SPORTS
ഐപിഎല് പെരുമാറ്റ ചട്ടം ലംഘിച്ചു: മലയാളി താരം സഞ്ജു സാംസണിനെതിരെ പിഴചുമത്തി ബിസിസിഐ
3>ഡല്ഹി ക്യാപിറ്റല്സിനെതിരായ മത്സരത്തിലെ വിവാദ പുറത്താകലിന് പിന്നാലെ അമ്പയര്മാരുമായി തര്ക്കിച്ചതിന് മലയാളി താരം സഞ്ജു സാംസണിനെതിരെ പിഴചുമത്തി ബിസിസിഐ. ഐപിഎല് പെരുമാറ്റ ചട്ടം ലംഘിച്ചുവെന്നാരോപിച്ചാണ് താരത്തിനെതിരെയുള്ള നടപടി.
സഞ്ജുവിന് എതിരെ മാച്ച് ഫീയുടെ 30 ശതമാനമാണ് പിഴയൊടുക്കേണ്ടി വരിക എന്നാണ് പുറത്ത് വരുന്ന വിവരം. ഡല്ഹി ക്യാപിറ്റല്സിനെതിരെയുള്ള മത്സരത്തിലെ പതിനഞ്ചാം ഓവറിലാണ് വിവാദ സംഭാവമുണ്ടാകുന്നത്.
46 പന്തില് എട്ട് ഫോറും ആറ് സിക്സും സഹിതം 86 റണ്സുമായി മികച്ച ഫോമിലായിരുന്നു സഞ്ജു. 222 റണ്സെന്ന ഡല്ഹിയുടെ ലക്ഷ്യത്തിലേക്ക് മറുപടി ബാറ്റിങ്ങിനിറങ്ങിയ രാജസ്ഥാന് വിജയം ഏകദേശം ഉറപ്പിച്ച സമയം കൂടിയായിരുന്നു അത്. ഇന്നലെ ഡല്ഹി ക്യാപിറ്റല്സിനെതിരായ മത്സരത്തില് സഞ്ജു ബൗണ്ടറിയിലേക്ക് അടിച്ച പന്ത് ഷായ് ഹോപ്പ് കൈയിലൊതുക്കിയെങ്കിലും നിയന്ത്രണം തെറ്റി കാല് ബൗണ്ടറി കുഷ്യനില് തട്ടുന്നതായി സംശയം ഉയര്ന്നിട്ടും കൂടുതല് ആംഗിളുകളോ ക്ലോസപ്പ് ദൃശ്യങ്ങളോ പരിശോധിക്കാതെ ടിവി അമ്പയര് സഞ്ജുവിനെ ഔട്ട് വിധിച്ചു.
നിര്ണായക സമയത്ത് സഞ്ജു പുറത്തായത് രാജസ്ഥാനെ തോല്വിയിലേക്ക് തള്ളിവിടുകയും ചെയ്തു. അതെ സമയം വിവാദ പുറത്താകലില് സഞ്ജുവിന് പിന്തുണയുമായി ഇതിനകം തന്നെ ആരാധകര് രംഗത്തെത്തിയിരുന്നു. ബിസിസിഐയുടെ പിഴ നടപടിയും രൂക്ഷ വിമര്ശനത്തിന് കാരണമായിട്ടുണ്ട്. ബോള് വൈഡ് ആണോ അല്ലയോ എന്ന് നോക്കാന് വരെ മിനുറ്റുകളോളം സമയമെടുക്കുന്ന ഐപിഎല് മത്സരത്തില് സുപ്രധാന സമയത്തെ ഒരു വിക്കറ്റ് പരിശോധിക്കാനും തീരുമാനമെടുക്കാനും ആവശ്യമായ സമയമെടുത്തില്ല എന്ന പരാതിയും രാജസ്ഥാന് ടീം മത്സരത്തിന് ശേഷം ഉയര്ത്തിയിരുന്നു.
