സ്വന്തം ലേഖകൻ

കനത്ത മഴ തുടരുന്ന പശ്ചാത്തലത്തില്‍ സംസ്ഥാനത്ത് ആറ് ഡാമുകളില്‍ റെഡ് അലര്‍ട്ട് തുടരുന്നു. പൊന്മുടി, കല്ലാര്‍കുട്ടി, ലോവര്‍ പെരിയാര്‍, ഇരട്ടയാര്‍, മൂഴിയാര്‍, കുണ്ടള ഡാമുകളിലാണ് റെഡ് അലര്‍ട്ട്. പെരിങ്ങല്‍ക്കുത്ത് ഡാമില്‍ ഇന്ന് ഓറഞ്ച് അലര്‍ട്ടാണ്.  വലിയ ഡാമുകളില്‍ നിലവില്‍ ആശങ്കയുടെ സാഹചര്യമില്ല. എങ്കിലും പരമാവധി സംഭരണ ശേഷിയിലക്ക് എത്തിക്കാതെ ക്രമീകരണം തുടരാനാണ് നിലവിലെ തീരുമാനം. 

കനത്ത മഴ തുടര്‍ന്നാല്‍, മഴവെള്ളത്തിനൊപ്പം അണക്കെട്ടുകളിലെ ജലം കൂടി നദികളിലേക്ക് ഒഴുകിയെത്തുന്നതോടെ കേരളത്തിലെ അഞ്ചോ ആറോ ജില്ലകള്‍ പ്രളയ ഭീഷണിയിലാകും. നീരൊഴുക്കിനേക്കാള്‍ കൂടുതല്‍ വെള്ളം മുല്ലപ്പെരിയാറില്‍ നിന്ന എടുക്കണമെന്ന് അഭ്യര്‍ഥിച്ചു കേരളം, തമിഴ്‌നാടിനു കത്തു നല്‍കിയിട്ടുണ്ട്.

ജലനിരപ്പ് അനുവദനീയമായ പരിധി കടക്കുന്ന പക്ഷം അണക്കെട്ടിന്റെ ഷട്ടറുകള്‍ ഉയര്‍ത്തേണ്ട സാഹചര്യമുണ്ടായാല്‍ കുറഞ്ഞത് 24 മണിക്കൂര്‍ മുന്‍പ് ഇത് സംബന്ധിച്ച വിവരം കേരള സര്‍ക്കാരിനു നല്‍കണമെന്നും തമിഴ്‌നാടിനോട് അഭ്യര്‍ഥിച്ചിട്ടുണ്ട്. 

ഡാമുകളിലെ ജലനിരപ്പ് ക്രമാതീതമായി ഉയരുന്നതു തടയുന്നതിന്റെ മുന്നൊരുക്കമെന്ന നിലയിലാണ് ഡാമുകളുടെ ഷട്ടറുകള്‍ ഉയര്‍ത്തുന്നതു പരിഗണിക്കുന്നത്. നിലവില്‍ വൈദ്യുതി ബോര്‍ഡിനു കീഴിലുള്ള പ്രധാനപ്പെട്ട ഏഴു ചെറുകിട- ഇടത്തരം ഡാമുകളുടെ ഷട്ടറുകള്‍ ഉയര്‍ത്തിയിട്ടുണ്ട്.

ഇടുക്കി ജില്ലയിലെ അഞ്ചും തൃശൂര്‍, പത്തനംതിട്ട, തിരുവനന്തപുരം ജില്ലകളിലെ ഓരോ ഡാമുമാണ് തുറന്നത്. ജിലനിരപ്പ് ക്രമാതീതമായി ഉയര്‍ന്ന പെരിങ്ങല്‍ക്കുത്ത്, മൂഴിയാര്‍, കുണ്ടള, ഇരട്ടയാര്‍, ലോവര്‍ പെരിയാര്‍, പൊന്മുടി തുടങ്ങിയ ഡാമുകളാണു തുറന്നു വിട്ടത്. ഇടുക്കിയില്‍ ജല നിരപ്പ് ക്രമാതീതമായി ഉയരുന്നതിനെ തുടര്‍ന്ന് ബ്ലു അലേര്‍ട്ട് പ്രഖ്യാപിച്ചു.

അതിതീവ്ര മഴ തുടരുന്ന സാഹചര്യത്തില്‍ സംസ്ഥാനത്തെ ഒമ്പത്് ജില്ലകളില്‍ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധിയാണ്. പത്തനംതിട്ട, ഇടുക്കി, കോട്ടയം, ആലപ്പുഴ, തൃശൂര്‍, പാലക്കാട്, എറണാകുളം, വയനാട്, കണ്ണൂര്‍ ജില്ലകളിലെ വിദ്യാഭ്യാസ സ്ഥാപനങ്ങള്‍ക്കാണ് അവധി പ്രഖ്യാപിച്ചിരിക്കുന്നത്. പ്രഫഷനല്‍ കോളജുകള്‍ക്ക് ഉള്‍പ്പെടെ അവധി ബാധകമാണ്. എംജി സര്‍വകലാശാല നാളെ നടത്താനിരുന്ന പരീക്ഷകള്‍ മാറ്റി. പുതുക്കിയ തീയതി പിന്നീട് അറിയിക്കും.