പാറശ്ശാലയില് കഷായത്തില് വിഷം ചേര്ത്ത് കൊലപ്പെടുത്തിയ ഷാരോണ് രാജിനെ മുമ്പ് കോളജില് വച്ചും വധിക്കാന് ശ്രമിച്ചിരുന്നതായി മുഖ്യപ്രതി ഗ്രീഷ്മ. ജ്യൂസില് ഡോളോ ഗുളികകള് കലക്കി നല്കിയതായി ഗ്രീഷ്മ അന്വേഷണ ഉദ്യോഗസ്ഥര്ക്ക് മൊഴി നല്കി. നാഗര്കോവിലിലെ സൈനികനുമായി വിവാഹാലോചന വന്നപ്പോള് തന്നെ പരസ്പരം പിരിയാമെന്ന ഉപാധി ഗ്രീഷ്മ മുന്നോട്ടു വെച്ചെങ്കിലും ഷാരോണ് പ്രണയത്തില് നിന്നും പിന്മാറാന് ഒരുക്കമായിരുന്നില്ല.
ഷാരോണ് തീവ്രപ്രണയത്തോടെ ഒരുമിച്ചു ജീവിക്കണമെന്ന് താല്പര്യം പ്രകടപ്പിച്ചിരുന്നു. നാഗര്കോവിലുകാരന്റെ വിവാഹം നടത്താന് ഷാരോണിനെ വകവരുത്തുക മാത്രമേ പോം വഴിയുള്ളുവെന്ന് ഗ്രീഷ്മ ചിന്തിച്ചത് ഒരു വര്ഷം മുന്പാണ്. പിന്നീട് ഷരോണിനെ തെളിവുകളില്ലാതെ വകവരുത്തുന്നതിനെ കുറിച്ചായി ചിന്ത. ഇതിനായി ഗൂഗിളും യൂട്യൂബുമൊക്കെ പരതി. ഇതിനിടെയാണ് ഷാരോണ് പഠിച്ചിരുന്ന നെയ്യൂര് ക്രിസ്ത്യന് കോളേജില് ആര്ട്സ് ഡേ വന്നെത്തിയത്. ഷാരോണിന്റെ പ്രത്യേക നിര്ബന്ധത്തില് ഇരുവരും ടൂവീലറില് ഷാരോണിന്റെ കോളേജില് പോയി. ഷാരോണ് ബി എസ് സി റേഡിയോളജി വിദ്യാര്ത്ഥിയായിരുന്നു.
തന്റെ കാമുകിയെ സുഹൃത്തുക്കള്ക്ക് പരിചയപ്പെടുത്തിയ ഷാരോണ് ഗ്രീഷ്മയെ ഓടിനടന്ന് ക്യാംപസ് മുഴുവന് കാണിച്ചിരുന്നു. ഇതിനിടെ കോളേജ് ക്യാന്റീനില് നിന്നാണ് മാ ജ്യൂസ് ഗ്രീഷ്മ വാങ്ങിയത്. ജ്യൂസ് വാങ്ങിയ ഉടന് വാഷ് റൂമില് പോയ ഗ്രീഷ്മ അവിടെ വെച്ച് ഷാരോണിന് നല്കാമായി ഒരു ജ്യൂസില് വിഷം കലര്ത്തി. അതിന് ശേഷം പുറത്തു വന്ന് വിഷം കലര്ത്തിയ ജ്യൂസ് ഷാരോണിന് നല്കി. ഡോളോ ഗുളികകള് കലര്ത്തിയായിരുന്നു ജ്യൂസ് കൊടുത്തത്. കുഴുത്തുറ പഴയ പാലത്തില് വച്ചായിരുന്നു ഇതെല്ലാം.
ആ ജ്യൂസ് ഒരു കവിള് കുടിച്ച ശേഷം കയ്പ്പാണെന്ന് പറഞ്ഞ് കുടിച്ചതു മുഴുവന് ഷാരോണ് തുപ്പി കളഞ്ഞു. ഉടന് ഗ്രീഷ്മ തന്റെ കയ്യിലിരുന്ന ജ്യൂസ് ഷാരോണിന് കുടിക്കാന് കൊടുത്തു. മറ്റേ ജ്യൂസ് കാലാവധി കഴിഞ്ഞതാവാമെന്നും ഷാരോണിനെ വിശ്വസിപ്പിച്ചു. അവിടെവെച്ച് ജ്യൂസ് ചലഞ്ച് പറഞ്ഞ്് ഇരുവരും ചേര്ന്ന് ഫോട്ടോയും എടുത്തു. ജ്യൂസ് ചലഞ്ചിന്റെ രംഗങ്ങള് ഷാരോണ് ചിത്രീകരിക്കുന്നത് താന് തടഞ്ഞിരുന്നതായി ഗ്രീഷ്മ അന്വേഷണ സംഘത്തോട് പറഞ്ഞു. ജ്യൂസിലെ വിഷം നല്കല് പാളിയപ്പോഴാണ് കഷായത്തില് വിഷം കൊടുക്കുന്നതിനെ കുറിച്ച് ചിന്തിച്ചതെന്ന് ചോദ്യം ചെയ്യലില് ഗ്രീഷ്മ പറഞ്ഞു.
പുതിയ വെളിപ്പെടുത്തലിന്റെ പശ്ചാത്തലത്തില് ഗ്രീഷ്മയെ കോളജില് കൊണ്ടുപോയി തെളിവെടുക്കും. കൂടാതെ, താലി കെട്ടിയശേഷം ഗ്രീഷ്മയും ഷാരോണും താമസിച്ച കന്യാകുമാരി ജില്ലയിലെ തൃപ്പരപ്പിലെ ഹോട്ടലിലെത്തിച്ചും തെളിവെടുക്കും.
ഗ്രീഷ്മയുമായി ഇന്നലെ രാമവര്മ്മന്ചിറയിലെ വീട്ടിലും താലികെട്ടിയ വെട്ടുകാട് പള്ളിയിലും പരിസരത്തും വേളി ടൂറിസ്റ്റ് വില്ലേജിലും തെളിവെടുപ്പ് നടത്തിയിരുന്നു. തെളിവെടുപ്പിന്റെ ഭാഗമായി ഗ്രീഷ്മയുടെ ശബ്ദ സാമ്പിള് ആകാശവാണിയില് പരിശോധിച്ച് ഉറപ്പാക്കാനും അന്വേഷണസംഘം തീരുമാനിച്ചു. കേസ് തമിഴ്നാട് പൊലീസിന് കൈമാറുന്നതാണ് ഉചിതമെന്ന അഡ്വക്കേറ്റ് ജനറലിന്റെ നിയമോപദേശത്തില് പൊലീസ് ഉടന് തീരുമാനമെടുത്തേക്കും.