ടി20 ലോകകപ്പിനുള്ള ഇന്ത്യന് ജേഴ്സി ഇതാണ്, ഇന്ത്യന് ടീമിന്റെ ഔദ്യോഗിക ഇന്സ്റ്റഗ്രാം പേജ് വഴി പുതിയ ജേഴ്സി അവതരിപ്പിച്ചു
3>ടി20 ലോകകപ്പിനുള്ള ഇന്ത്യന് ജേഴ്സി അവതരിപ്പിച്ചു. ഇന്ത്യന് ടീമിന്റെ ഔദ്യോഗിക ഇന്സ്റ്റഗ്രാം പേജ് വഴിയാണ് പുതിയ ജേഴ്സി അവതരിപ്പിച്ചിരിക്കുന്നത്. നീല, ഓറഞ്ച് നിറങ്ങളുടെ മിക്സാണ് ജേഴ്സിയില്.
ജേഴ്സി അവതരണത്തിന്റെ കമ്പ്യൂട്ടര് ഗ്രാഫിക്സ് വീഡിയോയും പുറത്തിറങ്ങി. ഇന്ത്യന് ക്യാപ്റ്റന് രോഹിത് ശര്മയും സഹ താരങ്ങളും പരിശീലനം നടത്തുന്നതിനിടെ ഹെലികോപ്റ്ററില് ജേഴ്സി ഗ്രൗണ്ടില് എത്തുന്നതായാണ് വീഡിയോയില്. രോഹിത് ശര്മ, കുല്ദീപ് യാദവ്, രവീന്ദ്ര ജഡേജ എന്നിവരാണ് വീഡിയോയിലുള്ളത്. എന്നാല് ഇന്ത്യന് താരങ്ങള് ജേഴ്സിയണിഞ്ഞുള്ള ചിത്രങ്ങള് പുറത്തുവിട്ടിട്ടില്ല. അഡിഡാസാണ് ജേഴ്സി നിര്മാതാക്കള്.
ജൂണ് 2 മുതലാണ് ലോകകപ്പ് പോരാട്ടങ്ങള് ആരംഭിക്കുന്നത്. ജൂണ് 29നാണ് ഫൈനല്. യുഎസ്, വെസ്റ്റ് ഇന്ഡീസ് എന്നിവിടങ്ങളിലായാണ് ഇത്തവണ പോരാട്ടം. ജൂണ് അഞ്ചിനു അയര്ലന്ഡിനെതിരെയാണ് ഇന്ത്യയുടെ ആദ്യ പോരാട്ടം. ഇന്ത്യ- പാക് പോരാട്ടം ജൂണ് 9നും അരങ്ങേറും.
ഇവാന് വുകോമനോവിച്ചിന് ഒരുകോടി രൂപ പിഴ ചുമത്തി ക്ലബ്ബ് മാനേജ്മെന്റ്, നടപടിയിലേക്ക് നയിച്ച കാരണം ഇത്
3>കേരള ബ്ലാസ്റ്റേഴ്സിന്റെ മുന് പരിശീലകന് ഇവാന് വുകോമനോവിച്ചിന് ഒരുകോടി രൂപ പിഴ ചുമത്തി ക്ലബ്ബ് മാനേജ്മെന്റ്. ഇവാന് നേരെ ഇത്തരത്തില് ഒരു നടപടി എടുക്കാന് കാരണം ഐഎസ്എല് 2022-23 സീസണില് ബെംഗളൂരു എഫ്സിയുമായുള്ള വിവാദ പ്ലേ ഓഫ് മത്സരത്തില് ടീമിനെ പിന്വലിച്ച സംഭവം. കോര്ട്ട് ഓഫ് ആര്ബിട്രേഷന് ഫോര് സ്പോര്ട്സിന്റെ (സിഎഎസ്) അപ്പീലിലാണ് വെളിപ്പെടുത്തിയത്.
