ഇന്ത്യക്കാർ അടക്കമുള്ള കുടിയേറ്റ കുടുംബങ്ങൾക്ക് കനത്ത തിരിച്ചടിയായി യുകെ ഹോം ഓഫീസ് നേരത്തെ പ്രഖ്യാപിച്ചിരുന്നതും ജനുവരി 15 നു ബ്രിട്ടീഷ് പാർലമെന്റ് അംഗീകരിച്ചതുമായ, ഇമിഗ്രേഷൻ ഹെൽത്ത് സർചാർജ് അഥവാ (ഐഎച്ച്എസ്) നിരക്കുകളുടെ വർദ്ധനവ് ഫെബ്രുവരി 6 മുതൽ പ്രാബല്യത്തിൽ വരും.
ഇമിഗ്രേഷൻ ഹെൽത്ത് സർചാർജിന്റെ പ്രധാന നിരക്ക് പ്രതിവർഷം £624-ൽ നിന്ന് £1,035-ലേക്ക് ഉയരും. സാധാരണ വരുമാനക്കാർക്ക് ഇരുട്ടടിയാകുന്ന 66% വർദ്ധനവാണ് നടപ്പിലാകുന്നത്.
കുട്ടികൾ, വിദ്യാർത്ഥികൾ, അവരുടെ ആശ്രിതർ, യൂത്ത് മൊബിലിറ്റി തൊഴിലാളികൾ എന്നിവർക്കുള്ള ഡിസ്കൗണ്ടുള്ള IHS നിരക്കും പ്രതിവർഷം £470 ൽ നിന്ന് ഒരു അപേക്ഷകന് പ്രതിവർഷം £776 ആയി ഉയരും. 65 ശതമാനം വർദ്ധനവാണ് ഈ വിഭാഗത്തിലും വരുന്നത്.
യുണൈറ്റഡ് കിംഗ്ഡത്തിൽ പ്രവേശിക്കുന്നതിനോ അവിടെ തുടരുന്നതിനോ അപേക്ഷ സമർപ്പിക്കുമ്പോൾ ഇമിഗ്രേഷൻ ഹെൽത്ത് സർചാർജ് മുൻകൂറായി നൽകണം. വിസ അപേക്ഷാ ഫോം ഓൺലൈനിൽ ഇലക്ട്രോണിക് ആയി സമർപ്പിക്കുമ്പോൾ മിക്ക അപേക്ഷകരും സർചാർജ് അടയ്ക്കുന്നു.
3 അല്ലെങ്കിൽ 5 വർഷത്തേക്ക് ഇഷ്യൂചെയ്ത വിസയ്ക്ക് 2024 ഫെബ്രുവരി 6 മുതൽ നൽകുന്ന അപേക്ഷകൾക്ക് ഇനിപ്പറയുന്ന നിരക്ക് ഈടാക്കും:
3 വർഷത്തെ വിസയ്ക്ക് 2024 ഫെബ്രുവരി 6 മുതൽ IHS ചാർജ്:
മുതിർന്നവർ 1 - £3105
കുട്ടി 1 - £2328
മുതിർന്നവർ 2 - £6210
2 മുതിർന്നവരും 1 കുട്ടിയും - £8538
2 മുതിർന്നവരും 2 കുട്ടികളും - £10,866
5 വർഷത്തെ വിസയുടെ 2024 ഫെബ്രുവരി 6 മുതൽ IHS ചാർജ്
മുതിർന്നവർ 1 - £5175
കുട്ടി 1 - £3880
മുതിർന്നവർ 2 - £10,350
2 മുതിർന്നവരും 1 കുട്ടിയും - £14,230
2 മുതിർന്നവരും 2 കുട്ടികളും - £18,110
അപേക്ഷയിൽ 6 മാസത്തിൽ താഴെയുള്ള ഒരുവർഷത്തിൻ്റെ ഭാഗം ഉൾപ്പെടുന്നുവെങ്കിൽ വാർഷിക തുകയുടെ പകുതിയും അപേക്ഷയിൽ 6 മാസത്തിൽ കൂടുതലുള്ള ഒരുവർഷത്തിൻ്റെ ഭാഗം ഉൾപ്പെടുത്തിയാൽ ഒരുവർഷത്തെ മുഴുവൻ തുകയും അടയ്ക്കണം.
രണ്ടുകുട്ടികളും മാതാപിതാക്കളും അടങ്ങുന്ന ഒരു സാധാരണ കുടിയേറ്റ കുടുംബത്തിന് ഇതോടെ ഭാരിച്ച തുകയാകും ചികിത്സയ്ക്കായി പ്രതിവർഷം മാറ്റിവയ്ക്കേണ്ടി വരിക. അതിനാൽ ശമ്പള കുറവുമൂലം പല കുടിയേറ്റ തൊഴിലാളികളും കുടുംബാംഗങ്ങളെ യുകെയിലേക്ക് കൊണ്ടുവരുന്നത് ഒഴിവാക്കിയേക്കും.
നിരവധിപ്പേർ യുകെയിലെ ജോലി ഉപേക്ഷിച്ചുപോകുന്നതിനും പുതിയ ഹെൽത്ത് സർച്ചാർജ്ജ് വർദ്ധനവ് കാരണമാകുമെന്ന് വിമർശകർ ചൂണ്ടിക്കാണിക്കുന്നു.
ഹെൽത്ത് സർചാർജ്ജ് വർദ്ധന ഒഴിവാക്കാനുള്ള മാർഗ്ഗം വർദ്ധനവ് നടപ്പിലാകുന്നതിനു മുമ്പ് അപേക്ഷിക്കുക എന്നതാണ്. ഫെബ്രുവരി 6-ന് പുതിയ ഫീസ് പ്രാബല്യത്തിൽ വരുന്നതിനുമുമ്പ് അപേക്ഷ സമർപ്പിക്കണം.
ചില സന്ദർഭങ്ങളിൽ, നിലവിലുള്ളതും കുറഞ്ഞതുമായ ഐഎച്ച്എസ് ഫീസ് അടയ്ക്കാൻ നിങ്ങളെ പ്രാപ്തമാക്കിക്കൊണ്ട് നിങ്ങൾ വിചാരിക്കുന്നതിലും മുമ്പേ നിങ്ങളുടെ അപേക്ഷ സമർപ്പിക്കാൻ കഴിഞ്ഞേക്കും. ഇൻട്രാ ട്രാൻസ്ഫർ നടത്തുന്ന പല കമ്പനികളും ഇക്കാര്യം മുൻകൂട്ടി കണ്ടുകൊണ്ട് അപേക്ഷകൾ നൽകിയിട്ടുണ്ട്.