കഴിഞ്ഞ വെള്ളിയാഴ്ച വാഹനാപകടത്തില് മരണമടഞ്ഞ ലിവര്പൂളിന്റെ പ്രിയ ഡോക്ടര് ജോതിസ് മണലയില് (26) വരുന്ന ജൂലൈ മാസം 7 വ്യാഴാഴ്ച സെന്റ്. ഹെലന്സ് ഹോളി ക്രോസ് പള്ളിയില് വച്ച് മലയാളി സമൂഹം വിടനല്കും. പള്ളിയിലെ ചടങ്ങുകള് രാവിലെ 10 .30 നു ആരംഭിക്കും മൂന്നാം ക്ലാസില് പഠിക്കുന്ന കാലത്താണ് ജ്യോതിസ് ലിവര്പൂളില് എത്തിയത് അന്നുമുതല് അള്ത്താര ബാലനായി പ്രവര്ത്തിച്ച പള്ളിയിലാണ് അന്ത്യ കര്മങ്ങള് നടക്കുന്നത്. യു കെയുടെ വിവിധഭാഗങ്ങളില് നിന്നും അന്ത്യ ഉപചാരം അര്പ്പിക്കാന് ആളുകള് അവിടെ എത്തിച്ചേരും.
കഴിഞ്ഞ ദിവസം ഞാനും സുഹൃത്തു ജോസ് മാത്യുവും കൂടി ജ്യോതിസിന്റെ വീട്ടില് ചെന്നപ്പോള് അവിടെ പ്രാത്ഥന നടന്നുകൊണ്ടിരിക്കുകയായിരുന്നു, പിതാവ് ജോജപ്പന് അവന് കുട്ടിയായിരുന്നപ്പോള് സ്വന്തമായി ഉണ്ടാക്കിയ mouse mat pad കാണിച്ചു. അതില് E = mc2 എന്നെഴുതി അതില് അവന്റെ ചെറുപ്പത്തിലേ ഫോട്ടോകളും ചേര്ത്ത് വച്ചിട്ടുണ്ടായിരുന്നു. അതുകാണിച്ചപ്പോള് അദ്ദേഹത്തിന്റെ കണ്ണില് നിന്നും കണ്ണുനീര് പൊടിഞ്ഞു.
എ. ലെവലിനു പഠിക്കുമ്പോള് മുതല് അവന് ഷോപ്പില് പോയാല് കുറെയേറെ പാക്കറ്റ് സാധനങ്ങള് വാങ്ങും അതുമുഴുവന് education disabilities ഉള്ള കുട്ടികള്ക്ക് വേണ്ടിയായിരുന്നു. ഡോക്ടര് ആയ ശേഷം തല മൊട്ടയടിച്ചു വീട്ടില് എത്തിയിരുന്നു 'അമ്മ ഒരിക്കല് വഴക്കു പറഞ്ഞു പക്ഷെ അത് ക്യന്സര് രോഗികള്ക്ക് വേണ്ടിയായിരുന്നു ചെയ്തത് എന്നത് പിന്നീടാണ് അറിഞ്ഞത്'. കൊറോണ മൂര്ച്ഛിച്ച കാലത്തു 7 ദിവസവും ജോലി ചെയ്തിരുന്ന ജ്യോതിസ് ഒരു അവധിപോലും എടുത്തിരുന്നില്ല, ചുറ്റും നിരന്തരം നടക്കുന്ന മരണങ്ങള് കണ്ടു കൂടെ ജോലി ചെയ്തിരുന്ന ഡോക്ടര് സുഹൃത്തുക്കളോടു ഞാന് മരിച്ചാല് കത്തിച്ചു കളഞ്ഞാല് മതിയെന്ന് പറഞ്ഞിട്ടുണ്ടായിരുന്നു എന്നാണ് അറിയുന്നത്.