കഴിഞ്ഞ രണ്ടു സീസണായി ടീം പ്ളേഓഫില് എത്തിയിരുന്നെങ്കിലും സെമിഫൈനലില് കടക്കുന്നതില് പരാജയപ്പെട്ടിരുന്നു. 2023 മാര്ച്ച് മൂന്നിനായിരുന്നു വിവാദമത്സരം നടന്നത്. ബെംഗളൂരു ക്യാപ്റ്റന് സുനില് ഛേത്രി നേടിയ വിവാദ ഗോളിന്റെ പശ്ചാത്തലത്തില് മത്സരം പകുതിക്ക് നില്ക്കുമ്പോള് വുകുമുനോവിക്ക് ടീമിനെ തിരികെ വിളിച്ചിരുന്നു. ഗോള് അനുവദിച്ചതില് പ്രതിഷേധിച്ച് പരിശീലകനും താരങ്ങളും മൈതാനം വിടുകയായിരുന്നു. സംഭവത്തില് ഓള് ഇന്ത്യ ഫുട്ബോള് ഫെഡറേഷന് (എഐഎഫ്എഫ്) നാല് കോടി രൂപ ബ്ലാസ്റ്റേഴ്സിനും കോച്ചിനും പിഴയായി ചുമത്തുകയും ചെയ്തിരുന്നു. സംഭവത്തില് ബ്ലാസ്റ്റേഴ്സിന് വുകോമനോവിച്ച് ഒരു കോടി രൂപ പിഴയിട്ടെന്നാണ് റിപ്പോര്ട്ട്.
പൊതുവെ ക്ലബ്ബിനെതിരെ ചുമത്തപ്പെടുന്ന പിഴ ഉടമകളാണ് അടയ്ക്കേണ്ടത്. എന്നാല് ബെംഗളൂരു എഫ്സിയുമായുള്ള വിവാദത്തില് തെറ്റ് ഇവാന് വുകോമനോവിച്ചിന്റെ ഭാഗത്താണെന്നും അതിനാല് അദ്ദേഹം പിഴയൊടുക്കണമെന്നും ബ്ലാസ്റ്റേഴ്സ് മാനേജ്മെന്റ് തീരുമാനിക്കുകയുമായിരുന്നു. ഇതേ തുടര്ന്നാണ് ഇവാന് ഒരു കോടി രൂപ പിഴയൊടുക്കേണ്ടി വന്നത്്.
അര്ജന്റീനയുടെ സൂപ്പര് താരം ലയണല് മെസിയുടെ പുതിയ റെക്കോര്ഡ്, ഇത് മറ്റൊരു വിജയ നേട്ടം
3>യു.എസിലെ മേജര് ലീഗ് സോക്കറില് ഇന്റര് മിയാമിക്കായി ന്യൂയോര്ക്ക് റെഡ് ബുള്സിനെതിരേ ഗോളടിച്ചും ഗോളടിപ്പിച്ചും ലയണല് മെസിയുടെ പുതിയ റെക്കോര്ഡ്. അര്ജന്റീനയുടെ സൂപ്പര് താരം ലയണല് മെസി പുതിയ റെക്കോഡിട്ടു.
ഇന്റര് മിയാമി 6-2 നു ജയിച്ച മത്സരത്തില് അഞ്ച് അസിസ്റ്റും ഒരു ഗോളുമായാണു മെസി റെക്കോഡിട്ടത്. ഒരു ഗോളിന് പിന്നിലായ ശേഷമാണ് ഇന്റര് മിയാമി തിരിച്ചടിച്ച് ജയിച്ചത്. 30-ാം മിനിറ്റില് വാന്സിറിലൂടെ ന്യൂയോര്ക്ക് ലീഡ് നേടി. രണ്ടാം പകുതിയുടെ തുടക്കത്തില് 48-ാം മിനിറ്റില് മതിയാസ് റോഹാസ് മിയാമിക്ക് സമനില നല്കി. മെസിയുടെ പാസില് നിന്നായിരുന്നു ഗോള്. 50-ാം മിനിറ്റില് മെസി ഗോളടിച്ചു. 62-ാം മിനിറ്റില് വീണ്ടും മെസിയുടെ അസിസ്റ്റും റോഹാസിന്റെ ഗോളും മെസിയുടെ അസിസ്റ്റും.
