ലണ്ടൻ: സ്വന്തം ലേഖകൻ

യുകെയില്‍ അങ്ങോളമിങ്ങോളം മഞ്ഞുവീഴ്ച തുടരുകയാണ്. മഞ്ഞും ഐസും പൊഴിയുന്നത് മൂലം പുറത്തിറങ്ങാന്‍ കഴിയാത്ത അവസ്ഥ പലയിടങ്ങളിലുമുണ്ട്. യു കെ യുടെ മിക്ക ഭാഗങ്ങളിലും ആംബര്‍- യെല്ലോ വാര്‍ണിംഗുകള്‍ നിലവില്‍ വന്നു. തെക്കന്‍ ഇംഗ്ലണ്ട്, പടിഞ്ഞാറന്‍ ഇംഗ്ലണ്ട്, നോര്‍ത്തേണ്‍ അയര്‍ലന്‍ഡ്, സ്‌കോട്ടിഷ് മലനിരകള്‍, വടക്കന്‍ വെയില്‍സ് എന്നിവിടങ്ങളില്‍ ഇന്നും യെല്ലോ വാര്‍ണിംഗ് പ്രഖ്യാപിച്ചിടുണ്ട്. മഞ്ഞു വീഴ്ച്ചയും ഹിമപാതവും പലയിടങ്ങളിലും ഗതാഗത തടസ്സമുണ്ടാക്കുമെന്നും, ചില ഗ്രാമീണ മേഖലകളെ ഒറ്റപ്പെടുത്തുമെന്നും മെറ്റ് ഓഫീസ് മുന്നറിയിപ്പ് നല്‍കി. അത്യാവശ്യമെങ്കില്‍ മാത്രമേ പുറത്തിറങ്ങാവൂ എന്നാണ് പോലീസ് നല്‍കുന്ന നിര്‍ദേശം.

ഒരിടവേളയ്ക്ക് ശേഷമാണ് തണുപ്പ് വീണ്ടും കൂടുന്നത്. എല്ലാവരും ജാഗ്രത പാലിക്കണമെന്നും, കട്ടിയുള്ള വസ്ത്രങ്ങള്‍ ധരിക്കാന്‍ ശ്രമിക്കണമെന്നുമാണ് കാലാവസ്ഥ വിഭാഗം നല്‍കുന്ന മുന്നറിയിപ്പ്. വൈദ്യുതി വിതരണം തടസ്സപ്പെടാന്‍ സാധ്യതയുള്ളതുപോലെ, മൊബൈല്‍ ഫോണ്‍ സേവനവും പലയിടങ്ങളിലും തടസ്സപ്പെട്ടേക്കാം.

താഴ്ന്ന പ്രദേശങ്ങളില്‍ 2 മുതല്‍ 3 സെന്റിമീറ്റര്‍ കനത്തില്‍ മഞ്ഞു വീഴാന്‍ സാധ്യതയുള്ളപ്പോള്‍, ഉയര്‍ന്ന പ്രദേശങ്ങളില്‍ ഇത് 5 മുതല്‍ 10 സെന്റിമീറ്റര്‍ വരെയായിരിക്കും. താപനില പൊതുവെ മൈനസ് 7 ഡിഗ്രിക്കും 8 ഡിഗ്രിക്കും ഇടയിലായി തുടരും. ചിലയിടങ്ങളില്‍ ഇത് മൈനസ് 11 ഡിഗ്രി വരെ എത്താനും സാധ്യതയുണ്ട്.  ഇന്നലെ വൈകിട് 6 മണിക്കും രാത്രി 11 മണിക്കും ഇടയില്‍ 53 ഓളം അപകടങ്ങളാണ് പോലീസില്‍ റിപ്പോര്‍ട്ട് ചെയ്യപ്പെട്ടിട്ടുള്ളത്. ഇതില്‍ ഏഴോളം അപകടങ്ങളില്‍ ആളുകള്‍ക്ക് പരിക്ക് പറ്റിയിടുണ്ട്. എന്നാല്‍, ആരും ഗുരുതരാവസ്ഥയിലല്ല. 

അതിനിടെ വീടുകള്‍ക്കുള്ളില്‍ അന്തരീക്ഷം ചൂടാക്കാന്‍ ഉപയോഗിക്കുന്ന ഡീസല്‍ ഹീറ്ററുകള്‍ക്കെതിരെ മുന്നറിയിപ്പുമായി പോലീസ് രംഗത്ത് എത്തിയിട്ടുണ്ട്. അത്തരം ഹീറ്ററുകള്‍ കാരവാനുകളും മറ്റും ചൂടാക്കാനും ഉപയോഗിക്കുന്നുണ്ട്. അവയുടെ ഉപയോഗം വളരെ ശ്രദ്ധിച്ചു വേണമെന്ന മുന്നറിയിപ്പാണ് അഗ്‌നിശമന സേനയും നല്‍കുന്നത്.