കൊന്നമരത്തിൽ പൂത്തുവിരിഞ്ഞ മഞ്ഞപ്പൂങ്കുലകൾ പോലെ പരിസലിക്കുകയാണ് അയർലാൻഡിലെ പ്രഥമ മലയാള പഠനക്ലാസ്സും അതിലെ വിദ്യാർത്ഥികളും. ആറുവയസ്സുകാർ മുതൽ അറുപതുകാർ വരെ ഇവിടെ ‘ കണിക്കൊന്ന’ ക്ലാസ്സിലെ വിദ്യാർത്ഥികളാകുമ്പോൾ, തലമുറകളിലേക്ക് പകർന്നുകിട്ടുന്നത് മലയാളത്തിന്റെ അക്ഷര മധുരത്തിനൊപ്പം കേരളത്തിന്റെ സാംസ്കാരികത്തനിമയും.
അയർലാൻഡ് റിപ്പബ്ളിക്കിലെ ഡബ്ലിനിലാണ് തലമുറകളുടെ മലയാള പഠനത്തിന്റെ ഈ കൗതുകക്കാഴ്ച്ച. കേരളത്തിലെ യുവതലമുറ ഇംഗ്ലീഷ് ഭാഷാടെസ്റ്റുകൾ എങ്ങനേയും പാസ്സായി യുകെ അടക്കമുള്ള വിദേശരാജ്യങ്ങളിൽ എത്താൻ പാടുപെടുമ്പോൾ, അയർലാൻഡ് മലയാളികളും മക്കളും ഇവിടെ മലയാളം പഠിക്കുന്നു!
അയർലൻഡിലെ മലയാളം മിഷൻ ബ്ലാക്ക്റോക്ക് ചാപ്റ്ററിന്‍റെ നേതൃത്വത്തിലുള്ള മലയാളം ക്ലാസുകൾ ഇവിടെയുള്ള മലയാളികൾ ഇരുകൈയും നീട്ടി സ്വീകരിച്ചുകഴിഞ്ഞു. ദിവസംചെല്ലുന്തോറും കൂടുതൽ കുട്ടികൾ മലയാളം പഠിക്കുന്നതിനായി ആഗ്രഹം പ്രകടിപ്പിച്ച് എത്തുന്നതായി സംഘാടകർ പറഞ്ഞു.
വർഷങ്ങൾക്കുമുമ്പേ കുടിയേറിയവരാണെങ്കിലും നാളികേരത്തിന്റെ നാട്ടിലെ ജീവിതവും സംസ്കാരവും മൂല്യങ്ങളും കണിക്കൊന്നയും കലയുമെല്ലാം ഇന്നും കൂടെക്കൂട്ടിയവരാണ് അയർലാൻഡിലെയും അയൽരാജ്യമായ യുകെയിലേയും ബഹുഭൂരിഭാഗം മലയാളികളും. ഇന്നും മിക്കവരും കുടുംബങ്ങളിൽ മലയാളം സംസാരിക്കുന്നു. എന്നാൽ മലയാള ഭാഷയെ കൂടുതൽ പഠിക്കാനും അടുത്തറിയാനും പുതിയ തലമുറയ്ക്ക് കഴിയുന്നില്ലെന്നതാണ് അവരെ അലട്ടുന്ന വലിയപ്രശ്‌നം.
അതിനൊരു പരിഹാരമാണ് കേരള മലയാള മിഷന്റെ കണിക്കൊന്ന മലയാള പഠന ക്ലാസ്സുകൾ. നിലവിൽ നാല് കോഴ്‌സുകളാണ് മലയാളം മിഷൻ നടത്തുന്നത്. മലയാളം മിഷന്റെ പ്രാഥമിക കോഴ്സാണ് കണിക്കൊന്ന.
ലോകമെമ്പാടുമുള്ള മലയാളികള്‍ക്ക് മാതൃഭാഷാപഠനത്തിന് അവസരം ലഭ്യമാക്കുന്നതിനായി കേരള സര്‍ക്കാര്‍ ആവിഷ്‌കരിച്ച പദ്ധതിയാണ് മലയാളം മിഷന്‍. ഇതൊരു സർട്ടിഫൈഡ് കോഴ്സാണ്
6 വയസ്സ് പൂർത്തിയായ ആർക്കും 2 വർഷത്തെ സർട്ടിഫിക്കറ്റ് കോഴ്‌സിനു ചേരാം. തുടർന്ന് 2 വർഷ ഡിപ്ലോമ കോഴ്‌സും, 3 വർഷത്തെ ഹയർ ഡിപ്ലോമയും പഠിക്കാം. അതിനുശേഷം താല്പര്യമുള്ളവർക്ക് 3 വർഷത്തെ സീനിയർ ഹയർ ഡിപ്ലോമയ്ക്കും ചേരാം. ഈ കോഴ്‌സുകൾ പൂർത്തീകരിക്കുമ്പോൾ നാട്ടിലെ പത്താംക്ലാസിന്‌ തത്തുല്യമായ നിലവാരത്തിലേക്ക് വിദ്യാർഥികൾക്ക് എത്തിച്ചേരുവാൻ സാധിക്കും.
എല്ലാ കോഴ്‌സുകളും സൗജന്യമായാണ് നടത്തുന്നതെന്നതാണ് എടുത്തപറയേണ്ട മറ്റൊരു സവിശേഷത.