പിന്നാലെ മെസിയുടെ പാസില്നിന്ന് ഒന്നിനു പിറകെ മൂന്ന് ഗോളുകളുമായി ലൂയി സുവാരസും. ആദ്യമായാണ് ഒരു താരം എം.എല്.എസില് ഒരു മത്സരത്തില് ആറ് ഗോളുകളുടെ ഭാഗമാകുന്നത്. ജയത്തോടെ ഇന്റര് മിയാമി ലീഗില് 24 പോയിന്റുമായി ഒന്നാമത് തുടരുകയാണ്.
ക്രിക്കറ്റ് ലോകത്തെ അമ്പരപ്പിച്ച് പറക്കും ക്യാച്ചുമായി മലയാളി താരം, കേരള സീനിയര് താരം അലീന സുരേന്ദ്രന്റെ അത്ഭുത ക്യാച്ച് വൈറലാകുമ്പോള്
3>തലശ്ശേരി : കഴിഞ്ഞ ദിവസം തലശ്ശേരിയില് നടന്ന കോടിയേരി ബാലകൃഷ്ണന് സ്മാരക വനിതാ ട്വന്റി 20 ക്രിക്കറ്റ് ടൂര്ണമെന്റില് മലയാളി സീനിയര് ക്രിക്കറ്റ് താരം അലീന സുരേന്ദ്രന്റെ ക്യാച്ച് ക്രിക്കറ്റ് ലോകത്ത് തന്നെ അത്ഭുതമാകുകയാണ്.
അലീന സുരേന്ദ്രന്റെ പറക്കും ക്യാച്ചാണ് ക്രിക്കറ്റ് ലോകത്തെ തന്നെ ഞെട്ടിച്ചിരിക്കുന്നത്. നെസ്റ്റ് കണ്സ്ട്രഷന്സും ഓഫറി ക്ലബ്ബും തമ്മിലായിരുന്നു മത്സരം. 10 മീറ്ററോളം ഓടിയ ശേഷം തകര്പ്പന് ഒരു ഡൈവിലൂടെ അലീന പന്ത് കൈപ്പിടിയിലാക്കി. ഇന്ത്യന് വനിതാ ക്രിക്കറ്റ് താരങ്ങളായ സ്മൃതി മന്ദാന, ജെമീമ റോഡ്രിഗസ്, അഞ്ജലി സര്വാനി, ആശ ശോഭന തുടങ്ങിയവര് അലീനയെ അഭിനന്ദിച്ച് രംഗത്തെത്തി.
മലയാളി താരം ഇന്സ്റ്റഗ്രാമില് പങ്കുവെച്ച ക്യാച്ചിന്റെ വീഡിയോയും സമൂഹമാധ്യമങ്ങളില് തരംഗമാണ്. രണ്ടുദിവസത്തിനിടെ ആറുലക്ഷത്തിലേറെ ആളുകള് വീഡിയോ കണ്ടുകഴിഞ്ഞു. ഇടുക്കി അടിമാലി സ്വദേശിനിയാണ് അലീന. ഇടംകൈ ബാറ്ററായ യുവതാരത്തിന്റെ അടുത്ത ലക്ഷ്യം വനിതാ ഐപിഎല് ആണ്. അതുവഴി ഇന്ത്യന് ക്രിക്കറ്റിലേക്ക് എത്താനും 23കാരിയായ താരം ലക്ഷ്യമിടുന്നു.
