ന്യൂഡല്ഹി : ലോകത്തെ അതിസമ്പന്ന പട്ടികയില് ഒന്നാമതെത്തി ഫ്രഞ്ച് കമ്പനി എല്വിഎംഎച്ചിന്റെ സിഇഒയും ചെയര്മാനുമായ ബെര്ണാഡ് അര്ണോള്ട്. ടെസ്ല സ്ഥാപകന് ഇലോണ് മസ്കിനെ പിന്തള്ളിയാണ് ബെര്ണാഡ് അര്ണോള്ട് ഒന്നാം സ്ഥാനം കരസ്ഥമാക്കിയത്.
ഫോര്ബ്സ് റിപ്പോര്ട്ട് പ്രകാരം ബെര്ണാഡ് കുടുംബത്തിന്റെ ആസ്തി 207.8 ബില്യണ് ഡോളറാണ്. അതേസമയം, മസ്കിന്റെ ആസ്തി 204.5 ബില്യണ് ഡോളറും. ഇവര്ക്കുപിന്നാലെ ജെഫ് ബെസോസ് (181.3 ബില്യണ് ഡോളര്), ലാറി എലിസണ് (142.2 ബില്യണ് ഡോളര്), മാര്ക് സക്കര്ബര്ഗ് (139.1 ബില്യണ് ഡോളര്) എന്നിവര് പട്ടികയിലെ ആദ്യ അഞ്ചില് ഇടംനേടി. ഇന്ത്യക്കാരായ മുകേഷ് അംബാനി 104.4 ബില്യണ് ഡോളര് ആസ്തിയുമായി 11-ാം സ്ഥാനത്തും 75.7 ബില്യണ് ആസ്തിയുള്ള ഗൗതം അദാനി 16-ാമതുമാണ്.
ടെസ്ലയുടെ 586.14 ബില്യണ് ഡോളറുമായി താരതമ്യപ്പെടുത്തുമ്പോള്, ഡിയോര്, ബള്ഗാരി, സെഫോറ തുടങ്ങിയ ആഡംബര ഉല്പ്പന്ന ബ്രാന്ഡുകളുടെ സ്ഥാപനമായ എല്വിഎംഎച്ചിന്റെ വിപണി മൂലധനം 388.8 ബില്യണ് ഡോളറിലെത്തിയതായി റിപ്പോര്ട്ട് പറയുന്നു.