വിദ്യാർത്ഥികളുടെ എണ്ണം കൂടിയതിനാൽ ഡിവിഷൻ തിരിച്ച് ക്ലാസുകൾ വിപുലീകരിക്കുന്നതിനും കൂടുതൽ സൗകര്യത്തിനുമായി ഇനിമുതൽ ഡബ്ലിനിലെ മലയാളം ക്ലാസുകൾ എല്ലാ ശനിയാഴ്ച്ചയും വൈകിട്ട് 5 മണിമുതൽ സ്റ്റില്ലോർഗനിലുള്ള സെന്‍റ് ബ്രിജിഡ്സ് പാരിഷ് സെന്ററിൽ ആയിരിക്കുമെന്ന് മലയാളം മിഷൻ ചീഫ് കോർഡിനേറ്റർ അഡ്വ. സിബി സെബാസ്റ്റ്യനും, പ്രസിഡന്റ് അനീഷ് വി ചെറിയാനും അറിയിച്ചു.
ഡബ്ലിനിലെ വിവിധ പ്രദേശങ്ങളിലുള്ള കുട്ടികൾക്ക് ക്ലാസിലെത്തി മലയാളം പഠിക്കാൻ സൗകര്യം ഒരുക്കുന്നതിനായിട്ടാണ് ശനിയാഴ്ച്ചത്തേക്ക് ക്ലാസുകൾ മാറ്റി ക്രമീകരിച്ചിരിക്കുന്നത്.
ബ്ലാക്ക്റോക്കിലെ സീറോ മലബാർ പാരിഷ് കമ്മറ്റിയുടെ നേതൃത്വത്തിലാണ് മലയാളം ക്ലാസുകൾ നടക്കുന്നത്. കുട്ടികളെ മലയാളം പഠിപ്പിക്കാൻ താല്പര്യത്തോടെ ഡബ്ലിനിലെ വിവിധ ഭാഗങ്ങളിൽ നിന്നും നിരവധിപ്പേർ ബ്ലാക്ക്റോക്കിലെ സെന്ററിൽ എത്തുന്നു. ഭേദവ്യത്യാസമില്ലാതെ എല്ലാകുട്ടികൾക്കും ഇവിടെ പ്രവേശനം ലഭിക്കും.
ഇതിനായി ആദ്യം കുട്ടികൾ കേരള സർക്കാരിന്‍റെ മലയാളം മിഷൻ പഠനകേന്ദ്രത്തിൽ രജിസ്റ്റർ ചെയ്യണം എന്ന നിബന്ധന മാത്രമാണുള്ളത്. പുതിയ ബാച്ചിലേക്കുള്ള സീറ്റുകൾ ഇനിയും ഒഴിവുണ്ടെന്ന് സംഘാടകർ അറിയിച്ചു.
കോഴ്‌സിൽ ചേരാനും കൂടുതൽ വിവരങ്ങൾ അറിയാനും താഴെപ്പറയുന്ന ഫോൺ നമ്പറുകളിൽ ബന്ധപ്പെടുക:
അഡ്വ. സിബി സെബാസ്റ്റ്യൻ - 0894433676
അനീഷ് വി ചെറിയാൻ - 0892606282
More Latest News
ലിവര്‍പൂള്‍ മലയാളി കള്‍ച്ചറല്‍ അസ്സോസിയേഷന്‍ സംഘടിപ്പിക്കുന്ന 'അക്ഷരവേദി'ക്ക് ഇന്ന് ഉദ്ഘാടനം, പ്രമുഖ മാധ്യമപ്രവര്‍ത്തകന്‍ റ്റിജോ ജോര്‍ജ്ജ് ചടങ്ങ് ഉദ്ഘാടനം ചെയ്യും
സൗത്ത് ഇന്ത്യന്‍ മലയാളി അസോസിയേഷനായ സൈമ പ്രെസ്റ്റന് പുതിയ നേതൃത്വം, സൈമയുടെ മുഖ്യ സാരഥികളും എക്‌സിക്യൂട്ടീവ് മെമ്പേഴ്‌സുമായി തിരഞ്ഞെടുക്കപ്പെട്ടത് ഇവര്‍
ഫാ.സേവ്യര്‍ ഖാന്‍ വട്ടായില്‍ നയിക്കുന്ന ഗ്രാന്‍ഡ് യൂത്ത് കോണ്‍ഫറന്‍സ് ജൂണ്‍ 28 മുതല്‍ ജൂലൈ 1 വരെ; രജിസ്ട്രേഷന്‍ ഉടന്‍ അവസാനിക്കും
എറണാകുളം നഗരമധ്യത്തിലെ ഹോസ്റ്റലിലെ ശുചിമുറിയില്‍ അവിവാഹിതയായ യുവതി പ്രസവിച്ചു, പൊലീസ് സ്ഥലത്തെത്തി അമ്മയേയും കുഞ്ഞിനേയും ആശുപത്രിയിലേക്ക് മാറ്റി
ദിവസവും പത്ത് മണിക്കൂര്‍ നേരം ഇരുന്ന് ജോലി ചെയ്യുന്നവരാണോ? നിങ്ങള്‍ക്ക് ഈ രോഗം വരാന്‍ സാധ്യതകള്‍ ഏറെയെന്ന് പഠനം
Most Read
British Pathram Recommends