'കലി തുള്ളിയ കാളി തന് കാലില്, തങ്ക പൊന് ചിലമ്പ്' സോഷ്യല് മീഡിയയില് തരംഗമായ രംഗണ്ണന് ഇഫക്ടുമായി ഓസ്ട്രേലിയന് നായകനായ പാറ്റ് കമ്മിന്സും
3>ജീത്തു മാധവന് സംവിധാനത്തില് പുറത്തു വന്ന ആവേശവും രംഗണ്ണനും ഭാഷകള്ക്കപ്പുറം ഹിറ്റാവുകയാണ്. രംഗണ്ണനായി ഫഹദ് തകര്ത്തെന്നാണ് കമല് ഹാസ്സന് അടക്കമുള്ളവര് അഭിപ്രായം പറഞ്ഞത്. ചിത്രത്തിനു വേണ്ടി രംഗണ്ണന് (ഫഹദ്) ചെയ്ത ഒരു ഇന്സ്റ്റഗ്രാം റീല് വീഡിയോ ചിത്രത്തില് വലിയ കോമഡി തന്നെയായിരുന്നു.
സിനിമ പുറത്തിറങ്ങിയ ശേഷം പലരും ആ വീഡിയോ അനുകരിച്ചിരുന്നു. ഇപ്പോഴിതാ ആ വീഡിയോ ഏറ്റെടുത്തിരിക്കുകയാണ് ഓസ്ട്രേലിയന് നായകനായ പാറ്റ് കമ്മിന്സും. 'കരിങ്കാളിയല്ലേ കൊടുങ്ങല്ലൂര് വാഴണ പെണ്ണാള് കൊടുവാളെടുത്ത് ചുടു ദാരിക ചോരയില് നീരാട്' തുടങ്ങുന്ന വരികളില് പങ്കുവച്ചിരിക്കുന്ന റീല്സില് മത്സരത്തിന്റെ വിലയിരുത്തലാണ് രസകരമായി ചിത്രീകരിച്ചിരിക്കുന്നത്.
ഇതോടെ ഐപിഎല്ലിലും ആവേശം അലയടിക്കുകയാണെന്നാണ് തെളിയുന്നത്. വീഡിയോയില് ഓരോ തവണ വരികള് മാറുമ്പോഴും അതിനൊപ്പം കൊടുത്തിട്ടുള്ള ക്യാപ്ഷനുകളും ഏറെ ശ്രദ്ധിക്കപെടുകയാണ്. മുന്പ് ചെന്നൈ സൂപ്പര് കിംഗ്സ് താരങ്ങളും ഇതേ റീലിന് ചുവട് വച്ച് അത് ഇന്സ്റ്റഗ്രാം സ്റ്റോറിയായി പങ്കുവച്ചിരുന്നു. മുസ്തഫിസൂറും പതിരാനയുമാണ് അന്ന് റീല്സുമായി എത്തിയത്. ഇത് വലിയ രീതിയില് വൈറലായിരുന്നു.
ഡീഗോ മറഡോണയുടെ മൃതദേഹം സ്വകാര്യ സെമിത്തേരിയില് നിന്നു ശവക്കല്ലറയിലേക്ക് മാറ്റണം, ആവശ്യവുമായി മക്കള് അര്ജന്റീന കോടതിയില്
3>ഇതിഹാസ ഫുട്ബോളര് ഡീഗോ മറഡോണയുടെ മൃതദേഹം സ്വകാര്യ സെമിത്തേരിയില് നിന്നും മാറ്റണമെന്ന് ആവശ്യപ്പെട്ട് മക്കള് കോടതിയില്. അദ്ദേഹത്തിന്റെ മൃതദേഹം സ്വകാര്യ സെമിത്തേരിയില് നിന്നു ശവക്കല്ലറയിലേക്ക് മാറ്റണമെന്നാണ് മക്കള് അര്ജന്റീന കോടതിയില് ആവശ്യപ്പെട്ടത്.
ലോകമെമ്പാടുമുള്ള ഫുട്ബോള് ആരാധകര്ക്ക് ഇതിഹാസ താരത്തിനു ആദരാഞ്ജലി അര്പ്പിക്കാന് അവസരം ഒരുക്കുന്നതിനായി ബ്യൂണസ് അയേഴ്സില് അദ്ദേഹത്തിന്റെ സ്മരണയ്ക്കായി ശവകുടീരം നിര്മിക്കുന്നുണ്ട്. ഇവിടേക്ക് മൃതദേഹം മാറ്റണമെന്നാണ് മക്കളുടെ ആവശ്യം.
