർഷിപ്പ് സർട്ടിഫിക്കറ്റ് ആവശ്യമായി വരും. വേതന പരിധിയിലെ കുത്തനെയുള്ള 50% വർദ്ധനവാണ് ഏപ്രിൽ 4 മുതൽ പ്രാബല്യത്തിൽ വരിക!
ഇതനുസരിച്ച് അപേക്ഷകർക്ക് വിസ ലഭിക്കാൻ കുറഞ്ഞത് £38,700 വാർഷിക ശമ്പളം ഓഫർ ചെയ്തുള്ള സ്പോൺസർഷിപ്പ് സർട്ടിഫിക്കറ്റ് ലഭിക്കേണ്ടതുണ്ട്. അതേസമയം നിലവിലെ ഏറ്റവും കുറഞ്ഞ വേതനപരിധി £26,200- മാത്രമാണ്.
കർശന കുടിയേറ്റ നിയന്ത്രണം ലക്ഷ്യമിട്ടാണ് ഒറ്റയടിയ്ക്ക് സ്പോൺസർഷിപ്പ് വേതന പരിധി 50% ഉയർത്തുന്നതെന്ന് ഹോം ഓഫീസ് നടപടിയെ ന്യായീകരിച്ച് വ്യക്തമാക്കുന്നു.
അതേസമയം എൻഎച്ച്എസ് ജീവനക്കാർക്കും ഹെൽത്ത് കെയർ, സോഷ്യൽ ഹെൽത്ത് കെയർ, തുടങ്ങിയ തൊഴിലുകൾക്ക് പുതിയ പരിധി ബാധകമല്ല. എങ്കിലും ചെയ്യുന്ന ജോലിയെ അടിസ്ഥാനമാക്കി കുറഞ്ഞ രീതിയിലുള്ള വർദ്ധനവും നടപ്പിലാക്കുന്നു.
സ്കിൽഡ് വർക്കർ അഥവാ വിദഗ്ധ തൊഴിലാളികളുടെ മിനിമം ശമ്പള പരിധി ഇനിപ്പറയുന്ന രീതിയിലാണ് വർദ്ധിപ്പിക്കുക.
ഓപ്ഷൻ എ (ഭൂരിഭാഗം അപേക്ഷകരും): £26,200 മുതൽ £38,700 വരെ.
ഓപ്ഷൻ ബി (അംഗീകൃത പിഎച്ച്ഡിയുള്ള അപേക്ഷകർ ): £23,800 മുതൽ £34,830 വരെ.
ഓപ്ഷൻ സി (അംഗീകൃത STEM പിഎച്ച്ഡിയുള്ള അപേക്ഷകർ ): £20,960 മുതൽ £30,960 വരെ.
ഓപ്ഷൻ ഡി (ഷോർട്ടേജ് ഒക്കപ്പേഷൻ ലിസ്റ്റിലുള്ള തൊഴിൽ തസ്തികകൾ): £20,960 മുതൽ £30,960 വരെ.
ഓപ്ഷൻ ഇ (പുതിയതായി അപേക്ഷകർ): £20,960 മുതൽ £30,960 വരെ.
താഴെപ്പറയുന്ന കാറ്റഗറികളിൽ ഉൾപ്പെട്ടവരും സ്പോൺസർഷിപ്പ് സർട്ടിഫിക്കറ്റ് നേരത്തേ നേടിയിട്ടുള്ളവരുമായ അപേക്ഷകർക്ക് പ്രത്യേക ഇളവുകൾ അനുവദിക്കും.
ഇന്നുവൈകിട്ട് 7 മണിക്കുമുമ്പ്:
2024 ഏപ്രിൽ 2-ന് വൈകുന്നേരം 7 മണി വരെ അപേക്ഷകർക്ക് നൽകിയിട്ടുള്ള സ്പോൺസർഷിപ്പ് സർട്ടിഫിക്കറ്റുകൾ പഴയ ശമ്പള പരിധിക്ക് കീഴിൽ മൂല്യനിർണ്ണയം ചെയ്യപ്പെടും. വർദ്ധനവ് പ്രാബല്യത്തിൽ വരുന്നതിന് മുമ്പ് അപേക്ഷകർക്കും സ്പോൺസർമാരായ തൊഴിലുടമകൾക്കും ഇത് അവസാന അവസരം നൽകുന്നു.
പുതിയ എൻട്രികൾ:
അടുത്തിടെ ബിരുദം നേടിയവരോ, യുകെയിൽ പഠിച്ച് ഗ്രാജ്വേറ്റ് വിസയിൽ നിന്ന് വർക്ക് വിസയിലേക്ക് മാറുന്നവരോ പോലുള്ള, യുകെ തൊഴിൽ വിപണിയിലേക്ക് പുതിയതായി പ്രവേശിക്കുന്നവർക്ക്; ശമ്പളപരിധിയിൽ പ്രത്യേക ഇളവുകൾ അനുവദിക്കും. അവർ കുറഞ്ഞ ശമ്പള പരിധിക്ക് യോഗ്യരായേക്കാം.
പിഎച്ച്ഡിയുള്ള അപേക്ഷകർക്കുള്ള ആനുകൂല്യങ്ങൾ
അംഗീകൃത Ph.D ഉള്ള അപേക്ഷകർക്ക് കുറഞ്ഞ വേതന പരിധി അനുവദിക്കും. യുകെയിലെ തൊഴിൽ മേഖലയിലേക്ക് ഉയർന്ന യോഗ്യതയുള്ള വ്യക്തികളെ ആകർഷിക്കുന്നതിനുള്ള ശ്രമത്തിൽ, കുറഞ്ഞ ശമ്പള പരിധി ഇവർക്ക് പ്രത്യേകമായി അനുവദിക്കുന്നു.
ഹെൽത്ത്, സോഷ്യൽ കെയർ വർക്കർമാർക്ക് പ്രത്യേക ഇളവുകൾ:
ഹെൽത്ത്, കെയർ വിസ റോളുകൾക്കായി, യുകെയിലെ ഈ പ്രൊഫഷണലുകളുടെ കുറവും ആവശ്യകതയും കണക്കിലെടുത്ത് ശമ്പള പരിധി പ്രതിവർഷം £29,000 എന്ന താഴ്ന്ന തുകയായി മാത്രമാകും വർധിപ്പിക്കുക.
മാത്രമല്ല, ആരോഗ്യ, പരിചരണ മേഖലയ്ക്കുള്ളിലെ നഴ്സുമാർ, കെയറർമാർ തുടങ്ങിയ തസ്തികകൾക്ക്, കുറഞ്ഞ ശമ്പള പരിധി £23,200 അല്ലെങ്കിൽ അവരുടെ തൊഴിൽ-നിർദ്ദിഷ്ട പരിധി, ഏതാണ് ഉയർന്നത് അതാകും ബാധകമാകുക.