ലിവര്പൂളില് ജോജപ്പന്, ജെസ്സി, ദമ്പതികള് അറിയപ്പെട്ടിരുന്നത് ജ്യോതിസിന്റെ മാതാപിതാക്കള് എന്നനിലയില് ആയിരുന്നു. ജ്യോതിസ് മരിച്ചത് വില്ലേജ് റോഡില് ജ്യോതിസ് ഓടിച്ചിരുന്ന കിയാ കാറും എതിരെ വന്ന റേഞ്ച് റോവറുമായി കൂട്ടിയിടിച്ചാണ്. ഇന്റേണല് ബ്ലീഡിങ് ആയിരിക്കാം മരണകാരണം എന്നാണ് കരുതുന്നത്. രണ്ടു വണ്ടിയും ഓവര് സ്പീഡീല് ആയിരുന്നില്ല എന്നാണ് അറിയുന്നത്. ജ്യോതിസ് ജോലി ചെയ്തിരുന്ന ലങ്കഷെയര് യൂണിവേഴ്സിറ്റി ഹോസ്പിറ്റലില്നിന്നും നൈറ്റ് ഡ്യൂട്ടി കഴിഞ്ഞ ശേഷം മെഡിക്കല് സ്റുഡന്സിനു ക്ലാസ് എടുക്കാന് ബ്ലാക്ക് പൂളിലേക്ക് പോകുന്നവഴിയാണ് അപകടം സംഭവിച്ചത്.
വീടുമുഴുവന് ജ്യോതിസിന്റെ ചെറുപ്പം മുതലുള്ള ഫോട്ടോകള് ഫ്രെയിം ചെയ്തു വച്ചിരുന്നത് കാണാമായിരുന്നു. ലിവിങ് റൂമില് ഒരു വലിയ ഫോട്ടോ വച്ചിട്ട് അതിനു മുന്പിലാണ് പ്രാര്ത്ഥന നടത്തിയിരുന്നത് ലിവിങ് റൂമിലെ ഷോ കെയിസില് നിറയെ ജ്യോതിസ് നേടിയ ട്രോഫികള് അടുക്കി വച്ചിരിക്കുന്നത് കാണാമായിരുന്നു.
മരണവിവരം അറിഞ്ഞു അമേരിക്കയില് നിന്നും വന്ന ജോജപ്പന്റെ ചേട്ടനോടും ജോജപ്പനോടും അനുശേചനം അറിയിച്ചു പുറത്തിറങ്ങിയ ഞങ്ങളുടെയും കണ്ണ് നിറഞ്ഞിരുന്നു. രണ്ടായിരത്തോടുകൂടി യുകെ യിലേക്ക് നടന്ന മലയാളി കുടിയേറ്റത്തില് ലിവര്പൂളില് എത്തിയതായിരുന്നു ജ്യോതിസിന്റ കുടുംബം. ഒരു പക്ഷെ മലയാളികളുടെ ഇടയില് ലിവര്പൂളില് നിന്നും അദ്യം MBBS കരസ്ഥമാക്കിയത് ജ്യോതിസ് ആയിരിക്കും. വളര്ന്നു വരുന്ന തലമുറയ്ക്ക് ജ്യോതിസ് ഒരു മാതൃകയായിരുന്നു.
പഠിത്തത്തിലും കലാസംകാരിക മേഖലയിലും പ്രതിഭയായിരുന്നു ആ ചെറുപ്പക്കക്കാരന്. ലിവര്പൂള് യൂണിവേഴ്സിറ്റിയില് നിന്നാണ് MBBS കരസ്ഥമാക്കിയത്. ജോജപ്പന്, ജെസ്സി, ദമ്പതികള്ക്ക് രണ്ടു ആണ് കുട്ടികളാണ് ഉള്ളത് അതില് മൂത്തയാളാണ് ജ്യോതിസ്. ജ്യോതിസിന്റെ കുടുംബം ചങ്ങനാശേരി സെന്റ് .മേരിസ് കത്തീഡ്രല് ഇടവക മണലയില് കുടുംബാംഗമാണ്.
അന്ത്യ കര്മ്മങ്ങള് നടക്കുന്ന പള്ളിയുടെ അഡ്രസ്സ്. Holy Cross Church, St. Helens Post Code WA 101LX . ജ്യോതിസിനു ഇടുക്കി ചാരിറ്റി ഗ്രൂപ്പ് യുകെ യുടെ കണ്ണീരില് കുതിര്ന്ന ആദരാജ്ഞലികള്.