മറഡോണയുടെ മരണവുമായി ബന്ധപ്പെട്ട് എട്ട് ആരോഗ്യ പ്രവര്ത്തകര്ക്കെതിരെ നിലവില് കേസ് നിലനില്ക്കുന്നുണ്ട്. അതിനാലാണ് മൃതദേഹം മാറ്റുന്നതിനു കോടതിയുടെ അനുമതി ആവശ്യമായി വന്നത്. ഉചിതമായ പരിശോധനകളെല്ലാം നടത്തിയെന്നും മതിയായ വ്യവസ്ഥകളോടെ സുരക്ഷയും രഹസ്യ സ്വഭാവവും നിലനിര്ത്തി തന്നെ ഇവ കൈമാറ്റം ചെയ്യാന് അനുമതി നല്കണമെന്നു മക്കള് കോടതിയോടു ആവശ്യപ്പെട്ടു.
2020ലാണ് ലോകം കണ്ട എക്കാലത്തേയും മികച്ച ഫുട്ബോള് താരമായ ഡിഗോ മറഡോണ ജീവിതത്തോടു വിട പറഞ്ഞത്. മമോറിയല് ഡെല് ഡീസ് എന്നാണ് ഓര്മക്കുടീരത്തിന്റെ പേര്. നിലവിലുള്ള സെമിത്തേരിയിലെ ശലക്കല്ലറയേക്കാള് സുരക്ഷിതമായിരിക്കും പുതിയ സ്ഥലമെന്നു മക്കള് കോടതിയില് സമര്പ്പിച്ച ഹര്ജിയില് വ്യക്തമാക്കുന്നു.
'വിയര്പ്പു തുന്നിയിട്ട കുപ്പായം' എന്ന് ടി 20 ലോകകപ്പിലെ ഇന്ത്യന് ടീമില് ഇടംനേടിയ സന്തോഷത്തില് സഞ്ജു സാംസണ്, ആശംസകള് അറിയിച്ച് പ്രമുഖര്
3>ടി 20 ലോകകപ്പിലെ ഇന്ത്യന് ടീമില് മലയാളി താരം സഞ്ജു സാംസണ് ഇടം നേടിയ സന്തോഷത്തിലും ആവേശത്തിലും ആണ് മലയാളികള്. നിരവധി പേരാണ് സഞ്ജുവിന് ആശംസ അറിയിച്ച് എത്തിയത്. ഇപ്പോഴിതാ സഞ്ജുവിന്റെ സോഷ്യല് മീഡിയ പോസ്റ്റ് ആണ് വൈറലാകുന്നത്.
സഞ്ജു ഇന്സ്റ്റഗ്രാമില് പങ്കുവച്ച പോസ്റ്റാണ് വൈറലാകുന്നത്. 'വിയര്പ്പു തുന്നിയിട്ട കുപ്പായം'- എന്ന കുറിപ്പില് ഇന്ത്യന് ജേഴ്സിയിലുള്ള ചിത്രമാണ് സഞ്ജു പോസ്റ്റ് ചെയ്തിരിക്കുന്നത്. ഈ ചിത്രത്തിനു താഴെ നിരവധി അഭിനന്ദന കമന്റുകളാണ് വരുന്നത്.
അഭിമാന നിമിഷം എന്നായിരുന്നു കാളിദാസ് ജയറാമിന്റെ കമന്റ്. ഇന്ത്യന് ക്രിക്കറ്റിലെ രാജകുമാരന് എന്നായിരുന്നു ആന്റണി വര്ഗീസ് കുറിച്ചത്. ടൊവിനോ തോമസ്, ബേസില് ജോസഫ്, ഷറഫുദ്ദീന് തുടങ്ങിയ താരങ്ങളും കമന്റുമായി എത്തി. ആപാട്ടിന് ചേര്ന്ന ചിത്രം ഇതാണ് എന്നായിരുന്നു ഒരു ആരാധകന്റെ കമന്റ്.
ടി 20 ലോകകപ്പിനുള്ള 15 അംഗ ഇന്ത്യന് ടീമില് വിക്കറ്റ് കീപ്പറായാണ് സഞ്ജു ഇടം നേടിയത്. ഐപിഎല്ലില് വന് ഫോമിലാണ് സഞ്ജു. രാജസ്ഥാന് റോയല്സ് ക്യാപ്റ്റനാണ് താരം. ഐപിഎല് റണ് ചാര്ട്ടില് 77 ശരാശരിയില് 385 റണ്സും 161.08 സ്ട്രൈക്ക് റേറ്റും നാല് അര്ധസെഞ്ചുറികളുമായി സഞ്ജു സാംസണ് നാലാം സ്ഥാനത്താണ്. ഐപിഎല്ലില് പുറത്താകാതെ നേടിയ 82 റണ്സാണ് താരത്തിന്റെ മികച്ച സ്കോര്.
'പ്രതിസന്ധി സമയങ്ങളില് ഒറ്റയ്ക്കാണെന്ന് കരുതേണ്ടെന്ന്' റിങ്കു സിംഗിന് ഷാരൂഖ് ഖാന്റെ സന്ദേശം
3>ക്രിക്കറ്റ് ലോകത്തെ പലതാരങ്ങളുടേയും പിന്തുണയ്ക്കൊപ്പം റിങ്കു സിംഗിന് നടന് ഷാരൂഖ് ഖാന്റെയും പിന്തുണ. ഇന്ത്യന് പ്രീമിയര് ലീഗ് സീസണിലെ മോശം പ്രകടനം താരത്തിന്റെ അവസരം നഷ്ടപ്പെടുത്തിയെന്ന് മുന് താരങ്ങള് ഉള്പ്പടെ വിലയിരുത്തിയിരുന്നു. എന്നാല് ക്രിക്കറ്റ് ലോകത്തെ പല താരങ്ങളും റിങ്കുവിനെ ആശ്വസിപ്പിച്ച് രംഗത്തെത്തിയിരുന്നു. ഈ കൂട്ടത്തിലാണ് ഷാരൂഖ് ഖാനും പിന്തുണയുമായി എത്തിയത്.
കൊല്ക്കത്ത നൈറ്റ് റൈഡേഴ്സ് ഉടമ കൂടിയായ ഷാരൂഖ് ഖാന് ആണ് താരത്തിന് പിന്തുണ പ്രഖ്യാപിച്ച് എത്തിയിരിക്കുന്നത്. റിങ്കുവിന്റെ ആരാധകരില് ഒരാളാണ് ഷാരൂഖ് ഖാന്. പ്രതിസന്ധി സമയങ്ങളില് ഒറ്റയ്ക്കാണെന്ന് കരുതേണ്ടെന്നാണ് റിങ്കു സിംഗിന് ഷാരൂഖ് ഖാന് നല്കുന്ന സന്ദേശം.
താരത്തെ ചേര്ത്തുപിടിക്കുന്ന കൊല്ക്കത്ത ഉടമയുടെ ദൃശ്യങ്ങളാണ് സമൂഹമാധ്യമങ്ങളില് വൈറലാകുന്നത്. കഴിഞ്ഞ ദിവസം റിങ്കുവിന് ഇന്ത്യന് ടീമില് സ്ഥാനം നല്കണമെന്ന് ആവശ്യപ്പെട്ട് ഷാരൂഖ് ഖാന് രംഗത്തെത്തിയിരുന്നു. ഇന്ത്യന് ടീമില് സ്ഥാനം അര്ഹിക്കുന്ന നിരവധി താരങ്ങള് ഐപിഎല്ലിലുണ്ട്. അതുപോലൊരു താരമാണ് റിങ്കു സിംഗ്. റിങ്കുവിനെ ഇന്ത്യന് ടീമില് ഉള്പ്പെടുത്തണമെന്നാണ് ആഗ്രഹമെന്ന് ഷാരൂഖ് പറഞ്ഞു.
ട്വന്റി 20 ലോകകപ്പ് ടീം, ഇന്ത്യന് ടീമിനെ ഉടന് പ്രഖ്യാപിക്കും, ഫസ്റ്റ് ചോയ്സ് വിക്കറ്റ് കീപ്പറായി മലയാളി താരം സഞ്ജു സാംസണെത്തും എന്ന റിപ്പോര്ട്ട്
3>ട്വന്റി 20 ലോകകപ്പിനുള്ള ഇന്ത്യന് ടീമില് ഫസ്റ്റ് ചോയ്സ് വിക്കറ്റ് കീപ്പറായി മലയാളി താരം സഞ്ജു സാംസണെത്തും എന്ന റിപ്പോര്ട്ടുകള്. ഉടന് പ്രഖ്യാപിക്കപ്പെടുന്ന ടീമില് ആണ് സഞ്ജു സാംസണ് കൂടുതല് സാധ്യത കാണുന്നത്.
ഐപിഎല്ലില് തകര്പ്പന് ഫോമിലുള്ള താരത്തെ സെലക്ഷന് കമ്മിറ്റി പരിഗണിക്കുന്നതായി പ്രമുഖ ദേശീയ മാധ്യമങ്ങള് റിപ്പോര്ട്ട് ചെയ്തു. മെയ് ഒന്നാണ് ടീമുകളെ പ്രഖ്യാപിക്കാന് ഐസിസി നിര്ദ്ദേശിച്ചിരിക്കുന്ന അവസാന തീയതി. ടീം തെരഞ്ഞെടുപ്പുമായി ബന്ധപ്പെട്ട് ക്യാപ്റ്റന് രോഹിത് ശര്മ, പരിശീകന് രാഹുല് ദ്രാവിഡ്, ചീഫ് സെലക്റ്റര് അജിത് അഗാര്ക്കര് എന്നിവര് കഴിഞ്ഞ ദിവസം യോഗം ചേര്ന്നിരുന്നു.
ഓള് റൗണ്ടര് രവീന്ദ്ര ജഡേജയെ ടീമില് നിന്ന് ഒഴിവാക്കുമെന്നും സൂചനകളുണ്ട്. ഐപിഎല് സീസണിലെ മികച്ച പ്രകടനം അടിസ്ഥാനമാക്കി കുല്ദീപ് യാദവ്, യൂസ്വേന്ദ്ര ചഹല് എന്നിവരെ ടീമില് ഉള്പ്പെടുത്തിയേക്കും. മോശം ഫോമിലാണെങ്കിലും ഓള് റൗണ്ടര് ഹാര്ദ്ദിക്ക് പാണ്ഡ്യയ്ക്ക് ടീമിലിടം ലഭിക്കുമെന്നാണ് സൂചന. സെലക്ഷന് കമ്മിറ്റി പരിഗണനയിലുള്ള കെഎല് രാഹുല് അഞ്ചാമതും ഋഷഭ് പന്ത് ആറാമതുമാണ്. ഐപിഎല്ലിലെ പ്രകടനം മാത്രം പരിഗണിക്കേണ്ടെന്നാണ് യോഗത്തിലുണ്ടായ സുപ്രധാന തീരുമാനമെന്ന് ഇഎസ്പിഎന് റിപ്പോര്ട്ട് ചെയ്യുന്നു. ഋഷഭ് പന്ത് ഐപിഎല്ലില് തകര്പ്പന് പ്രകടനം നടത്തിവരുന്നുണ്ടെങ്കിലും അവസാനം ഇന്ത്യക്കായി കളിച്ച ട്വന്റി 20 മത്സരങ്ങളില് ഫോമിലേക്കുയര്ന്നിരുന്നില്ല.